ଜଗତସିଂହପୁର: ଜିଲ୍ଲାରେ ଘଟିଛି ଏକ ଆଶ୍ଚର୍ଯ୍ୟକର ଘଟଣା । ପରିସ୍ରା କରିବାକୁ କେନ୍ଦ୍ରକରି 2 ବ୍ୟକ୍ତିଙ୍କ ମଧ୍ୟରେ ଗଣ୍ଡଗୋଳ । ଅକାଳରେ ଚାଲିଗଲା ଜଣଙ୍କ ଜୀବନ । ଜଗତସିଂହପୁର ଜିଲ୍ଲା ସଦର ଥାନା ଅନ୍ତର୍ଗତ ସା-ପୁର ପଞ୍ଚାୟତ ନିମାପଡ଼ା ଗ୍ରାମର ଅଭୟ ନାୟକ(40), ସୁଶ୍ରୀ ରଞ୍ଜନ ବିଶ୍ୱାଳ ଓରଫ ଟିପୁଙ୍କ ଘର ପାଖ ବାଡ ମୂଳରେ ପରିସ୍ରା କରୁଥିଲେ । ଏହି ସମୟରେ ଟିପୁ ତାଙ୍କୁ ବାରଣ କରିଥିଲେ ମଧ୍ୟ ସେ ଶୁଣିନଥିଲେ । ଏନେଇ ଉଭୟଙ୍କ ମଧ୍ୟରେ ବଚସା ହୋଇଥିଲା । ଟିପୁ ଉତକ୍ଷିପ୍ତ ହୋଇ ଅଭୟ ନାୟକଙ୍କୁ ଠେଙ୍ଗାରେ ଆକ୍ରମଣ କରିଥିଲେ । ଫଳରେ ଅଭୟ ଆହତ ହୋଇ ତଳେ ପଡିଯାଇଥିଲେ ।
ସଙ୍ଗେ ସଙ୍ଗେ ତାଙ୍କୁ ଉଦ୍ଧାର କରାଯାଇ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା । ସେଠାରେ ତାଙ୍କ ସ୍ବାସ୍ଥ୍ୟାବସ୍ଥା ଗୁରୁତର ହେବାରୁ ଡାକ୍ତର କଟକ ବଡ ମେଡିକାଲ ସ୍ଥାନାନ୍ତର କରିଦେଇଥିଲେ । ମାତ୍ର ଗତକାଲି(ଗୁରୁବାର) ରାତିରେ ଅଭୟଙ୍କୁ ମୃତ ଘୋଷଣା କରିଛନ୍ତି ଡାକ୍ତର । ଏନେଇ ପରିବାର ଲୋକେ ଥାନାରେ ଏତଲା ଦେଇ ଥିବାବେଳେ ଟିପୁ ଫେରାର୍ ହୋଇଯାଇଥିବା ଜଣାପଡିଛି । ଅନ୍ୟପଟେ ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଚାପା ଉତ୍ତେଜନା ଦେଖାଦେଇଛି ।
ଜଗତସିଂହପୁରରୁ ସୁଶାନ୍ତ କୁମାର ପାତ୍ର, ଇଟିଭି ଭାରତ
