ଗଜପତି: ପାରଳାଖେମୁଣ୍ଡି ବ୍ରହ୍ମପୁର କେନ୍ଦ୍ରୀୟ ସମବାୟ ବ୍ୟାଙ୍କରେ ନକଲି ସୁନା ଦେଇ ଋଣ ହଡପ କରିଛନ୍ତି ଖୋଦ ବ୍ୟାଙ୍କ ଦ୍ବାରା ନିୟୋଜିତ ବଣିଆ । ଏହି ଶାଖାରେ ବଣିଆ ଭାବେ ନିୟୋଜିତ ଥିବା କେ.ଗୋପୀ 2016 ରେ 460 ଗ୍ରାମ ନକଲି ସୁନା ବନ୍ଧକ ରଖି 4ଟି ଆକାଉଣ୍ଟ ମାଧ୍ୟମରେରେ 11 ଲକ୍ଷ ଟଙ୍କା ଋଣ ନେଇଥିଲେ । ଚଳିତ ଆର୍ଥିକ ବର୍ଷ ସୁଦ୍ଧା ଋଣର ମୂଲ୍ୟ 23 ଲକ୍ଷରେ ପହଞ୍ଚିଥିବା ବେଳେ କେ ଗୋପୀ 11 ଲକ୍ଷ ସୁଝି ଦେଇଥିଲେ । ବର୍ତ୍ତମାନ ସୁଦ୍ଧା 11 ଲକ୍ଷ ଟଙ୍କା ବାକି ଥିଲା ।
ତେବେ ଗୁରୁବାର ପାରଳାଖେମୁଣ୍ଡି ବିସିସି ବ୍ୟାଙ୍କ ମ୍ୟାନେଜର ଥାନାରେ ଅଭିଯୋଗ କରିଥିଲେ ଯେ, କେ.ଗୋପୀ ବନ୍ଧକ ଦେଇଥିବା ସୁନା ସବୁ ନକଲି । ଶୁକ୍ରବାର ପାରଳାଖେମୁଣ୍ଡି ଥାନା ଅଧିକାରୀ ବିସିସି ବ୍ୟାଙ୍କରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି । ଏହାସହ କେ.ଗୋପୀଙ୍କୁ ଅଟକ ରଖିଛନ୍ତି । ସେପଟେ ଋଣ ହଡପ ଘଟଣାରେ କିଛି ବ୍ୟାଙ୍କ କର୍ମଚାରୀ ସାମିଲ ଥିବା ନେଇ ଅଭିଯୋଗ ହୋଇଛି । ଏନେଇ ବ୍ରହ୍ମପୁର କେନ୍ଦ୍ରୀୟ ସମବାୟ ବ୍ୟାଙ୍କର ମୁଖ୍ୟ ଶାଖାର ଅଧିକାରୀ ମାନେ ଆସି ବ୍ୟାଙ୍କ ଲକର ଯାଞ୍ଚ କରିବା ସହିତ ତଦନ୍ତ ଜାରି ରଖିବା କହିଛନ୍ତି ସମବାୟ ବ୍ୟାଙ୍କର ଏଆରସିଏସ।
ଗଜପତିରୁ ହରିହର ପଟ୍ଟନାୟକ, ଇଟିଭି ଭାରତ
