ଭଞ୍ଜନଗର: ଉପଜିଲ୍ଲାପାଳ ରାଜେନ୍ଦ୍ର ମିଞ୍ଜଙ୍କ ନିର୍ଦ୍ଦେଶରେ ମାପ ଓ ଓଜନ ବିଭାଗର ଚଢ଼ାଉ । ସୋମବାର ସୋରଡ଼ା ଏବଂ ବଡ଼ଗଡ଼ର ସମସ୍ତ ବ୍ୟାଙ୍କରେ ବ୍ୟବହୃତ ହେଉଥିବା ଓଜନ ଯନ୍ତ୍ର ଯାଞ୍ଚ କରାଯାଇଛି । ଏହି ଚଢ଼ାଉରେ ଦେଖାଯାଇଥିଲା ଗୋଟିଏ ବ୍ୟାଙ୍କରେ ବିନା ମାପକ ଓଜନ ଯନ୍ତ୍ର ବ୍ୟବହାର ଓ ଅନ୍ୟ ଦୁଇ ବ୍ୟାଙ୍କରେ ନବୀକରଣ ହୋଇନଥିବା ଓଜନ ଯନ୍ତ୍ର ବ୍ୟବହାର ହେଉଛି ।
ଏହି ଦୁଇଟି ବ୍ୟାଙ୍କକୁ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ଭାରତୀୟ ଷ୍ଟେଟ ବ୍ୟାଙ୍କକୁ 20 ହଜାର ଓ ଉକ୍ତ ଗ୍ରାମ୍ୟ ବ୍ୟାଙ୍କକୁ 10 ହଜାର ଏହି ଦୁଇଟି ବ୍ୟାଙ୍କରୁ 30ହଜାର ଜୋରିମନା ଆଦାୟ କରାଯାଇଛି । ସେହିପରି ଅନ୍ୟଗୋଟେ ବ୍ୟାଙ୍କକୁ 10 ହଜାର ଟଙ୍କାର ଜୋରିମନା ନୋଟିସ ଦିଆଯାଇଛି । ଏହା ସହିତ ସୋରଡ଼ା ଓ ବଡ଼ଗଡ଼ରେ ଥିବା ପେଟ୍ରୋଲ ପମ୍ପ ଗୁଡିକୁ ଯାଞ୍ଚ କରାଯାଇଥିଲା ସେଠାରେ କିଛି ଅନିୟମିତତା ହେଉଥିବା ଦେଖିବାକୁ ମିଳିନଥିଲା ।
ତେବେ ଆଜିର ଏହି ଚଢ଼ାଉରେ ସୋରଡ଼ା ତହସିଲଦାର ଅମର କୁମାର ବସନ୍ତରାୟ, ସହକାରୀ ନିୟନ୍ତ୍ରକ ବିନୟ କୁମାର ଦାଶ ଏବଂ ନିରୀକ୍ଷକ ବିଶ୍ୱଜିତ ପଣ୍ଡା ଅଂଶ ଗ୍ରହଣ କରିଥିଲେ । ଆଗକୁ ମଧ୍ୟ ଏହିପରି ଚଢ଼ାଉ ଜାରି ରହିବ ବୋଲି ସୂଚନା ମିଳିଛି ।
ଭଞ୍ଜନଗରରୁ ରଞ୍ଜନ ସ୍ୱାଇଁ, ଇଟିଭି ଭାରତ
