ଜଗତସିଂହପୁର: ବୁଧବାର ଦିନ ଜଗତସିଂହପୁର ଜିଲ୍ଲା ନବ ନିର୍ମାଣ କୃଷକ ସଂଗଠନ ପକ୍ଷରୁ ଏକ ସାମ୍ବାଦିକ ସମ୍ମିଳନୀରେ କୃଷକମାନଙ୍କ ସମସ୍ୟାକୁ ନେଇ ପ୍ରଶାସନ ଉପରେ ବର୍ଷିଛନ୍ତି । ନବ ନିର୍ମାଣ କୃଷକ ସଂଗଠନ ଅଭିଯୋଗ କରିଛି ଯେ, ଜିଲ୍ଲାର ୫୬ ହଜାର ହେକ୍ଟର ଗାଁ ଗଣ୍ଡା, ଗୋଚର, ଓ ଚାଷଜମିରେ ବର୍ଷାଜଳ ନିସ୍କାସନ କରାଯିବା ପାଇଁ ବ୍ୟବସ୍ଥା କରାଗଲା ନାହିଁ ।
ଜିଲ୍ଲାରେ ମୃତ ଅବସ୍ଥାରେ ଥିବା, ହସଂଆ, ଅଳକା, ଓ ଗୋବରୀକୁ ପୁନରୁଦ୍ଧାର କରାଗଲେ ବର୍ଷାଜଳ ନିସ୍କାସନର ସୁବ୍ୟବସ୍ଥା ହୋଇପାରନ୍ତା । କିନ୍ତୁ ଜିଲ୍ଲା ଡ୍ରେନେଜ୍ ବିଭାଗ ଏଥିପ୍ରତି ଧ୍ୟାନ ଦେଉ ନଥିବା ଅଭିଯୋଗ କରିଛନ୍ତି ।
ଗତ ବନ୍ୟାରେ ହଜାର ହଜାର ହେକ୍ଟର ଚାଷଜମି ଜଳମଗ୍ନ ହୋଇଛି । ଚାଷୀର ବର୍ଷକର ଆହାର ପାଣିରେ ଭାସିବା ସହ ଧାରକରଜ କରି ସର୍ବସାନ୍ତ ହୋଇଛି । ଜିଲ୍ଲା ପ୍ରଶାସନ ଓ ରାଜ୍ୟ ସରକାର କ୍ଷତିଗ୍ରସ୍ଥ ହୋଇଥିବା ଚାଷୀଙ୍କୁ ତୁରନ୍ତ ସହାୟତା ଦେବାକୁ ଦାବି କରିଛନ୍ତି । ଏହାଯଦି ନ କରାଯାଏ ଆଗାମୀ ଦିନରେ ନବ ନିର୍ମାଣ କୃଷକ ସଂଗଠନ ରାଜ ରାସ୍ତାକୁ ଓହ୍ଲାଇବେ ବୋଲି ଚେତାବନୀ ଦେଇଛି ।
ଜଗତସିଂହପୁରରୁ ସୁଶାନ୍ତ କୁମାର ପାତ୍ର, ଇଟିଭି ଭାରତ
