ଯାଜପୁର: ଜଙ୍ଗଲରୁ ଯୁବକଙ୍କ ଗଳିତ ମୃତଦେହ ଉଦ୍ଧାର । ଯାଜପୁର ଜିଲ୍ଲା କଳିଙ୍ଗନଗରର ୩ୟ ଆଇ.ଆର.ବି ବାଟାଲିୟାନ ନିକଟସ୍ଥ ଜଙ୍ଗଲରୁ ଏହି ମୃତଦେହ ଉଦ୍ଧାର ହୋଇଛି । ତେବେ ମୃତକଙ୍କ ପରିଚୟ ମିଳି ପାରିନାହିଁ । ସେପଟେ ସୁକିନ୍ଦା ପୁଲିସ ମୃତଦେହ ଜବତ କରିବା ସହ ଘଟଣାର ତଦନ୍ତ ଜାରି ରଖିଥିବା ସୂଚନା ମିଳିଛି ।
ମୃତ ଦେହ ନିକଟରୁ ଏକ ବିଷ ବୋତଲ ଜବତ କରାଯାଇଥିବା ପୋଲିସ ପକ୍ଷରୁ ସୂଚନା ମିଳିଛି । ତେବେ ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ହିଁ ଘଟଣାର ସତ୍ୟତା ଜଣାପଡିବ ବୋଲି ପୋଲିସ କହିଛି । ଆସନ୍ତାକାଲି ସାଇଣ୍ଟିଫିକ ଟିମ୍ ଆସିବା ପରେ ଘଟଣାର ବିଦ୍ଧିବଧ ତଦନ୍ତ କରାଯିବ ।
ଅନ୍ୟ ପକ୍ଷରେ ଗତ ୨୧ ତାରିଖ ଠାରୁ ପ୍ରଶାନ୍ତ କୁମାର ସ୍ୱାଇଁ ନାମକ ୩ୟ ଆଇ.ଆର.ବି ବାଟାଲିୟାନର ଜଣେ ସଫେଇ କର୍ମଚାରୀ ନିଖୋଜ ଅଛନ୍ତି । ଏନେଇ ସୁକିନ୍ଦା ଥାନାରେ ଅଭିଯୋଗ ମଧ୍ୟ ହୋଇଥିଲା । ପ୍ରଶାନ୍ତଙ୍କ ଘର ପୁରୀ ଜିଲ୍ଲା ଅନ୍ତର୍ଗତ ବ୍ରହ୍ମଗିରି ଅଞ୍ଚଳର ବୋଲି ଜଣାପଡିଛି । ତେବେ ପ୍ରଶାନ୍ତଙ୍କ ପରିବାର ଘଟଣାସ୍ଥଳରେ ପହଞ୍ଚିବା ପରେ ହିଁ ମୃତଦେହ ସମ୍ପର୍କରେ ତଥ୍ୟ ସ୍ପଷ୍ଟ ହେବ ।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
