ଗଜପତି: ଦୀର୍ଘ ଦିନର କୋରୋନା କଟକଣା ପରେ ଏବେ ଏହା ଧିରେଧିରେ ହଟୁଛି । କିନ୍ତୁ ଏବେ ବି କୁଟୀର ଶିଳ୍ପ ଉପରେ ନିର୍ଭର କରୁଥିବା ଲୋକେ ବ୍ୟବସାୟ ପାଇଁ ବାଟ ଫିଟିନାହିଁ । ଏଭଳି ସମସ୍ୟାର ସମ୍ମୁଖୀନ ହେଉଛନ୍ତି ଗଜପତି ଜିଲ୍ଲାର ରାୟଗଡ ବ୍ଳକର କଇଁପୁର ଅଞ୍ଚଳର ବେତ କାରିଗର । କଞ୍ଚାମାଲ ମିଳୁନଥିବା ବେଳେ ତିଆରି କରିଥିବା ଜିନିଷ ମଧ୍ୟ ବିକ୍ରି ହୋଇପାରୁନାହିଁ । ଦୀର୍ଘଦିନ ହେବ ଏଭଳି ସ୍ଥିତି ଲାଗି ରହିଥିବାରୁ ଆର୍ଥିକ ସ୍ଥିତି ଦୁର୍ବଳ ହୋଇଥିବା ସେମାନେ କହିଛନ୍ତି ।
କୋରୋନା ମାଡରେ ସମସ୍ତଙ୍କ ଆର୍ଥିକ ସ୍ଥିତି ଭଲ ନଥିବାରୁ ବାଉଁଶ କାରିଗର ଏବଂ ବେତ କାରିଗର ଭଳି କିଛି ପରିବାର ଯେଉଁମାନେ ନିଜର କୌଳିକ ବୃତିକୁ ଆଧାର କରି ନିଜର ଜୀବିକା ନିର୍ବାହ କରୁଛନ୍ତି, ସେମାନେ ବର୍ତମାନ ଚିନ୍ତାରେ । ଗଜପତି ଜିଲ୍ଲା ରାୟଗଡ ବ୍ଳକର କଇଁପୁର ଗାଁ ଏବଂ ଏହାର ଆଖପାଖ ଅଞ୍ଚଳରେ କିଛି ପରିବାର ନିଜର କୌଳିକ ବୃତି ଭାବେ ବେତ କାରିଗରୀକୁ ଭରଷା କରି ଜୀବିକା ନିର୍ବାହ କରୁଛନ୍ତି ।
ସେମାନେ ବେତରେ ବିଭିନ୍ନ ସାମଗ୍ରୀ ପ୍ରସ୍ତୁତ କରିବା ସହ ଗ୍ରାମାଞ୍ଚଳରେ ହେଉଥିବା ବିଭିନ୍ନ ସାପ୍ତାହିକ ହାଟ କିମ୍ବା ମେଳା ମହୋତ୍ସବରେ ଏହାକୁ ବିକ୍ରି କରିଥାନ୍ତି । ଏଥିରୁ ସେମାନେ ପାଉଥିବା ଲାଭରେ ନିଜର ପରିବାର ପ୍ରତିପୋଷଣ କରୁଥିଲେ । କୋରୋନା କଟକଣା ଯୋଗୁଁ ଦୀର୍ଘଦିନ ଯାଏଁ ଲୋକେ ଘରୁ ବାହାରକୁ ବାହାରିବା ସମ୍ଭବ ନଥିଲା ।
ବର୍ତମାନ ସ୍ଥିତିରେ ପରିବର୍ତନ ହୋଇଥିଲେ ମଧ୍ୟ ଲୋକଙ୍କ ଆର୍ଥିକ ସ୍ଥିତି ସୁଧୁରି ନାହିଁ । ତେଣୁ ଯାହା ଜିନିଷ ତିଆରି କରି ରଖାଯାଇଛି, ତାହା ବି ବିକ୍ରି ହୋଇପାରୁନାହିଁ। ତେଣୁ ସମସ୍ତ କାରୀଗର ଏକ ପ୍ରକାର ହାତବାନ୍ଧି ବସିଛନ୍ତି । ତେଣୁ ସରକାର ଏଥିପ୍ରତି ଦୃଷ୍ଟି ଦେଇ ସହାୟତା କରିବାକୁ ସେମାନେ ଦାବି କରିଛନ୍ତି ।
ଗଜପତିରୁ ହରିହର ପଟ୍ଟନାୟକ ଇଟିଭି ଭାରତ
