ଭଞ୍ଜନଗର: ଗଞ୍ଜାମ ଜିଲ୍ଲା ଗାଙ୍ଗପୁର ଥାନା ଅନ୍ତର୍ଗତ ଗୋବରା ମେନରୋଡ଼ ସ୍ୱାତିକ ଢାବା ନିକଟରେ ଗତକାଲି ବିଳମ୍ବିତ ରାତିରେ ଏକ ସ୍ପିରିଟ ବୋଝେଇ ଟ୍ରକ ଦୁର୍ଘଟଣା ଗ୍ରସ୍ତ ହୋଇଛି । ଏହି ଦୁର୍ଘଟଣାରେ ଚାଳକ ରୋହିତ କୁମାର ରାଉତ ସାମାନ୍ୟ ଆହତ ହୋଇଛନ୍ତି । ମିଳିଥିବା ସୂଚନା ମୁତାବକ ଗତକାଲି ବିଳମ୍ବିତ ରାତିରେ ଟ୍ରକଟି ବୌଦ୍ଧରୁ ଆସ୍କା ଚିନିଶିଳ୍ପକୁ ଆସୁଥିବାବେଳେ ଗୋବରା ନିକଟରେ ଏକ ଇଣ୍ଡିଂଗୋ କାର ସାମ୍ନାକୁ ଆସିଯିବାରୁ ଭାରସାମ୍ୟ ହରାଇ ଟ୍ରକଟି ଓଲଟି ପଡିଥିଲା, ଫଳରେ ମୁଖ୍ୟ ରାସ୍ତା ଉପରେ ଟ୍ରକଟି ଓଲଟି ପଡ଼ିଥିଲା ।
ଘଟଣାସ୍ଥଳରେ ରାସ୍ତା ଉପରେ ଟ୍ରକଟି ଓଲଟି ପଡିଥିବାରୁ ବହୁ ଟ୍ରକ ରାସ୍ତା ଉପରେ ଘଣ୍ଟା ଘଣ୍ଟା ଧରି ଅଟକି ରହିଥିଲା । ଦୀର୍ଘ ସମୟ ଧରି ରାସ୍ତା ଜାମ୍ ରହିବା ପରେ କ୍ରେନ ସାହାଯ୍ୟରେ ମୁଖ୍ୟ ରାସ୍ତାରୁ ଟ୍ରକଟିକୁ ହଟାଯାଇଥିଲା । ରୋଡ଼ ଉପରେ ସ୍ପିରିଟ ସବୁ ଗାଡିରୁ ଲିକ ହେଉଥିବାବେଳେ ଦମକଳ ବାହିନୀ ପହଞ୍ଚି ସଫା କରିଥିଲେ ଓ ତାପରେ ଗାଡି ଚଳାଚଳ ସ୍ବାଭାବିକ ହୋଇଥିଲା । ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।
ଭଞ୍ଜନଗରରୁ ରଞ୍ଜନ ସ୍ବାଇଁ, ଇଟିଭି ଭାରତ
