ଭଞ୍ଜନଗର: ଗଞ୍ଜାମ ଜିଲ୍ଲା ବେଲଗୁଣ୍ଠ ଫାଣ୍ଡି ଅନ୍ତର୍ଗତ ବୋଡ଼ାନଦୀରେ ଭାସିଯାଇ ଜଣେ ଯୁବକ ମୃତ । ମୃତ ଯୁବକ ଜଣକ ହେଲେ ଚଡୀୟାପଲ୍ଲୀ ଗ୍ରାମର ରାଜେନ୍ଦ୍ର ଲେଙ୍କା ।
ସେ ଇଲେକ୍ଟ୍ରି କାମ କରିବାକୁ ଆଜି ବୋଡ଼ା ନଦୀ ପାର ହୋଇ ଆମ୍ବପୁଆ ଯାଇଥିଲେ । ସେଠାରୁ ଫେରିବା ବେଳକୁ ନଦୀ ପାର ହେଉଥିବାବେଳେ ଏକ ପାଇପକୁ ଧରି ପାର ହେଉଥିବା ସମୟରେ ଗୋଡ ଖସିଯିବାରୁ ନଦୀର ପ୍ରଖର ସ୍ରୋତରେ ଭାସି ଯାଇଥିଲେ ।
ସ୍ଥାନୀୟ ଲୋକେ ବହୁ ଖୋଜାଖୋଜି କରିବା ପରେ ସେ ନମିଳିବାରୁ ଦମକଳ ବାହିନୀକୁ ଖବର ଦେଇଥିଲେ । ଦମକଳ ବାହିନୀ ଆସି ସର୍ଚ୍ଚ ଅପରେସନ ଆରମ୍ଭ କରିଥିଲେ । ଏହାପରେ କିଛି ଦୂରରେ ତାଙ୍କୁ ଉଦ୍ଧାର କରି ତୁରନ୍ତ ବେଲଗୁଣ୍ଠା ମେଡ଼ିକାଲକୁ ନେଇଥିଲେ । ପରେ ସେଠାରୁ ଭଞ୍ଜନଗର ମେଡ଼ିକାଲକୁ ସ୍ଥାନାନ୍ତର କରାଯାଇଥିଲା । ଭଞ୍ଜନଗର ମେଡ଼ିକାଲରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ।
ତେବେ ଏହି ଘଟଣାକୁ ନେଇ ଗ୍ରାମବାସୀ ମୃତକଙ୍କ ପରିବାରକୁ କ୍ଷତିପୂରଣ ସହ ବୋଡାନଦୀରେ ଡାଇଭର୍ସନ ତିଆରି ଦାବିରେ ରାଜେନ୍ଦ୍ରଙ୍କ ମୃତଦେହକୁ ବେଲଗୁଣ୍ଠା ମୁଖ୍ୟ ରାସ୍ତାରେ ରଖି ଟାୟାର ଜାଳି ରାସ୍ତାରୋକ କରିଥିଲେ । ଫଳରେ ଭଞ୍ଜନଗରରୁ ଭୁବନେଶ୍ବର ବସ ଚଳାଚଳ ଠପ ହୋଇଯାଇଥିଲା । ଖବର ପାଇ ଘଟଣା ସ୍ଥଳରେ ପୋଲିସ ଓ ପ୍ରଶାସନିକ ଅଧିକାରୀ ପହଞ୍ଚି ଲୋକଙ୍କୁ ବୁଝାସୁଝା କରିବା ପରେ ରାସ୍ତାରୋକ ହଟିଥିଲା । ଏହାପରେ ବସ ଚଳାଚଳ ସ୍ବାଭାବିକ ହୋଇଥିଲା ।
ଭଞ୍ଜନଗରରୁ ରଞ୍ଜନ ସ୍ବାଇଁ, ଇଟିଭି ଭାରତ
