ଗୋବିନ୍ଦପୁର(ଜଗତସିଂହପୁର): ଏରସମା ବ୍ଲକ ଅନ୍ତର୍ଗତ ପ୍ରସ୍ତାବିତ JSW ପ୍ରକଳ୍ପ ଗୋବିନ୍ଦପୁର ଅଞ୍ଚଳରେ ଆଜି(ସୋମବାର) 55ଟି ପାନ ବରଜ ମାପଚୁପ ଆରମ୍ଭ କରାଯାଇଛି । ଗୋବିନ୍ଦପୁର ଅଞ୍ଚଳର ଗ୍ରାମବାସୀ ପ୍ରକଳ୍ପକୁ ସମର୍ଥନ କରି ସ୍ବଇଚ୍ଛାରେ ଜିଲ୍ଲା ପ୍ରଶାସନକୁ ପାନ ବରଜ ହସ୍ତାନ୍ତର କରୁଥିବା ଦେଖାଯାଇଛି ।
ସୋମବାର ସନ୍ଧ୍ୟା ସୁଦ୍ଧା 7ଟି ପାନ ବରଜ ଭଙ୍ଗା ଯାଇଥିବାବେଳେ ଶହେରୁ ଅଧିକ ଚାଷୀ ସେମାନଙ୍କ ବରଜକୁ ହସ୍ତାନ୍ତର କରିବାକୁ ପ୍ରଶାସନକୁ କହିଛନ୍ତି। ଯାହାକୁ ନେଇ ଶିଳ୍ପ ପ୍ରତିଷ୍ଠା ପାଇଁ ବାଟ ସୁଗମ ହୋଇଛି । କମ୍ପାନୀ ବରଜ ଡ଼ିସିମିଲ ପିଛା 17 ହଜାର500 ଦେବାକୁ ଘୋଷଣା କରିବା ପରେ ଚାଷୀମାନେ ସେମାନଙ୍କ ବରଜ ହସ୍ତାନ୍ତର କରିବା ଦେଖିବାକୁ ମିଳୁଛି ।
ଏହାମଧ୍ୟ ପଢନ୍ତୁ: JSW ପ୍ରକଳ୍ପ ସ୍ଥାନରେ ନୂଆ ସମୀକରଣ: ଢିଙ୍କିଆବାସୀଙ୍କ ବିରୋଧ, ସମର୍ଥନରେ ଗୋବିନ୍ଦପୁର
ତେବେ ଢ଼ିଙ୍କିଆ ଅଞ୍ଚଳରେ ବିରୋଧୀ ପୂର୍ବ ଭଳି ବିରୋଧ ଜାରି ରଖିଛନ୍ତି । ଧାନ ପାନ ଓ ମୀନକୁ ନେଇ ଏହି ଅଞ୍ଚଳ ପରିଚିତ ଥିବା ବେଳେ କୋରୋନା ପ୍ରଭାବରେ ପାନ ବ୍ୟବସାୟ ହ୍ରାସ ପାଇଛି । ଯାହାକୁ ନେଇ ସ୍ଥାନୀୟ ଲୋକେ ପାନ ବରଜ କମ୍ପାନୀ ହାତକୁ ଟେକି ଦେଉଛନ୍ତି । କମ୍ପାନୀରେ ନିଯୁକ୍ତି ଓ କ୍ଷତିପୂରଣ ରାଶି ବୃଦ୍ଧି ଯୋଗୁଁ ଗୋବିନ୍ଦପୁର ଲୋକେ କମ୍ପାନୀଙ୍କୁ ସମର୍ଥନ କରୁଥିବା ଦେଖିବାକୁ ମିଳିଛି ।
ଜଗତସିଂହପୁରରୁ ସୁଶାନ୍ତ କୁମାର ପାତ୍ର, ଇଟିଭି ଭାରତ
