ବ୍ରହ୍ମପୁର: ରାଜ୍ୟରେ ଉପର ମୁହାଁ କୋରୋନା ଗ୍ରାଫ । ବଢୁଥିବା କୋରୋନା ସଂକ୍ରମଣକୁ ନେଇ ଚିନ୍ତାରେ ଲୋକେ । ଗତବର୍ଷ କୋରୋନା ଭୟାବହତା ଅତି ପାଖରୁ ଦେଖି ଥିବା ଗଞ୍ଜାମ ବାସୀ ଏଥିପାଇଁ ବେଶ ସତର୍କ । କୋରୋନା ମହାମାରୀ ବିରୋଧରେ ଲଢିବାକୁ ପ୍ରଶାସନ ସହ ହାତ ମିଳାଇଛି ବିଭିନ୍ନ ବ୍ୟବସାୟୀ ସଂଘ ।
ଦୃତ ଗତିରେ ବୃଦ୍ଧି ପାଉଥିବା କୋଭିଡ ସଂକ୍ରମଣକୁ ରୋକିବା ପାଇଁ ଗଞ୍ଜାମ ଜିଲ୍ଲାରେ ସହରାଞ୍ଚଳରେ ଆଜି ଠାରୁ ଆଗାମୀ ୧୦ ଦିନ ପର୍ଯ୍ୟନ୍ତ ଦିନ ୨ଟା ଠାରୁ ସକାଳ ୫ଟା ଯାଏଁ ବନ୍ଦ ରହିବ ଦୋକାନ ବଜାର । ସଂକ୍ରମଣକୁ ରୋକିବା ପାଇଁ ଜିଲ୍ଲାର ବ୍ୟବସାୟୀ ଏବଂ ବିଭିନ୍ନ ସଂଘ ପକ୍ଷରୁ ଏଭଳି ନିଷ୍ପତ୍ତି ନିଆଯିବା ପରେ ଗଞ୍ଜାମ ଜିଲ୍ଲାପାଳ ବିଜୟ ଅମୃତା କୁଲାଙ୍ଗେ ଏହି ନିଷ୍ପତ୍ତିକୁ ପ୍ରଶଂସା କରିଛନ୍ତି । ଏହା ସହିତ ସମସ୍ତେ ଏଭଳି ପଦକ୍ଷେପକୁ ସମର୍ଥନ କରିବା ପାଇଁ ସେ ଅପିଲ୍ କରିଛନ୍ତି । ଏଭଳି ସହଯୋଗରେ କୋରୋନା ଯୁଦ୍ଧରେ ବିଜୟୀ ହୋଇପାରିବା ବୋଲି ସେ କହିଛନ୍ତି । ସେପଟେ ବ୍ରହ୍ମପୁର ସହରର ଦେଶୀବେହେରା ସାହିର ବ୍ୟବସାୟୀ ମଧ୍ୟ ଦିନ ୨ଟା ପରେ ବ୍ୟବସାୟ ବନ୍ଦ ରଖିବାକୁ ନିଷ୍ପତ୍ତି ନେଇଥିଲେ ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
