ବ୍ରହ୍ମପୁର: ଗଞ୍ଜାମ ଜିଲ୍ଲାର ଗୋପାଳପୁର ଥାନା ଅନ୍ତର୍ଗତ ମନସୁରକୋଟା ଗ୍ରାମରେ ହତ୍ୟାକାଣ୍ଡ । ସ୍ତ୍ରୀକୁ କାଠ ଫାଳିଆରେ ଆକ୍ରମଣ କରି ହତ୍ୟା କରିଛି ସ୍ବାମୀ । ପାରିବାରିକ କଳହକୁ କେନ୍ଦ୍ର କରି ସ୍ବାମୀ ତନୁ ଦାସ ନିଜ ସ୍ତ୍ରୀ ନାନୁ କୁ ଏଭଳି ଆକ୍ରମଣ କରିଥିବା ବେଳେ ପୋଲିସ ଅଭିଯୁକ୍ତ ତନୁକୁ ଗିରଫ କରି କୋର୍ଟ ଚାଲାଣ କରିଛି ।
କୌଣସି କାରଣକୁ କେନ୍ଦ୍ର କରି ଉଭୟଙ୍କ ମଧ୍ୟରେ ଝଗଡା ହୋଇଥିଲା ଯାହାକି ଏତେ ଉଗ୍ର ରୂପ ନେଇଥିଲା ଯେ ତନୁ ରୋଷେଇ ଘରେ ଥିବା ଏକ କାଠ ଫାଳିଆ ଆଣି ସ୍ତ୍ରୀର ମୁଣ୍ଡର ପଛପଟକୁ ଅତର୍କିତ ଭାବରେ ଆକ୍ରମଣ କରିଥିଲା। ଯେଉଁଥିରେ ମହିଳା ଜଣଙ୍କ ଚେତାଶୂନ୍ୟ ହୋଇ ତଳେ ପଡିଯାଇଥିଲେ ।
ଏହି ସମୟରେ ଘରେ ଥିବା ମାଆ ଓ ଭାଇ ଘଟଣାସ୍ଥଳରେ ପହଞ୍ଚି ତନୁକୁ କାବୁ କରିବା ସହ ଗାଁ ଲୋକଙ୍କୁ ଖବର ଦେଇଥିଲେ । ଆହତ ନାନୁଙ୍କୁ ଅଧିକ ଚିକିତ୍ସା ପାଇଁ ବ୍ରହ୍ମପୁର ଏମ୍.କେ.ସି.ଜି ମେଡିକାଲରେ ଭର୍ତ୍ତି କରାଯାଇଥିବା ବେଳେ ଚିକିତ୍ସାଧିନ ଅବସ୍ଥାରେ ତାଙ୍କର ମୃତ୍ୟୁ ଘଟିଥିଲା । ମୃତ ମହିଳାଙ୍କର ଏକ ଦଶ ମାସର କନ୍ୟା ସନ୍ତାନ ରହିଥିବା ବେଳେ ଉଭୟଙ୍କର ଗତ ଦେଢ ବର୍ଷ ତଳେ ବିବାହ ହୋଇଥିଲା ।
ମୃତ ମହିଳାଙ୍କ ଘର ପୁରୀ ଚକ୍ରତୀର୍ଥ ରୋଡରେ ହୋଇଥିବା ବେଳେ ଏହି ଘଟଣା ଜଣାପଡିବା ପରେ ପରିବାର ବର୍ଗ ବ୍ରହ୍ମପୁରରେ ପହଞ୍ଚି ଥାନାରେ ଅଭିଯୋଗ କରିଛନ୍ତି । ଅନ୍ୟପଟେ ହତ୍ୟାକାରୀ ସ୍ବାମୀ ଏବଂ ପରିବାର ପକ୍ଷରୁ ଅଧିକ ଯୌତୁକ ଦାବି କରି ବାରମ୍ବାର ଶାରୀରିକ ସହ ମାନସିକ ନିର୍ଯାତନା ଦିଆଯାଇଥିବା ଅଭିଯୋଗ ହୋଇଛି ।
ସେପେଟ ହତ୍ୟାକାଣ୍ଡ ରେ ବ୍ୟବହୃତ କାଠ ଫାଳିଆକୁ ଜବତ କରାଯିବା ସହ ମୃତଦେହ ବ୍ୟବଚ୍ଛେଦ ପରେ ପରିବାର ବର୍ଗଙ୍କୁ ହସ୍ତାନ୍ତର କରାଯାଇଛି ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
