ଜଗତସିଂହପୁର: ଦ୍ରୁତ ଗତିରେ କାର ଚଳାଇବା ସହ ଅନେକ ସ୍ଥାନରେ ଦୁର୍ଘଟଣା ଘଟାଇଛି ମଦ୍ୟପ ଡ୍ରାଇଭର । ଦୁର୍ଘଟଣାରେ ଜଣେ ଯୁବକ ଗୁରୁତର । ଥାନା ଛକ ନିକଟରେ ଏହି କାରକୁ ଅଟକାଇବା ସହ ଡ୍ରାଇଭରକୁ ନିସ୍ତୁକ ପିଟିଲେ ଲୋକେ । ଘଟଣାସ୍ଥଳରେ ଜଗତସିଂହପୁର ପୋଲିସ ପହଞ୍ଚି ଡ୍ରାଇଭରକୁ ଉଦ୍ଧାର କରିବା ସହ ଗାଡିକୁ ଥାନାକୁ ଆଣିଛି ।
ସୂଚନା ଅନୁସାରେ ଆଜି(ସୋମବାର) ଅପରାହ୍ନ ସମୟରେ କଟକ ପାରାଦୀପ ରାସ୍ତା ଜୟପୁର ନିକଟରୁ ଏକ କାର ଦ୍ରୁତ ଗତିରେ ଜଗତସିଂହପୁର ସହର ଅଭିମୁଖେ ଆସିବା ସମୟରେ ଅନେକ ଲୋକଙ୍କୁ ଧକ୍କା ଦେଇଥିଲା । ସେମାନଙ୍କ ମଧ୍ୟରୁ ତିର୍ତ୍ତୋଲ ବ୍ଲକ ବିରିତୋଳ ଗ୍ରାମର ଜଣେ ଯୁବକ ଗୁରୁତର ହୋଇଛନ୍ତି । ତେବେ ରାସ୍ତାରେ କିଛି ଲୋକ କାରକୁ ଅଟକାଇବା ପାଇଁ ଉଦ୍ୟମ କରିବାରୁ ଚାଳକ ସେମାନଙ୍କ ଉପରେ କାର ମଡାଇ ଦେବାକୁ ଉଦ୍ୟମ କରି ଖସି ଆସିଥିଲେ । ତେବେ ସ୍ଥାନୀୟ ଅଞ୍ଚଳର କିଛି ଯୁବକ ଏହାକୁ ପିଛା କରି ଥାନା ଛକ ନିକଟରେ ଅଟକାଇଥିଲେ । ଡ୍ରାଇଭରକୁ ନିସ୍ତୁକ ପିଟିବା ପରେ କାରକୁ ଭଙ୍ଗାରୁଜା ମଧ୍ୟ କରିଥିଲେ । ତେବେ ଡ୍ରାଇଭରକୁ ଅଟକ ରଖିବା ସହ କିଛି ସମୟ ପାଇଁ ଥାନା ଛକ ଅବରୋଧ ମଧ୍ୟ କରାଯାଇଥିଲା ।
ଇଟିଭି ଭାରତ, ଜଗତସିଂହପୁର
