ବ୍ରହ୍ମପୁର: ଜିଲ୍ଲାର ବେଲଗୁଣ୍ଠା ବ୍ଳକ କୁମୁଣ୍ଡି ଗ୍ରାମ ପଞ୍ଚାୟତ ପରିଡା ବାଞ୍ଜରାପଦର ଠାରେ ଅନେକ ବର୍ଷ ଧରି ସୈରା ଜନଜାତିର ଆଦିବାସୀମାନେ ବସବାସ କରିଆସୁଥିଲେ । ଜଙ୍ଗଲ ବିଭାଗ ଘୁମୁସର ଡିଭିଜନ ଡିଏଫ୍ଓ ଓ କୁମୁଣ୍ଡି ବନ ସୁରକ୍ଷା ସମିତିର କର୍ମଚାରୀ ସେମାନଙ୍କ ବାସସ୍ଥଳୀକୁ ଭାଙ୍ଗିଦେବା ସହ ବାସଗୃହକୁ ପୋଡ଼ିଦେବା ମାମଲାର ଆଜି ଗୁରୁତ୍ବପୂର୍ଣ୍ଣ ରାୟ ପ୍ରକାଶ କରିଛନ୍ତି ରାଜ୍ୟ ମାନବାଧିକାର କମିଶନ ।
ମାମଲାର ଯଥାବିଧି ବିଚାର କରି ପ୍ରତ୍ୟେକ କ୍ଷତିଗ୍ରସ୍ତ ପରିବାରକୁ ଏକ ଲକ୍ଷ ଟଙ୍କା ଲେଖାଏଁ ଗଞ୍ଜାମ ଜିଲ୍ଲାପାଳ କ୍ଷତିପୂରଣ ପ୍ରଦାନ କରିବାକୁ କହିଛନ୍ତି ମାନବାଧିକାର କମିଶନ । ଓଏଚ୍ଆର୍ସିର କେସ ନଂ°-୨୧୭୫/୨୦୧୮ ଅନୁଯାୟୀ ସେମାନେ ବସବାସ କରୁଥିବା କୁମୁଣ୍ଡି ଗ୍ରାମର ପରିଡା ବାଞ୍ଜରା ରେଭିନ୍ୟୁ ପ୍ଳଟ ନଂ° ୯୨ ଓ ୧୦୧ ଖାତା ନଂ° ୨୨୬ ରେ ସେମାନଙ୍କୁ ପୁନଃବସତି ସ୍ଥାପନ କରିବା ନିମନ୍ତେ ଜିଲ୍ଲା ପ୍ରଶାସନ ଓ ସ୍ଥାନୀୟ ପୋଲିସ ସଂପୂର୍ଣ୍ଣ ସୁରକ୍ଷା ପ୍ରଦାନ କରିବେ । ଏଥିସହିତ ଜଙ୍ଗଲ ଜମି ଅଧିକାର ଆଇନ ୨୦୦୬ ବଳରେ ସେମାନଙ୍କ ଦରଖାସ୍ତକୁ ପ୍ରଶାସନ ଗୁରୁତ୍ବ ଦେଇ ବିଚାର କରି ଆବଶ୍ୟକୀୟ ପଦକ୍ଷେପ ନେବା ପାଇଁ ନିର୍ଦ୍ଦେଶନାମା ମଧ୍ୟ ଦିଆଯାଇଛି । ଓଡିଶା କୃଷକ ସଭା ପକ୍ଷରୁ ଆୟୋଜିତ ସାମ୍ବାଦିକ ସମ୍ମିଳନୀରେ ସମସ୍ତ ସୂଚନା ପ୍ରଦାନ କରିଛି ।
ଗତ ୨୦୧୮ ମସିହା ଅଗଷ୍ଟ ମାସରେ ଏହି ଘଟଣା ଘଟିବା ପରେ ମାନବାଧିକାର କର୍ମୀ ପ୍ରଦୀପ୍ତ ନାୟକ ଏହି ମାମଲାକୁ ପରିଚାଳନା କରି ଆସୁଥିଲେ । ବ୍ରହ୍ମପୁରସ୍ଥିତ ଶହୀଦ ଲକ୍ଷ୍ମଣ ନାୟକ କମ୍ୟୁନିଟି ହଲ ପରିସରରେ ଆୟୋଜିତ ସାମ୍ବାଦିକ ସମ୍ମିଳନୀରେ ମାନବାଧିକାର କର୍ମୀ ଶ୍ରୀ ନାୟକଙ୍କ ସମେତ ଗଞ୍ଜାମ ଜିଲ୍ଲା କମିଟିର ନେତା କୈଳାସ ଷଡ଼ଙ୍ଗୀ ,ବାସୁଦେବ ଗୈଡ ଏବଂ ହରେକୃଷ୍ଣ ରେଡି ପ୍ରମୁଖ ଙ୍କ ସମେତ କ୍ଷତିଗ୍ରସ୍ତ ପରିବାର ର ସଦସ୍ୟ ମାନେ ଉପସ୍ଥିତ ଥିଲେ ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
