ଖବର ପ୍ରସାରଣ ପରେ ତତ୍ପର ହେଲା ପ୍ରଶାସନ, ମେଡିକାଲରେ ଭର୍ତ୍ତି ହେଲେ ବିକାଶ

ଗଞ୍ଜାମ ଜିଲ୍ଲା ଭଞ୍ଜନଗର ବ୍ଲକ ବାରୁଡ଼ା ଗ୍ରାମରେ ଆଖି ଯନ୍ତ୍ରଣାରେ ଛଟପଟ ହେଉଥିବା ଶିଶୁ ବିକାଶ ନାୟକଙ୍କ ଚିକିତ୍ସା ପାଇଁ ହାତ ବଢ଼ାଇଲା ଜିଲ୍ଲା ପ୍ରଶାସନ । ଗତକିଛି ଦିନ ହେବ ଗଣମାଧ୍ୟମରେ ଖବର ପ୍ରସାରଣ ପରେ ପ୍ରଶାସନର ତତ୍ପରତା । ଅଧିକ ପଢନ୍ତୁ...

ଭଞ୍ଜନଗର: ଭଞ୍ଜନଗର ବ୍ଲକ ବାରୁଡ଼ା ଗ୍ରାମରେ ଆଖି ଯନ୍ତ୍ରଣାରେ ଛଟପଟ ହେଉଥିବା ବିକାଶ ନାୟକଙ୍କ ଚିକିତ୍ସା ପାଇଁ ହାତ ବଢ଼ାଇଲା ଜିଲ୍ଲା ପ୍ରଶାସନ l ଗତକିଛି ଦିନ ଧରି ଗଣମାଧ୍ୟମରେ ଖବର ପ୍ରସାରଣ ହେବାପରେ ଆଜି ସ୍ଥାନୀୟ ପ୍ରଶାସନ ତତ୍ପରତା ଦେଖାଇଛି। ଗ୍ରାମରେ ଏକ ଡାକ୍ତରୀ ଟିମ ପହଞ୍ଚି ବିକାଶକୁ ଚିକିତ୍ସା ପାଇଁ ବ୍ରହ୍ମପୁର ମେଡିକାଲକୁ ନେଇଛନ୍ତି । ଯଦି ଆବଶ୍ୟକ ପଡେ ତେବେ ଅଧିକ ଚିକିତ୍ସା ପାଇଁ ଅନ୍ୟ ମେଡିକାଲକୁ ସ୍ଥାନାନ୍ତର କରାଯିବ ବୋଲି ମଧ୍ୟ ଡାକ୍ତର କହିଛନ୍ତି l

ସୂଚନା ଅନୁସାରେ, ଭଞ୍ଜନଗର ବ୍ଲକ ବାରୁଡ଼ା ଗ୍ରାମର ଜୟରାମ ନାୟକ ଓ ରଞ୍ଜିତା ନାୟକଙ୍କ ସାନପୁଅ ବିକାଶ ନାୟକ ଦୀର୍ଘଦିନ ହେଲା ଆଖି ଯନ୍ତ୍ରଣାରେ ଛଟପଟ ହେଉଥିଲେ l ବାପା ମା ପୁଅର ଚିକିତ୍ସାରେ ସର୍ବହରା ହୋଇଗଲେ ଶେଷରେ ବାସଗୃହକୁ କୋଡିଏ ହଜାର ଟଙ୍କାରେ ବନ୍ଧା ପକାଇ ପୁଅର ଚିକିତ୍ସା କରାଇଲେ କିଛି ସୁଫଳ ମିଳିଲା ନାହିଁ l ବାସହରା ହୋଇଯାଇଥିବାରୁ ରଞ୍ଜିତା ପରିବାରକୁ ନେଇ ବାପା ଘର ଗୋଠଳିରେ ରହୁଛନ୍ତି l

ତେବେ ଅସହାୟ ପରିବାରକୁ ସରକାରୀ ସହାୟତା ପ୍ରଦାନ କରିବା ପାଇଁ ପରିବାର ସମେତ ସ୍ଥାନୀୟ ଗ୍ରାମବାସୀଙ୍କ ପକ୍ଷରୁ ବାରମ୍ବାର ଦାବି ହୋଇଆସୁଥିଲା। ତେବେ ଏନେଇ ଗଣମାଧ୍ୟମରେ ଖବର ପ୍ରସାରଣ ପରେ ଆଜି ପ୍ରଶାସନିକ ସ୍ତରରେ ତତ୍ପରତା ପ୍ରକାଶ ପାଇଥିବା ଦେଖିବାକୁ ମିଳିଛି ।

ଭଞ୍ଜନଗରରୁ ରଞ୍ଜନ ସ୍ବାଇଁ, ଇଟିଭି ଭାରତ