ଢ଼ିଙ୍କିଆରେ ସ୍ଥିତି ପରଖିଲେ ଜିଲ୍ଲାପାଳ ଓ ଏସପି

ଢିଙ୍କିଆ ଗ୍ରାମ ବୁଲିଲେ ଜଗତସିଂହପୁର ଜିଲ୍ଲାପାଳ ଓ ଏସପି । ଉତ୍ତେଜନା ପରେ ଫେରୁଛି ଶାନ୍ତି । ଗ୍ରାମବାସୀଙ୍କ ସହ ଆଲୋଚନା କରିବା ସହ ଭାଇଚାରା ଫେରାଇ ଆଣିବାକୁ କଲେ ନିବେଦନ । ଅଧିକ ପଢନ୍ତୁ

ଜଗତସିଂହପୁର: ଢିଙ୍କିଆ ଗ୍ରାମବାସୀଙ୍କ ଅନୁରୋଧ କ୍ରମେ ଢ଼ିଙ୍କିଆରେ ପହଞ୍ଚିଲେ ଜିଲ୍ଲାପାଳ ଓ ଏସପି । ଗାଁରେ ବୁଲି ଲୋକମାନଙ୍କ ସହ କଲେ ଆଲୋଚନା । ଗାଁରେ ଶାନ୍ତି ଫେରିବା ନେଇ ସ୍ଥିତି ପରଖିବା ସହ ନିର୍ବାଚନ ପରେ ଲୋକଙ୍କ ବିଭିନ୍ନ ଦାବି ନେଇ କରିବେ ଆଲୋଚନା । ଗତ ୧୪ ତାରିଖ ଘଟଣା ପରେ ଢ଼ିଙ୍କିଆ ଗ୍ରାମରେ ପୁରୁଷଶୂନ୍ୟ ହୋଇଥିବା ବେଳେ ବର୍ତମାନ ପର୍ଯ୍ୟନ୍ତ ମଧ୍ୟ ପୋଲିସ୍ ଭୟରେ ଅନେକ ଲୋକ ଗ୍ରାମକୁ ନଫେରି ଲୁଚି ରହିଛନ୍ତି । ତେବେ ଗ୍ରାମରେ ଶାନ୍ତି ଫେରିବା ନେଇ ସ୍ଥିତି ପରଖିଛି ଜିଲ୍ଲା ପ୍ରଶାସନ।

ଜାନୁଆରୀ 14 ତାରିଖରେ ପାନବରଜ ଭଙ୍ଗା କାର୍ଯ୍ୟ ଦେଖିବାକୁ ଢ଼ିଙ୍କିଆ ଗ୍ରାମବାସୀ ଯିବା ସମୟରେ ପୋଲିସ ଅଟକାଇଥିଲା । ପରେ ପୋଲିସ ଲାଠିମାଡ଼ ଘଟଣାକୁ ଏକ ମାସ ପୂରିଛି । ପୋଲିସ ଲାଠିଚାର୍ଜ ପରେ ଅନେକ ଗ୍ରାମବାସୀ ଗାଁ ଛାଡି ବାହାରେ ଲୁଚି ରହିଥିବା ବେଳେ ଆନ୍ଦୋଳନର ନେତୃତ୍ବ ନେଉଥିବା ଦେବେନ୍ଦ୍ର ସ୍ୱାଇଁଙ୍କ ସହ ୬ଜଣ ଏବେ ଜେଲରେ ଅଛନ୍ତି l ବର୍ତ୍ତମାନ ଧୀରେ ଧୀରେ ସ୍ଥିତି ସ୍ୱାଭାବିକ ହେବା ସହିତ ଗ୍ରାମରେ ଶାନ୍ତି ଫେରିଆସିଛି l

ଢ଼ିଙ୍କିଆ ଗ୍ରାମକୁ ଅନେକ ଥର ଏସପି ଗସ୍ତ କରିବା ସହିତ ଘଟିଯାଇଥିବା ଘଟଣାକୁ ଭୁଲି ଗ୍ରାମରେ ଭାଇଚାରା ଫେରାଇ ଆଣିବା ପାଇଁ ଅନୁରୋଧ କରିଥିଲେ l ତେବେ ଢ଼ିଙ୍କିଆ ଗ୍ରାମର ମୁରବିମାନଙ୍କ ଅନୁରୋଧ କ୍ରମେ ଢ଼ିଙ୍କିଆ ଗ୍ରାମକୁ ଗସ୍ତ କରିଛନ୍ତି ଜିଲ୍ଲାପାଳ ଓ ଏସପି l ନିର୍ବାଚନ ଆଚରଣଵିଧି ଲାଗୁ ହେବା କାରଣରୁ ସଭା ନ କରି ଗ୍ରାମବାସୀମାନଙ୍କ ସହିତ ଆଲୋଚନା କରି ଉଭୟ ଅଧିକାରୀ ଫେରିଯାଇଛନ୍ତି l

ପ୍ରଥମେ ଢ଼ିଙ୍କିଆ ପଞ୍ଚାୟତ କାର୍ଯ୍ୟାଳୟ ଓ ପରେ ଫୁଲଖାଇ ମନ୍ଦିରରେ ପହଞ୍ଚି ଗ୍ରାମବାସୀଙ୍କ ସହ ଆଲୋଚନା କରିଥିଲେ । ସେଠାର ଗ୍ରାମର ବାତାବରଣ କିପରି ଅଛି ତାହାର ସ୍ଥିତି ମଧ୍ୟ ଅନୁଧ୍ୟାନ କରିଥିଲେ । ତେବେ ଏଠାରେ ଶାନ୍ତି ଫେରି ଆସିଛି,ନିର୍ବାଚନ ପରେ ଗ୍ରାମବାସୀଙ୍କ ସହ ଆଲୋଚନା କରି କାର୍ଯ୍ଯପନ୍ଥା ଗ୍ରହଣ କରାଯିବା ନେଇ ଉଭୟ ଏସପି ଓ ଜିଲ୍ଲାପାଳ କହିଛନ୍ତି ।

ଜଗତସିଂହପୁରରୁ ସୁଶାନ୍ତ କୁମାର ପାତ୍ର, ଇଟିଭି ଭାରତ