ବ୍ରହ୍ମପୁର: ରାଜ୍ୟର ଏକ ପ୍ରସିଦ୍ଧ ଶୁଖୁଆ ହାଟ କୁହାଯାଉଥିବା ଗଞ୍ଜାମ ଜିଲ୍ଲାର ହୁମ୍ମା ହାଟରେ ବେଆଇନ ଟିକସ ଆଦାୟ କରାଯାଉଥିବା ଘଟଣାକୁ ବିରୋଧ କରାଯାଇଛି ।ଏହାକୁ ନେଇ ଉପଜିଲ୍ଲାପାଳଙ୍କୁ ଅଭିଯୋଗ ଜଣାଇଛନ୍ତି ବ୍ୟବସାୟୀ । ରାଜ୍ୟର ବିଭିନ୍ନ ଅଞ୍ଚଳ ସମେତ ପଡୋଶୀ ରାଜ୍ୟରୁ ଏଠାକୁ ବ୍ୟବସାୟୀମାନେ ଆସି ପ୍ରତ୍ୟେକ ସପ୍ତାହରେ ଶୁଖୁଆ ବିକ୍ରି କରିଥାନ୍ତି ।
ମାତ୍ର ଏଠାକାର ବ୍ୟବସାୟୀଙ୍କଠାରୁ ଟିକସ ଆଦାୟ କରି ଶୋଷଣ କରାଯାଉଥିବା ଅଭିଯୋଗ ହେବା ସହ ପ୍ରତିବାଦ କଲେ ଧମକ ଚମକଠାରୁ ଆରମ୍ଭ କରି ଶୁଖୁଆକୁ ଫୋପାଡି ଦିଆଯାଉଥିବା କହିଛନ୍ତି ବ୍ୟବସାୟୀ । ଏହାସହ ଗତ ଜାନୁଆରୀ ୧୨ ତାରିଖରେ ଜଣେ ମହିଳାଙ୍କ ସମେତ ୨ ଜଣଙ୍କୁ ମାଡ ମରାଯାଇଥିବା ଭଳି ଗୁରୁତର ଅଭିଯୋଗ ମଧ୍ୟ ହୋଇଛି । ଏନେଇ ହୁମ୍ମା ଫାଣ୍ଡିରେ ଅଭିଯୋଗ କରି କୌଣସି ସୁଫଳ ମିଳିନଥିବା ବେଳେ ଶେଷରେ ଶୁଖୁଆ ବ୍ୟବସାୟୀମାନେ ଛତ୍ରପୁର ଉପଜିଲ୍ଲାପାଳଙ୍କ କାର୍ଯ୍ୟାଳୟକୁ ଯାଇ ଅଭିଯୋଗ କରିଛନ୍ତି ।
ଏପରିକି ଏଠାକୁ ଆସୁଥିବା ପିକଅପ୍ ଭ୍ୟାନ୍ଠାରୁ ଆରମ୍ଭ କରି ଟ୍ରକଗୁଡିକଠାରୁ ମଧ୍ୟ ଚଢା ଦରରେ ଟିକସ ଆଦାୟ ହେଉଥିବାରୁ ପ୍ରଶାସନ ଗୁରୁତ୍ବ ଦେବାକୁ ମହିଳା ବ୍ୟବସାୟୀ ଅନୁରୋଧ କରିଛନ୍ତି ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
