ଭଞ୍ଜନଗର: ଗଞ୍ଜାମ ଜିଲ୍ଲା ଭଞ୍ଜନଗର ଥାନା ଅନ୍ତର୍ଗତ ଗୁଣ୍ଡୁରୀବାଡ଼ି ଗ୍ରାମରେ ଅଭାବନୀୟ ଘଟଣା । ଏଠାରେ ବିଦ୍ୟୁତ ଆଘାତରେ ଜଣେ 11ବର୍ଷର ନାବାଳକ ଶ୍ରୀକାନ୍ତ ପ୍ରଧାନଙ୍କ ମୃତ୍ୟୁ ଘଟିଛି ।
ଶ୍ରୀକାନ୍ତକୁ ଗୁରୁତର ଅବସ୍ଥାରେ ଉଦ୍ଧାର କରି ପ୍ରଥମେ ମୁଜାଗଡ଼ ମେଡିକାଲ ଓ ତାପରେ ଭଞ୍ଜନଗର ମେଡିକାଲକୁ ଅଣାଯାଇଥିଲା । ଏଠାରେ ଡାକ୍ତର ତାକୁ ମୃତ ଘୋଷଣା କରିଛନ୍ତି । ଖବର ପାଇ ଭଞ୍ଜନଗର ପୋଲିସ ପହଞ୍ଚି ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ସେପଟେ ରାତି ହୋଇଯାଇଥିବାରୁ ମଙ୍ଗଳବାର ସକାଳେ ନାବାଳକର ମୃତଦେହ ବ୍ୟବଛେଦ ପରେ ପରିବାରକୁ ହସ୍ତାନ୍ତର କରାଯିବ ।
ସୂଚନା ଅନୁସାରେ ଶ୍ରୀକାନ୍ତର ଘର ଆଗରେ ଥିବା ବିଦ୍ୟୁତ ଖୁଣ୍ଟକୁ ଲାଗିଥିବା ଷ୍ଟେ-ତାର ଯୋଗୁଁ ଶ୍ରୀକାନ୍ତର ମୃତ୍ୟୁ ଘଟିଛି । ଦୁଇ ବର୍ଷ ପୂର୍ବେ ଉକ୍ତ ଷ୍ଟେ-ତାରରେ ଥିବା ବିଦ୍ୟୁତ ସଂସ୍ପର୍ଷରେ ଆସି ଜଣେ ଯୁବକ ଗୁରୁତର ହୋଇଥିଲେ । ବିଦ୍ୟୁତ ବିଭାଗକୁ ବାରମ୍ବାର ଅଭିଯୋଗ କଲେ ମଧ୍ୟ କିଛି ସୁଫଳ ମିଳିଲାନି ଶେଷରେ ଆଜି ଆଉ ଗୋଟିଏ କୋମଳ ଶିଶୁ ସେହି ଷ୍ଟେତାର ସଂସ୍ପର୍ଶରେ ଆସି ଜୀବନ ହାରିଲା ।
ଭଞ୍ଜନଗରରୁ ରଞ୍ଜନ ସ୍ବାଇଁ, ଇଟିଭି ଭାରତ
