ଭଞ୍ଜନଗର: ସୋରଡା ଥାନା ନିକଟ ନୂଆଗଡ ଗ୍ରାମ ଋଷିକୁଲ୍ୟା ନଦୀ ବାଲିପଠାରୁ ଏକ ମୁଣ୍ଡ ବିହୀନ ମୃତଦେହ ଉଦ୍ଧାର ଘଟଣା। ଧରାପଡ଼ିଯିବା ଭୟରେ ମୁଣ୍ଡଟିକୁ କାଟି ଅନ୍ୟ କେଉ ସ୍ଥାନରେ ଲୁଚାଇଦେଇଥିଲା ହତ୍ୟାକାରୀ । ହତ୍ୟାର ଶିକାର ହୋଇଥିଲେ ଭଗବାନ ନାୟକ । ତେବେ ହତ୍ୟାକାରୀ ଆଉ କେହି ନଥିଲେ, ନିଜ ସ୍ତ୍ରୀ ଓ ଶାଶୁ ଶଶୂର ତାଙ୍କୁ ମାରି ନଦୀ ବାଲିପଠାରେ ପୋତି ଦେଇଥିଲେ ।
ଆସିକା SDPO ଉମା ଶଙ୍କର ସିଂଙ୍କ ସୂଚନା ମୁତାବିକ, ଭଗବାନ ନାୟକ ଆଠ ବର୍ଷ ତଳେ ଝିଲି ନାୟକଙ୍କୁ ବିବାହ କରିଥିଲେ । ସେମାନଙ୍କର ଦୁଇଟି ସନ୍ତାନ ମଧ୍ୟ ଅଛି । କିନ୍ତୁ ଅଧିକାଂଶ ସମୟରେ ସ୍ଵାମୀ ସ୍ତ୍ରୀ ମଧ୍ୟରେ କଳହ ଲାଗି ରହୁଥିଲା । ଯାହା ଫଳରେ ସ୍ବାମୀକୁ ରାସ୍ତାରୁ ହଟାଇବାକୁ ପଛେଇଲାନି ସ୍ତ୍ରୀ । ନିଜ ବାପା ମା’ଙ୍କ ସାହାରା ନେଇ ଗତ 18 ତାରିଖ ରାତିରେ ଭଗବାନକୁ ଏକ କାତି ସାହାଯ୍ୟରେ ହତ୍ୟା କରି ପ୍ରମାଣ ନଷ୍ଟ କରିବା ପାଇଁ ନୂଆଗଡ ନଦୀ ବାଲି ପଠାରେ ଶରୀରକୁ ପୋତିଦେଇଥିଲେ ଏବଂ ମୁଣ୍ଡଟିକୁ ଅନ୍ୟତ୍ର ପୋତିଦେଇଥିଲେ ।
ଗତ 22 ତାରିଖରେ ପୋଲିସ ମୁଣ୍ଡ ଓ ଶରୀରକୁ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇ ତଦନ୍ତ ଆରମ୍ଭ କରିଥିଲା । ଶେଷରେ ଭଗବାନର ସ୍ତ୍ରୀ, ଶାଶୂ, ଶଶୂର ମିଶି ହତ୍ୟା କରିଥିବା ସ୍ପଷ୍ଟ ହୋଇଥିଲା ଏବଂ ହାତ୍ୟରେ ବ୍ୟବହୃତ କାତିକୁ ମଧ୍ୟ ଜବତ କରିଛି ପୋଲିସ । ଆଜି(ଶନିବାର) ଅଭିଯୁକ୍ତମାନଙ୍କୁ କୋର୍ଟ ଚାଲାଣ କରାଯାଇଥିବା ସୂଚନା ଦେଇଛନ୍ତି ଆସିକା SDPO ।
ଭଞ୍ଜନଗରରୁ ରଞ୍ଜନ ସ୍ବାଇଁ, ଇଟିଭି ଭାରତ
