ବ୍ରହ୍ମପୁର: ଗଞ୍ଜାମ ଜିଲ୍ଲାରେ ଧାନ ମଣ୍ଡିର କାର୍ଯ୍ୟକୁ ନେଇ ଚାଷୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି । ମଣ୍ଡିରେ ଚାଷୀଙ୍କ ଧାନ ପଡିରହିଥିବା ବେଳେ ମିଳିଥିବା ଟୋକନ ଅବଧି ଶେଷ ହେଉଥିବାରୁ ଏହାକୁ ନେଇ ପ୍ରତିବାଦ କରି ଶେଷରେ ରାଜରାସ୍ତାକୁ ଓହ୍ଲାଇଛନ୍ତି ଚାଷୀ । ସରକାରୀ ମଣ୍ଡିରେ ଧାନ ନେବାରେ ଟାଳଟୁଳ ନୀତି ଅବଲମ୍ବନ କରାଯାଉଥିବା ପ୍ରତିବାଦରେ ଗଞ୍ଜାମ ଜିଲ୍ଲାର ଛତ୍ରପୁର ବ୍ଲକ ଅନ୍ତର୍ଗତ ବଡମାଧପୁର ପଞ୍ଚାୟତରେ ପ୍ରାୟ ଚାରୋଟି ଗ୍ରାମର ଚାଷୀ ଟାୟର ଜାଳି ରାସ୍ତା ଅବରୋଧ କରିଛନ୍ତି ।
ଅଭିଯୋଗ ଅନୁସାରେ ଛତ୍ରପୁର ବ୍ଲକ ବଡମାଧପୁର ପଞ୍ଚାୟତରେ ମୋଟ ୪୪୦ ଜଣ ଚାଷୀ ମଣ୍ଡିରେ ଧାନ ବିକିବା ପାଇଁ ପଞ୍ଜିକରଣ କରିଥିବାବେଳେ ସେଥିରୁ ମାତ୍ର ୮୦ ରୁ ଶହେ ଜଣ ଚାଷୀଙ୍କ ଧାନ ସଂଗ୍ରହ ହୋଇଛି ।
ଅନ୍ୟ ଚାଷୀଙ୍କୁ ମିଳିଥିବା ଟୋକନ୍ ଅବଧି ଶେଷ ହେଉଥିବାରୁ ଚିନ୍ତାରେ ଚାଷୀକୂଳ । ବିଶେଷକରି ପ୍ରାୟ 4 ହଜାର କୁଇଣ୍ଟାଲ ଧାନ ପଞ୍ଚାୟତରେ ରହିଥିବା ବେଳେ ଏ ନେଇ ଗ୍ରାମବାସୀ ମାନେ ଜିଲ୍ଲାପାଳଙ୍କ ଠାରୁ ଆରମ୍ଭ କରି ଜିଲ୍ଲା ଯୋଗାଣ ଅଧିକାରୀ ଓ ନିର୍ବାଚିତ ପ୍ରତିନିଧିଙ୍କୁ ନିବେଦନ କରିଥିବାବେଳେ କୌଣସି ସୁଫଳ ମିଳିନଥିଲା ।
ଫଳରେ ଚାଷୀ ମାନେ ବାଧ୍ୟ ହୋଇ ବିକ୍ଷୋଭ କରିବା ସହିତ ତୁରନ୍ତ ଏଥିପ୍ରତି ଦୃଷ୍ଟି ନେଦେବା ପର୍ଯ୍ୟନ୍ତ ଆନ୍ଦୋଳନ ଜାରି ରହିବ ଚେତାବନୀ ଦେଇଛନ୍ତି । ମୁଖ୍ୟତଃ ପଞ୍ଚାୟତର ସୋସାଇଟି ସଂପାଦକ , ମିଲର ଏବଂ ପ୍ରଶାସନ ପକ୍ଷରୁ ସମନ୍ବୟର ଅଭାବ କାରଣରୁ ଏପରି ଘଟୁଥିବା କହିଛନ୍ତି ଚାଷୀ ।
ଏହି ପଞ୍ଚାୟତର ବରଙ୍ଗ , ମାଧପୁର , ନୂଆପଲ୍ଲୀ ଓ ରଙ୍ଗମାଟିଆ ଭଳି ଗ୍ରାମରେ ଆଦୌ ସଂଗ୍ରହ ହୋଇନଥିବା ଅଭିଯୋଗ ହୋଇଛି। ଏଭଳି ସ୍ଥିତିରେ ପ୍ରଶାସନ ପକ୍ଷରୁ ଦୃଢ ପଦକ୍ଷେପ ନନେଲେ ଆଗାମୀ ଦିନରେ ବ୍ୟାପକ ଆନ୍ଦୋଳନ କରାଯିବାକୁ ଚେତାବନୀ ଦେଇଛନ୍ତି ଚାଷୀମାନେ ।
ବ୍ରହ୍ମପୁରରୁ ସମୀର ଆଚାର୍ଯ୍ୟ ଇଟିଭି ଭାରତ
