ଭଞ୍ଜନଗର: ଗଞ୍ଜାମ ଜିଲ୍ଲା ଆସିକା ଚିନିକଳରେ ପୁଣି ଦେଖାଦେଇଛି ଶ୍ରମିକ ଅଶାନ୍ତି । ଏହି ଶିଳ୍ପର ବଟଲିଂ ପ୍ଲାଣ୍ଟରେ ବହୁ ବର୍ଷ ଧରି ମହିଳା ପୁରୁଷ ଶ୍ରମିକମାନେ କାର୍ଯ୍ୟ କରୁଥିଲେ ମଧ୍ୟ ଏଯାଏଁ ସେମାନଙ୍କୁ ସ୍ଥାୟୀ ନିଯୁକ୍ତି କରାଯାଉ ନାହିଁ କି ଇପିଏଫ ମଧ୍ୟ କଟାଯାଇ ନାହିଁ । ଏହାର ସମାଧାନ ପାଇଁ ମଧ୍ୟ କୌଣସି ପଦକ୍ଷେପ ଚିନିକଳ କର୍ତ୍ତୃପକ୍ଷ ଗ୍ରହଣ କରୁନଥିବା ଅଭିଯୋଗରେ ଶତାଧିକ ମହିଳା ପୁରୁଷ ଶ୍ରମିକ ଗତକାଲି(ଶୁକ୍ରବାର) ଫାଟକ ସମ୍ମୁଖରେ ଧାରଣାରେ ବସିଥିଲେ ।
ତେବେ ଧାରଣାରେ ବସିଥିବା ଶ୍ରମିକ ଓ ଚିନିକଳ କର୍ତ୍ତୃପକ୍ଷ ମଧ୍ୟରେ ଧସ୍ତା ଧସ୍ତି ପରିସ୍ଥିତି ସୃଷ୍ଟି ହୋଇଥିଲା । ସୂଚନାପାଇ ପୋଲିସ ସେଠାରେ ପହଞ୍ଚି ପରିସ୍ଥିତି ସୁଧାରିବାକୁ ଚେଷ୍ଟା କରିଥିଲା ଏବଂ କର୍ତ୍ତୃପକ୍ଷଙ୍କ ଗାଡି ଭଙ୍ଗା ରୁଜା କରିଥିବାରୁ ପୋଲିସ ଧାରଣାରେ ବସିଥିବା ଶ୍ରମିକଙ୍କୁ ମାଡ଼ ମାରିଥିଲା । ଯାହା ଫଳରେ କିଛି ଶ୍ରମିକ ଆହାତ ହୋଇ ଆସିକା ମେଡିକାଲରେ ଚିକିତ୍ସିତ ହେଉଛନ୍ତି ।
ଅନ୍ୟପଟେ ପୋଲିସ 7 ଜଣ ଶ୍ରମିକଙ୍କୁ ଅଟକ ରଖି ଅଧିକ ପଚରାଉଚରା କରୁଥିବା ଜଣାପଡିଛି ।
ଭଞ୍ଜନଗରରୁ ରଞ୍ଜନ ସ୍ୱାଇଁ, ଇଟିଭି ଭାରତ
