ଗଜପତି: ବିଭିନ୍ନ ପ୍ରସଙ୍ଗକୁ ନେଇ ଗତକାଲି(ମଙ୍ଗଳବାର) ଆନ୍ଧ୍ର ପ୍ରଦେଶ ମୁଖ୍ୟମନ୍ତ୍ରୀ ଜଗନ୍ ମୋହନ ରେଡ୍ଡୀ ଓଡ଼ିଶା ମୁଖ୍ୟମନ୍ତ୍ରୀଙ୍କୁ ଭେଟି ଆଲୋଚନା କରିଛନ୍ତି । ଉଭୟ ରାଜ୍ୟ ମଧ୍ୟରେ ଥିବା ବିଭିନ୍ନ ବିବାଦକୁ ନେଇ ଦୁଇ ମୁଖ୍ୟମନ୍ତ୍ରୀ ଆଲୋଚନା କରିଥିଲେ । ତେବେ ଗଜପତି ଜିଲ୍ଲାରେ ମଧ୍ୟ ଆନ୍ଧ୍ର ପ୍ରଦେଶକୁ ନେଇ ଅନେକ ସମସ୍ୟା ରହିଛି । ହେଲେ ଏନେଇ ଦୁଇ ମୁଖ୍ୟମନ୍ତ୍ରୀ ଆଲୋଚନା କରିନଥିବା ଅଭିଯୋଗ ହୋଇଛି । ଏହାକୁ ନିନ୍ଦା କରିଛନ୍ତି ପାରଳାଖେମୁଣ୍ଡି ବିଧାୟକ କେ. ନାରାୟଣ ରାଓ ।
ଗଜପତି ଜିଲ୍ଲାର ସୀମାନ୍ତ ଗାଁ ଗୁଡ଼ିକରେ ଆନ୍ଧ୍ର ପ୍ରବେଶ କରି ଦାଦାଗିରି ଚଳାଇଛି । ଗାଁ ଭିତରେ ପଶି ଧମକ ଦେଉଛନ୍ତି ଆନ୍ଧ୍ର ଅଧିକାରୀ ଓ ନେତା । ଏନେଇ ମୁଖ୍ୟମନ୍ତ୍ରୀ କାହିଁକି ପ୍ରଶ୍ନ ଉଠାଇଲେ ନାହିଁ ବୋଲି କହିଛନ୍ତି ବିଧାୟକ । ସେହିଭଳି ବଂଶଧାରା ନଦୀରେ ନେରେଡି ବ୍ୟାରେଜ୍ ପାଇଁ କୋର୍ଟରେ ଆନ୍ଧ୍ର ସପକ୍ଷରେ ରାୟ ଦେବା ପରେ ଗଜପତିର ଗାଁ ଗୁଡ଼ିକୁ ସଠିକ କ୍ଷତି ପୂରଣ ଦେବା ବିଷୟରେ ମଧ୍ୟ ଆଲୋଚନା କଲେନି ଉଭୟ ରାଜ୍ୟ ମୁଖ୍ୟମନ୍ତ୍ରୀ । ଏହି ଆଲୋଚନାରେ ଗଜପତି ଜିଲ୍ଲାର ସୀମା ବିବାଦ ନେଇ ଗୁରୁତ୍ୱ ଦିଆଯାଇନଥିବା ଅଭିଯୋଗ କରିଛନ୍ତି ପାରଳାଖେମୁଣ୍ଡି ବିଧାୟକ କେ. ନାରାୟଣ ରାଓ ।
ସେହିପରି ନେରେଡୀ ପ୍ରକଳ୍ପ ଦ୍ବାରା କ୍ଷତିଗ୍ରସ୍ତ ହେବାକୁ ଥିବା କାଶୀନଗର ବ୍ଲକର ଗାଁ ଲୋକଙ୍କୁ କ୍ଷତିପୂରଣ ଦେବା ବାବଦରେ ଦୁଇ ମୁଖ୍ୟମନ୍ତ୍ରୀ ଆଲୋଚନା କରିବେ ବୋଲି ଆଶା କରିଥିଲେ ଗ୍ରାମବାସୀ । ତାହା ହୋଇନଥିବାରୁ ନିରାଶ ହୋଇଛନ୍ତି କାଶୀନଗର ବ୍ଲକର ଅନେକ ଗ୍ରାମବାସୀ ।
ଗଜପତିରୁ ହରିହର ପଟ୍ଟନାୟକ, ଇଟିଭି ଭାରତ
