ଭଞ୍ଜନଗର: କୋଭିଡ ଆମ୍ବୁଲାନ୍ସ ଓ ଯାତ୍ରୀ ବାହୀ ଅଟୋ ମୁହାଁମୁହିଁ ଧକ୍କା । ଏଭଳି ଏକ ଘଟଣା ଘଟିଛି ଗଞ୍ଜାମ ଜିଲ୍ଲା ଆସିକା ଥାନା ଅଧିନ ନିମିନା ମୁଖ୍ୟ ରାସ୍ତାରେ । ଦୁର୍ଘଟଣାରେ 3ଜଣ ଗୁରୁତର ହୋଇଥିବା ବେଳେ 3 ଜଣ ଆହାତ ହୋଇଛନ୍ତି । ଗୁରୁତରଙ୍କୁ ଆସିକା ମେଡିକାଲରେ ଭର୍ତ୍ତି କରାଯାଇଛି ।
ଘଟଣା ସ୍ଥଳରେ ଅଟୋ ଡ୍ରାଇଭର ବଳରାମ ଗୌଡଙ୍କ ଗୋଡ଼ ଭାଙ୍ଗି ଥିବା ବେଳେ ଅନ୍ୟ ଜଣେ ମହିଳା ଗୁରୁତର ଥିବାରୁ ସେମାନଙ୍କୁ ଚିକିତ୍ସା ପାଇଁ ବ୍ରହ୍ମପୁର ସ୍ଥାନାନ୍ତରିତ କରାଯାଇଛି । ଖବର ପାଇ ଆସିକା ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।
ମିଳିଥିବା ସୂଚନା ଅନୁଯାୟୀ ବ୍ରହ୍ମପୁର ବଡ଼ ମେଡିକାଲରୁ ସ୍ବାସ୍ଥ୍ୟ ପରିକ୍ଷା କରି ଭଞ୍ଜନଗର ବ୍ଲକ ଗୋଲାପଡା ପଞ୍ଚାୟତ ହରିପୁର ଗ୍ରାମର ମାନସିକ ରୋଗୀ ଭାରତୀ ପ୍ରଧାନ ତାଙ୍କ ଆଠ ବର୍ଷର ଝିଅ ସୁଇଟି ପ୍ରଧାନ, ତିନି ବର୍ଷର ପୁଅ ହିମାଶୁଂ ପ୍ରଧାନ ଓ ଆଠ ମାସର ପୁଅ ପ୍ରିୟାଂଶୁ ପ୍ରଧାନଙ୍କୁ ଧରି ନିଜ ସମ୍ପର୍କୀୟ ଭାଇ ସହିତ ଫେରୁଥିଲେ । ଏହି ସମୟରେ ଭଞ୍ଜନଗର ପଟୁ ଏକ କୋଭିଡ ଆମ୍ଵୁଲାନ୍ସ ବୋଲେରୋ ଗାଡି ଦ୍ରୁତ ଗତିରେ ଆସି ବିପରୀତ ଦିଗରେ ଆସୁଥିବା ଅଟୋକୁ ମୁହାଁମୁହିଁ ଧକ୍କା ଦେଇଥିଲା । ଏଥିରେ ଅନ୍ୟ ଯାତ୍ରୀ ମାନେ ସାମାନ୍ୟ ଆଘାତ ହୋଇ ଥିବା ଜଣାପଡିଛି ।
ଭଞ୍ଜନଗରରୁ ରଞ୍ଜନ ସ୍ବାଇଁ , ଇଟିଭି ଭାରତ
