ବ୍ରହ୍ମପୁର: ଗଜପତି ଜିଲ୍ଲାରୁ ଉତ୍ତରପ୍ରଦେଶ ଚାଲାଣ ହେଉଥିବା ବେଳେ ବ୍ରହ୍ମପୁରରେ ଧରା ପଡିଛି ଗଞ୍ଜେଇ ବୋଝେଇ ଟ୍ରକ । ଏହି ଟ୍ରକରେ ପ୍ରାୟ ୨୪୦ କିଲୋଗ୍ରାମ ଓଜନର ଗଞ୍ଜେଇ ଉତ୍ତରପ୍ରଦେଶ ଚାଲାଣ ହେଉଥିବା ସୂଚନା ମିଳିଛି । ଚଢ଼ାଉ ସମୟରେ ଜଣେ ଗାଡିଚାଳକକୁ ଗିରଫ କରାଯାଇଥିବା ବେଳେ ଆଗାମୀ ଗଞ୍ଜେଇ ଅମଳକୁ ଲକ୍ଷ୍ୟ କରି ସ୍ବତନ୍ତ୍ର ଡ୍ରାଇଭ୍ ମାଧ୍ୟମରେ ଚଢାଉ ଜାରି ରହିବ ବୋଲି ସୂଚନା ଦେଇଛନ୍ତି ଅବକାରୀ ଇନ୍ସପେକ୍ଟର ଗୀତାଞ୍ଜଳୀ ସାହୁ ।
ଗଜପତି ଜିଲ୍ଲାରୁ ବେଆଇନ ଗଞ୍ଜେଇ ଅମଳ କରାଯାଇ ସେଗୁଡ଼ିକୁ ଉତ୍ତରପ୍ରଦେଶ ଚାଲାଣ କରାଯାଉଥିଲା । ତେବେ ଏହା ବ୍ରହ୍ମପୁର ଦେଇ ଯାଉଥିବା ବିଶେଷ ସୂତ୍ରରୁ ଖବର ପାଇଥିଲା ବ୍ରହ୍ମପୁର ଅବକାରୀ ଗୁଇନ୍ଦା ବିଭାଗ । ଏହି ଆଧାରରେ ସହରର ପୋକଡିବନ୍ଧ ଛକ ନିକଟରେ ଅପେକ୍ଷା କରି ରହିଥିଲେ ଅବକାରୀ ଇନ୍ସପେକ୍ଟର ଗୀତାଞ୍ଜଳୀ ସାହୁ ଏବଂ ତାଙ୍କ ଟିମ୍ । ଗଞ୍ଜେଇ ବୋଝେଇ ଟ୍ରକ ଗଜପତିରୁ ଆସୁଥିବା ବେଳେ ପୋକଡିବନ୍ଧ ଛକ ନିକଟରେ ଚଢ଼ାଉ କରିଥିଲା ଏହି ଅବକାରୀ ଟିମ । ଏଥିରେ ଟ୍ରକ ଚାଳକକୁ ଗିରଫ କରାଯାଇଛି । ଗିରଫ ଯୁବକ ଜଣକ ଉତ୍ତରପ୍ରଦେଶର ମହମ୍ମଦ ରିୱାଜ୍ ହୋଇଥିବା ବେଳେ ଜବତ ଗଞ୍ଜେଇ ସହ ଟ୍ରକର ଆନୁମାନିକ ମୂଲ୍ୟ ପ୍ରାୟ ୫୪ ଲକ୍ଷ ଟଙ୍କା ହେବ ବୋଲି କୁହାଯାଇଛି ।
ଗଜପତି ଜିଲ୍ଲା ମୋହନା ଅଞ୍ଚଳରୁ ଉତ୍ତରପ୍ରଦେଶକୁ ବାରମ୍ବାର ଗଞ୍ଜେଇ ଚାଲାଣ ହେଉଥିବା ଅଭିଯୋଗ ହେଉଛି । ସରକାରଙ୍କ ପକ୍ଷରୁ ଦୁର୍ଗମ ଅଞ୍ଚଳରେ ହେଉଥିବା ଗଞ୍ଜେଇ ଚାଷ ସମ୍ପର୍କରେ ଡ୍ରୋନ୍ ସାହାଯ୍ୟରେ ସମସ୍ତ ତଥ୍ୟ ରଖାଯାଉଥିବା କୁହାଯାଉଛି । ତେବେ ଆଗାମୀ ଦିନରେ ଏହି ଚଢାଉ ଆହୁରି ବ୍ୟାପକ ହେବ ବୋଲି ନୂତନ ଦାୟିତ୍ବ ଗ୍ରହଣ କରିଥିବା ଅବକାରୀ ଗୁଇନ୍ଦା ବିଭାଗ ଦକ୍ଷିଣାଞ୍ଚଳ ଡେପୁଟି କମିଶନର ଡମ୍ବରୁଧର ଖଣ୍ଡା ଇଟିଭି ଭାରତ ସହିତ ଆଲୋଚନା ସମୟରେ ସୂଚନା ଦେଇଛନ୍ତି ।
ଇଟିଭି ଭାରତ, ବ୍ରହ୍ମପୁର
