ଗଜପତି: ସୋସିଆଲ ମିଡିଆରେ ପୂର୍ବ ପତ୍ନୀର ଅଶ୍ଳୀଳ ଫଟୋ ଭାଇରାଲ କରି ପ୍ରଥମ ସ୍ବାମୀ ଗିରଫ । ଘଟଣାଟି ଘଟିଛି ପାରଳାଖେମୁଣ୍ଡି ଅଞ୍ଚଳରେ । ଗିରଫ ଅଭିଯୁକ୍ତ ପୋଲୁରୁ ଗ୍ରାମର ଗାଟେଡା ସତୀଶ ।
ସୂଚନାନୁସାରେ, ଗତ 1 ତାରିଖରେ ପାରଳାଖେମୁଣ୍ଡି ଥାନା ଅନ୍ତର୍ଗତ ରାଣିପେଣ୍ଠ ଗ୍ରାମର ଜଣେ ମହିଳା ତାଙ୍କ ଅଶ୍ଲୀଳ ଫଟୋ ସୋସିଆଲ ମିଡିଆରେ ଭାଇରାଲ ହୋଇଥିବା ନେଇ ଏକ ମାମଲା ରୁଜୁ କରିଥିଲେ । ଏତଲାକୁ ଭିତ୍ତି କରି ପାରଳାଖେମୁଣ୍ଡି ପୋଲିସ ତଦନ୍ତ ଆରମ୍ଭ କରିଥିଲା । ଉକ୍ତ ଫଟୋଟି ଜିଲ ଜିଲ ଜିଗଲ ରାଣୀ ନାମକ ଏକ ଫେକ ଆଇଡିରେ ପୋଷ୍ଟ ହୋଇଥିବା ପୋଲିସ ତଦନ୍ତ ପରେ ଜାଣିବାକୁ ପାଇଥିଲା । ଏହି ଆଇଡିଟି ପୋଲୁରୁ ଗ୍ରାମର ଗାଟେଡା ସତୀଶ ଖୋଲିଥିଲା । ଯିଏ କି ପୀଡିତ ମହିଳାଙ୍କ ପ୍ରଥମ ସ୍ବାମୀ ଥିଲା ।
ନିଜର ରାଗ ପୂରଣ କରିବାକୁ ଏବଂ ପୂର୍ବ ପତ୍ନୀକୁ ବଦନାମ କରିବାକୁ ସେ ଏଭଳି କାଣ୍ଡ କରିଥିଲା । ଶନିବାର ସକାଳେ ପୋଲିସ ତାକୁ ଗିରଫ କରି କୋର୍ଟ ଚାଲାଣ କରିଥିବା ଏସପି ସାରା ଶର୍ମା ସୂଚନା ଦେଇଛନ୍ତି ।
ଗଜପତିରୁ ହରିହର ପଟ୍ଟନାୟକ, ଇଟିଭି ଭାରତ
