ଗଜପତି: ପାରଳାଖେମୁଣ୍ଡି ଉପକଣ୍ଠରେ ଥିବା ଗଜପତି ନର୍ସିଂ କଲେଜ ଛାତ୍ରୀ ଅଖିଳା ବେହେରାଙ୍କ ଝୁଲନ୍ତା ମୃତଦେହ କ୍ଲାସ୍ ରୁମରୁ ଉଦ୍ଧାର ହେବା ଘଟଣା । ଏ ନେଇ ସାମନାକୁ ଆସିଛି ଏକ ନୂଆ ତଥ୍ୟ । କଲେଜର ସମସ୍ତ ସିସିଟିଭି ଫୁଟେଜ୍ ରହିଥିବା ବେଳେ ଘଟଣା ଦିନ ରାତି ୧୨ଟାରୁ ପରଦିନ ସକାଳ ୮ଟା ପର୍ଯ୍ୟନ୍ତ ସିସିଟିଭ ଫୁଟେଜ୍ ନାହିଁ । ଏଭଳି ଅଭିଯୋଗ କରିଛନ୍ତି ଛାତ୍ରୀଙ୍କ ବାପା ।
କଲେଜର ଅଧ୍ୟକ୍ଷାଙ୍କ ନିର୍ଯାତନା ସହିନପାରି ଅଖିଳା ଆତ୍ମହତ୍ୟା କରିଥାଇପାରନ୍ତି କିମ୍ବା ତାଙ୍କୁ କେହି ହତ୍ୟା କରିଥାଇପାରେ ବୋଲି ତାଙ୍କ ସହପାଠୀମାନେ ଅଭିଯୋଗ କରୁଥିବା ବେଳେ ଝିଅକୁ ମାରିଦେଇ ଝୁଲାଇ ଦିଆଯାଇଥିବା ନେଇ ବାପା ଅଭିଯୋଗ କରିଛନ୍ତି । ଘଟଣା ଦିନର ସିସି ଟିଭି ଫୁଟେଜ୍ ନଥିବା ଛାତ୍ରୀଙ୍କ ବାପା ଅଭିଯୋଗ ଆଣିଥିବା ବେଳେ ସେପଟେ ସିସିଟିଭି ଫୁଟେଜ୍ ସଂପର୍କରେ ସେ କିଛି ଜାଣିନାହାନ୍ତି, ହୁଏତ କିଛି ବୈଷୟିକ ତୃଟି ଥାଇପାରେ ବୋଲି ସଫେଇ ଦେଇଛନ୍ତି କଲେଜର ଅଧ୍ୟକ୍ଷା ।
କଲେଜର ହାର୍ଡ ଡିସ୍କ ଜବତ କରାଯାଇଛି । ଘଟଣାର ତଦନ୍ତ ଜାରି ରହିଛି । ତଦନ୍ତ ପରେ ସବୁ କିଛି ସ୍ପଷ୍ଟ ହେବ ବୋଲି କହିଛନ୍ତି ପାରଳାଖେମୁଣ୍ଡି SDPO ରାମକୃଷ୍ଣ ପତି । କଲେଜର ଅଧ୍ୟକ୍ଷା ଛାତ୍ରଛାତ୍ରୀମାନଙ୍କୁ ମାନସିକ ନିର୍ଯାତନା ଦେଉଥିବା ଅଭିଯୋଗ ହେଉଛି । ଏପରିକି କଲେଜରେ ଓଡିଆ କହିଲେ ଫାଇନ୍ ଦେବାକୁ ପଡୁଛି । କେବଳ ସେତିକି ନୁହେଁ କଲେଜ ହଷ୍ଟେଲରେ ୨ଟି ଗାଧୁଆ ଘର ରହିଥିବା ବେଳେ ସେଠାରେ ମଧ୍ୟ ଠିକ ଭାବେ ପାଣି ଆସୁନାହିଁ । ଏହାକୁ କହିଲେ କେହି କର୍ଣ୍ଣପାତ କରୁନାହାନ୍ତି । କଲେଜରେ ବିଳମ୍ବରେ ପହଞ୍ଚିଲେ ଫାଇନ୍ କରାଯାଉଛି ।
ଗତ ବୁଧବାର ପରୀକ୍ଷା ହଲରେ ଅଖିଳା ଲେଖୁଥିବା ବେଳେ ସେ କପି କରି ଲେଖୁଥିବା ଦର୍ଶାଇ କଲେଜ ଅଧ୍ୟକ୍ଷା ଅପମାନିତ କରିଥିଲେ । ବାରମ୍ବାର କଲେଜ୍ ଅଧ୍ୟକ୍ଷାଙ୍କ ନିର୍ଯାତନା ସହିନପାରି ସେ ଏଭଳି ଆତ୍ମହତ୍ୟା କରିଥିବା ତାଙ୍କ ସହପାଠୀମାନେ କହିଛନ୍ତି । ଅଖିଳା ଆତ୍ମହତ୍ୟା କରିଛନ୍ତି ନା କେହି ତାଙ୍କୁ ହତ୍ୟା କରିଛି ତାହା ସ୍ପଷ୍ଟ ହୋଇନାହିଁ । ଯଦି ଛାତ୍ରୀ ଜଣକ ଆତ୍ମହତ୍ୟା କରିଛନ୍ତି ତାହଲେ ଏହା ପଛର କାରଣ କଣ ଏବଂ ଯଦି କେହି ହତ୍ୟା କରିଛି ତାହେଲେ କେଉଁ କାରଣ ପାଇଁ ଜଣେ ନର୍ସିଂ ଛାତ୍ରୀଙ୍କୁ ହତ୍ୟା କରାଯାଇଛି ତାହାର ଛାନଭିନ୍ କରୁଛି ପାରଳାଖେମୁଣ୍ଡି ପୋଲିସ । ସେପଟେ ଛାତ୍ରୀଙ୍କ ଅଭିଯୋଗ ସଂପୂର୍ଣ୍ଣ ଭିତ୍ତିହୀନ ବୋଲି କହିଛନ୍ତି କଲେଜର ଅଧ୍ୟକ୍ଷା ।
ଇଟିଭି ଭାରତ, ଗଜପତି
