ଗଜପତି: ସ୍ଥାନୀୟ ବିଜୁ କଲ୍ୟାଣ ମଣ୍ଡପ ଠାରେ ବ୍ରହ୍ମପୁର ସାଂସଦ ଚନ୍ଦ୍ରଶେଖର ସାହୁ ବିଜେଡିରେ ଯୋଗ ଦେବାକୁ ଆସିଥିବା ସଂଗ୍ରାମ ସାହୁଙ୍କୁ ଚାପୁଡା ମାରିଛନ୍ତି । ବିଜେଡିର ପରିବର୍ଦ୍ଧିତ କାର୍ଯ୍ୟକାରିଣୀ ବୈଠକରେ ଏହି ଘଟଣା ଦେଖିବାକୁ ମିଳିଛି । ଯାହାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହୋଇଛି ।
ଜିଲ୍ଲା ସଭାପତି ପ୍ରଦୀପ୍ତ ନାୟକଙ୍କ ଅଧ୍ୟକ୍ଷତାରେ ବିଜେଡିର ପରିବର୍ଦ୍ଧିତ କାର୍ଯ୍ୟକାରିଣୀ ବୈଠକ ଅନୁଷ୍ଠିତ ହେଉଥିଲା । ଏଥିରେ ଦୁଇ ପର୍ଯ୍ୟବେକ୍ଷକ ପୂର୍ଣ୍ଣଚନ୍ଦ୍ର ସ୍ବାଇଁ ଓ ବ୍ରହ୍ମପୁର ସାଂସଦ ଚନ୍ଦ୍ରଶେଖର ସାହୁ ଯୋଗ ଦେଇଥିଲେ। ଏହି ଅବସରରେ ପୂର୍ବତନ କଂଗ୍ରେସ ସଭାପତି ସଂଗ୍ରାମ ସାହୁ ବିଜେଡିରେ ଯୋଗ ଦେବାକୁ ଆସିଥିଲେ ।
ତାଙ୍କୁ ପୂର୍ଣ୍ଣଚନ୍ଦ୍ର ସ୍ବାଇଁ ଉପଢୌକନ ପ୍ରଦାନ କରିଥିଲେ । ହେଲେ ସେ ଉପଢୌକନକୁ ପୂର୍ଣ୍ଣଚନ୍ଦ୍ର ସ୍ବାଇଁଙ୍କ ହାତରୁ ନେବାକୁ ମନା କରି ସାଂସଦଙ୍କ ଠାରୁ ନେବାକୁ ଇଚ୍ଛା ପ୍ରକାଶ କରିଥିଲେ। ଏହାପରେ ସାଂସଦ ଉତ୍ତ୍ୟକ୍ତ ହୋଇ ତାଙ୍କୁ ଚାପୁଡା ମାରିଥିବା କୁହାଯାଉଛି। ତେବେ ଏ ପର୍ଯ୍ୟନ୍ତ ପ୍ରକୃତ କାରଣ ଅସ୍ପଷ୍ଟ ରହିଛି । ଏନେଇ ସାଂସଦଙ୍କ ପ୍ରତିକ୍ରିୟା ମିଳିପାରିନାହିଁ ।
ତେବେ ଏନେଇ ବିଜେପି ନେତା ଭୃଗୁବକ୍ସି ପାତ୍ର ନିଜ ଟ୍ବିଟରରେ ଉଲ୍ଲେଖ କରିଛନ୍ତି । ସେ କହିଛନ୍ତି , ଜଣେ ପୂର୍ବତନ କେନ୍ଦ୍ରମନ୍ତ୍ରୀ ଓ ବର୍ତ୍ତମାନର ସାଂସଦ ସର୍ବସାଧାରଣ ସ୍ଥାନରେ ଜଣେ କର୍ମୀଙ୍କୁ ଚାପୁଡା ମାରୁଛନ୍ତି । ସେ କଣ ଏପରି ଅପମାନଜନକ ଓ ଲଜ୍ଜାଜନକ ଆଚରଣ କରି ଓଡିଶା ପାଇଁ ଅପମାନ ଆଣିନାହାନ୍ତି ବୋଲି ଟ୍ବିଟରରେ ପ୍ରଶ୍ନ କରିଛନ୍ତି।
ଗଜପତିରୁ ହରିହର ପଟ୍ଟନାୟକ, ଇଟିଭି ଭାରତ
