ବ୍ରହ୍ମପୁର: ରାତି ଅଧରେ ଜଣେ ବିବାହିତା ମହିଳାଙ୍କ ଘରୁ ଧରାପଡିଲା ଯୁବକ । ଏହାପରେ ସେହି ରାତି ଅଧରେ ହିଁ ଗାଁରେ ବସିଲା କଙ୍ଗାରୁ କୋର୍ଟ । ଗାଁ ଲୋକେ କୋର୍ଟରେ ବିଚାର କଲେ ଆଉ ଧରାପଡିଥିବା ଯୁବକକୁ ଦଣ୍ଡ ମଧ୍ୟ ଦେଲେ । ଗାଁଲୋକେ ଯୁବକଙ୍କୁ ନିର୍ଧୁମ ଛେଚିଲେ, ଲଣ୍ଡା କଲେ, ମୁହଁରେ ଚୂନ କାଳି ବୋଳି ଚପଲ ମାଳ ପିନ୍ଧାଇ ଗାଁରେ ବୁଲାଇଲେ । ଶେଷରେ ବିବାହିତା ମହିଳା ଜଣକ ଲୋକଲଜ୍ୟା ସହିନପାରି ବିଷ ପିଇ ଆତ୍ମହତ୍ୟା କଲେ । ଏଭଳି ଏକ ଅଭାବନୀୟ ଘଟଣା ବିହାର ନୁହେଁ ଘଟିଛି ଓଡିଶାର ଗଞ୍ଜାମ ଜିଲ୍ଲା ଖଲ୍ଲିକୋଟ ଥାନା ଅନ୍ତର୍ଗତ ତେନ୍ତୁଳିଆପଲ୍ଲୀ ଗାଁରେ ।
ଘଟଣାରୁ ପ୍ରକାଶ, ଗତକାଲି(ଗୁରୁବାର) ରାତିରେ ଖଲ୍ଲିକୋଟ ଥାନା ଅନ୍ତର୍ଗତ ତେନ୍ତୁଳିଆପଲ୍ଲୀ ଗାଁର ଜଣେ ବିବାହିତ ମହିଳାଙ୍କ ଘରକୁ ଯାଇଥିଲେ ବାଗଲପୁର ଗାଁର ସୁଶାନ୍ତ ସ୍ବାଇଁ । ପୂର୍ବରୁ ଛକି ରହିଥିବା ଗାଁ ଲୋକେ ଯୁବକକୁ କାବୁ କରିଥିଲେ । ଅଭିଯୋଗ ଥିଲା ସୁଶାନ୍ତ କୁଆଡେ ଦୀର୍ଘ ଦିନ ହେଲା ସଂପୃକ୍ତ ବିବାହିତ ମହିଳାଙ୍କ ସହ ଅନୈତିକ ସମ୍ପର୍କ ରଖିଆସୁଥିଲେ । ରାତି ଅଧରେ ଗାଁରେ ବସିଲା କଙ୍ଗାରୁ କୋର୍ଟ । କୋର୍ଟରେ ନିଷ୍ପତ୍ତି ହେଲା, ତୁରନ୍ତ ଦଣ୍ଡବିଧାନ ମଧ୍ୟ ହେଲା । ସୁଶାନ୍ତକୁ କେତେକ ଲୋକ ନିର୍ଧୁମ ଛେଚିଲେ, ଲଣ୍ଡା କଲେ, ମୁହଁରେ ଚୂନ କାଳି ବୋଳି ଚପଲ ମାଳ ପିନ୍ଧାଇ ଗାଁରେ ବୁଲାଇଲେ । ପୋଲିସ ଖବର ପାଇଁ ଗାଁ ଲୋକଙ୍କ କବଳରୁ ଯୁକକୁ ଉଦ୍ଧାର କରିଥିଲା ।
ହେଲେ କଥା ଏତିକିରେ ସରିନଥିଲା । ଏହି ଘଟଣା ବିଜୁଳି ବେଗରେ ପ୍ରଚାରିତ ହେବା ପରେ ସଂପୃକ୍ତ ମହିଳାଙ୍କୁ ଅନେକ ଟାହି ଟାପରା କରିଥିଲେ । ଶେଷରେ ଲୋକଲଜ୍ୟା ସହି ନପାରି ସଂପୃକ୍ତ ବିବାହିତା ମହିଳା ଜଣଙ୍କ ବିଷ ପିଇ ଦେଇଥିଲେ । ପରିବାର ଲୋକେ ଗୁରୁତର ଅବସ୍ଥାରେ ମହିଳାଙ୍କୁ ଖଲ୍ଲିକୋଟ ମେଡିକାଲକୁ ଅଣିଥିଲେ । ଡାକ୍ତର ମହିଳାଙ୍କୁ ମୃତ ଘୋଷଣା କରିଛନ୍ତି । ପୋଲିସ ମହିଳାଙ୍କ ଶବ ଜବତ କରି ଘଟଣାର ଛାନଭିନ କରୁଛି ।
ଇଟିଭି ଭାରତ, ବ୍ରହ୍ମପୁର
