ବ୍ରହ୍ମପୁର: ଗାଁ ଦାଣ୍ଡରେ ଜଣେ ଯୁବକଙ୍କ ଗୋଡ ଓ ହାତ ବାନ୍ଧି ମାଡ଼ ମାରିବାର ଏକ ଭିଡ଼ିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ଏଭଳି ଘଟଣା ଦେଖିବାକୁ ମିଳିଛି ଗଞ୍ଜାମ ଜିଲ୍ଲା ସାନଖେମୁଣ୍ଡି ବ୍ଳକ ପାଟପୁର ଥାନା ଅନ୍ତର୍ଗତ ଜଗନ୍ନାଥପୁର ଅଞ୍ଚଳରେ ।
ଭିଡିଓରେ ଗ୍ରାମବାସୀଙ୍କ ଉପସ୍ଥିତିରେ ଜଣେ ଯୁବକଙ୍କୁ ଗଛରେ ବାନ୍ଧି କେତେକ ମାଡ଼ ମାରିଥିବା ବେଳେ ଏଥିରେ ମାଡ ଖାଇଥିବା ଯୁବକଙ୍କ ମୁହଁରୁ ରକ୍ତ ବାହାରୁଥିବା ଦେଖାଯାଇଛି । ଏପରିକି ଭାଇରାଲ ଭିଡିଓରେ ବିଭିନ୍ନ ପ୍ରଶ୍ନ କରାଯାଉଥିବା ଦେଖାଯାଇଛି ।
ସୂଚନା ଅନୁସାରେ, ମାଡ ଖାଇଥିବା ଯୁବକ ଜଣକ ଗାଁର ଜଣଙ୍କ ଘରେ ପଶିବାକୁ ଚେଷ୍ଟାକରୁଥିଲେ । ହେଲେ ଗାଁ ଲୋକେ ପଚରା ଉଚରା କରିବାରୁ ସେ ସନ୍ତୋଷଜନକ ଉତ୍ତର ଦେଇ ପାରିନଥିଲେ । ପରେ ଏଥିନେଇ ସନ୍ଦେହ ସୃଷ୍ଟି ହେବାରୁ ଗ୍ରାମବାସୀ ଯୁବକଜଣଙ୍କୁ ଗଛରେ ଦଉଡି ସାହାଯ୍ୟରେ ବାନ୍ଧି ମାଡ଼ ମାରିଥିଲେ । ଯାହାକୁ ନେଇ ଏବେ ଚର୍ଚ୍ଚା ଜୋର ଧରିଛି । ହେଲେ ଏଭଳି ଘଟଣାକୁ ବିଭିନ୍ନ ମହଲରେ ନିନ୍ଦା କରାଯାଇଛି ।
ବ୍ରହ୍ମପୁରରୁ ସମୀର ଆଚାର୍ଯ୍ୟ ଇଟିଭି ଭାରତ
