ବ୍ରହ୍ମପୁର: ୧୯୯୯ ମସିହା ଜୁଲାଇ ୨୬ ତାରିଖ । କାର୍ଗିଲ ପାହାଡ଼ ଉପରେ ଶତ୍ରୁପକ୍ଷ ସହ ଯୁଦ୍ଧରେ ନିଜକୁ ସମର୍ପିତ କରି ଦେଶକୁ ଚଖାଇଥିଲେ ବିଜୟ ସ୍ବାଦ । କାର୍ଗିଲ ଉଚ୍ଚ ପାହାଡ଼ ଶୀର୍ଷରେ ଉଡ଼ାଇଥିଲେ ତ୍ରିରଙ୍ଗା । ଏହି ଭୟଙ୍କର ଯୁଦ୍ଧରେ ଦେଶର ୫୨୭ ଜଣ ଶହୀଦ ହୋଇଥିଲେ । ଯେଉଁଥିରେ ୧୦ ଜଣ ଓଡ଼ିଆ ଯବାନ ଥିଲେ । ସେମାନଙ୍କ ମଧ୍ୟରେ ଗଞ୍ଜାମ ଜିଲ୍ଲାର କୁକୁଡାଖଣ୍ଡି ବ୍ଳକର ଜଗଦଳପୁର ଗ୍ରାମର ଶହୀଦ ଶ୍ରୀନିବାସ ପାତ୍ର । ଏହି ଘଟଣାକୁ ୨୪ ବର୍ଷ ପୁରିଗଲା । ହେଲେ ଆଜି ବି ବୀର ପୁଅଙ୍କୁ ଝୁରୁଛି ଜନ୍ମମାଟି । ଶହୀଦ ଶ୍ରୀନିବାସ ପାତ୍ରଙ୍କ ଜନ୍ମମାଟିରେ ପାଳିତ ହୋଇଛି କାର୍ଗିଲ ବିଜୟ ଦିବସ ।
ଏହା ମଧ୍ୟ ପଢ଼ନ୍ତୁ: ଦେଶବ୍ୟାପୀ କାର୍ଗିଲ ବିଜୟ ଦିବସ, ଓଡ଼ିଆ ବୀରଙ୍କୁ ଝୁରିଲା ଭୁବନେଶ୍ୱର
ପ୍ରତିବର୍ଷ ଜୁଲାଇ 26 ତାରିଖରେ ଶହୀଦ ଶ୍ରୀନିବାସ ପାତ୍ରଙ୍କ ଜନ୍ମମାଟିରେ କାର୍ଗିଲ ବିଜୟ ଦିବସ ପାଳନ କରାଯାଇ ଆସୁଅଛି । ଶ୍ରୀନିବାସଙ୍କ ବଳିଦାନ ଓ ସାହସିକତାକୁ ମନେ ପକାଇ ତାଙ୍କ ସ୍ମୃତି ସ୍ତମ୍ଭରେ ଶ୍ରଦ୍ଧାଞ୍ଜଳି ଦିଆଯାଇଥିଲା । ଏହି ଅବସରରେ ଗ୍ରାମର ଆବାଳ ବୃଦ୍ଧ ବନିତା ସମସ୍ତେ ଏକାଠି ହୋଇ ଶହୀଦ ଶ୍ରୀନିବାସଙ୍କୁ ମନେପକାଇଥିଲେ । 'ଶ୍ରୀନିବାସ ଅମର ରହେ' ଧ୍ବନୀରେ ପ୍ରକମ୍ପିତ ହୋଇଉଠିଥିଲା ଚାରିଦିଗ । ଏନେଇ ଗ୍ରାମବାସୀ କହିଛନ୍ତି, " ଶହୀଦଙ୍କ ଶ୍ରୀନିବାସଙ୍କ ପାଇଁ ଜଗଦଳପୁର ଗାଁ ଆଜି ଗର୍ବିତ । ଦେଶ ପାଇଁ ତାଙ୍କ ବଳିଦାନ ଅତୁଳନୀୟ । ଆଜିର ଦିନଟି ବୀର ପୁଅଙ୍କ ପ୍ରତିଟି ତ୍ୟାଗକୁ ସୂଚାଉଛି । ତେଣୁ ଜଗଦଳପୁର ଗ୍ରାମବାସୀଙ୍କ ମନରେ ଶ୍ରୀନିବାସ ସବୁବେଳେ ଅମର ହୋଇ ରହିଛନ୍ତି ।"
ଏହା ମଧ୍ୟ ପଢ଼ନ୍ତୁ: 24 years of Kargil War: ପ୍ରଥମ ଓଡ଼ିଆ ଶହୀଦ ଯବାନ ଶ୍ରୀନିବାସ, ବିବାହର ୩ ଦିନରେ ବାହାରିଥିଲେ କର୍ମକ୍ଷେତ୍ର
ଏହା ମଧ୍ୟ ପଢ଼ନ୍ତୁ: କାର୍ଗିଲ ବିଜୟ ଦିବସ, ଓଡ଼ିଆ ଶହୀଦଙ୍କୁ ମନେ ପକାଇଲେ ଲୋକେ
ଅନ୍ୟପଟେ ଶହୀଦଙ୍କ ଗ୍ରାମକୁ ଅବହେଳା କରାଯାଇଥିବା ଗ୍ରାମବାସୀ ଅଭିଯୋଗ କରିଛନ୍ତି । ଗାଁକୁ ଭଲ ରାସ୍ତା ଖଣ୍ଡେ ନଥିବା ବେଳେ ଶହୀଦ ଶ୍ରୀନିବାସଙ୍କ ପ୍ରତି ମଧ୍ୟ ସ୍ଥାନୀୟ ପ୍ରଶାସନ ଅବେହେଳା କରିଥିବା ଅଭିଯୋଗ ହୋଇଛି । ତାଙ୍କ ସ୍ମୃତି ସ୍ତମ୍ଭ ପରିବେଶର ଉନ୍ନତି କରିବା ଲାଗି ଗ୍ରାମବାସୀ ଦାବି କରିଛନ୍ତି । ଆୟୋଜିତ କାର୍ଯ୍ୟକ୍ରମରେ ସ୍ଥାନୀୟ ପ୍ରଶାସନର ଅଧିକାରୀଙ୍କ ସହିତ ନିର୍ବାଚିତ ପ୍ରତିନିଧି, ବୁଦ୍ଧିଜୀବୀ, ଗ୍ରାମବାସୀ ଏବଂ ଛାତ୍ରଛାତ୍ରୀ ମାନେ ଉପସ୍ଥିତ ରହିଥିଲେ ।
ଇଟିଭି ଭାରତ, ବ୍ରହ୍ମପୁର
