ବ୍ରହ୍ମପୁର: ଦୂର ହେବ ଜଳ କଷ୍ଟ । ସମୁଦ୍ରର ଲୁଣିଆ ପାଣିରୁ ମିଳିବ ମଧୁର ଜଳ । ସେହି ପାଣିକୁ ପାଇପ ଯୋଗେ ଗାଁଗୁଡିକୁ ପଠାଯିବ । ଗଞ୍ଜାମ ଜିଲ୍ଲାରେ ଏଭଳି ପ୍ରୟାସ ଆରମ୍ଭ ହୋଇଥିବା ବେଳେ ଭାରତୀୟ ବିରଳ ମୃତ୍ତିକା ଲିମିଟେଡ୍ (ଆଇଆରଇଏଲ) ସହିତ ଜିଲ୍ଲା ଗ୍ରାମ୍ୟ ଜଳଯୋଗାଣ ଓ ପରିମଳ ବିଭାଗ ମଧ୍ୟରେ ଏକ ଚୁକ୍ତିନାମା ସ୍ୱାକ୍ଷରିତ କରାଯାଇଛି । ଆଇଆରଇଏଲ (IREL) ମଧ୍ୟରେ ରହିଥିବା ଲବଣ ଅପସାରଣ ପ୍ଲାଣ୍ଟରେ ସମୁଦ୍ରର ଲୁଣି ଜଳ ମଧୁର ଜଳରେ ପରିବର୍ତ୍ତନ କରାଯିବ । ସେହି ମଧୁର ଜଳକୁ ନିକଟବର୍ତ୍ତୀ ଆର୍ଯ୍ୟପଲ୍ଲୀ ଓ ମାଟିଖାଲ ଗ୍ରାମକୁ ପାଇପ ଲାଇନ ଯୋଗେ ଜଳଯୋଗାଣ କରାଯିବ ।
IREL, ଜିଲ୍ଲା ଗ୍ରାମ୍ୟ ଜଳଯୋଗାଣ ଓ ପରିମଳ ବିଭାଗ ମଧ୍ୟରେ MoU :
ସମୁଦ୍ରର ଲୁଣିଆ ପାଣିକୁ ଟ୍ରିଟମେଣ୍ଟ କରି ମଧୁର ଜଳଯୋଗାଣ ମାଧ୍ୟମରେ ୨ ଗ୍ରାମକୁ ପାଣି ଯୋଗାଇବାକୁ IREL ଯୋଜନା କରିଥିବା ବେଳେ ଏନେଇ IREL ଓ ଗଞ୍ଜାମ ଜିଲ୍ଲା ଗ୍ରାମ୍ୟ ଜଳଯୋଗାଣ ଓ ପରିମଳ ବିଭାଗ ମଧ୍ୟରେ ଏମ୍ଓୟୁ ସ୍ୱାକ୍ଷରିତ ହୋଇଛି । ଗଞ୍ଜାମ ଜିଲ୍ଲାପାଳଙ୍କ କାର୍ଯ୍ୟାଳୟ ପରିସରରେ IRELର ମୁଖ୍ୟଙ୍କ ସମେତ ସମସ୍ତ ଅଧିକାରୀ ଏବଂ ଜିଲ୍ଲା ଗ୍ରାମ୍ୟ ଜଳଯୋଗାଣ ଓ ପରିମଳ ବିଭାଗ ଅଧିକାରୀଙ୍କ ଉପସ୍ଥିତିରେ ଏହି ଏମ୍ଓୟୁ ସ୍ୱାକ୍ଷରିତ ହୋଇଛି । ଆଗାମୀ ଏକ ବର୍ଷ ମଧ୍ୟରେ ଏହି ପ୍ଲାଣ୍ଟରୁ ଜଳଯୋଗାଣ ମାଧ୍ୟମରେ ୨ ଗ୍ରାମକୁ ଜଳ ଯୋଗାଇବା କାର୍ଯ୍ୟ ଆରମ୍ଭ ହେବ । ମୁଖ୍ୟତଃ ଏହି ପ୍ଲାଣ୍ଟରେ ପ୍ରତ୍ୟେକ ଦିନ ସମୁଦ୍ରର ଜଳ ୫ ଏମଏଲଡ଼ି ରହିବ । ସେଥିରୁ ୪.୫ ଏମଏଲଡ଼ି ପାଣି ବାହାରିବା ପରେ ସେଥିମଧ୍ୟରୁ IRELର ବ୍ୟବହାର କରିବା ପାଇଁ ଆବଶ୍ୟକ ଜଳର ବ୍ୟବହାର ପରେ ଅବଶିଷ୍ଟ ୧.୫ ଏମଏଲଡ଼ି ମଧୁର ପାଣିକୁ ୨ଟି ଗ୍ରାମକୁ ଛଡ଼ାଯିବ ।
ଏଥିପାଇଁ ମୋଟ ୪ କୋଟି ୨୦ ଲକ୍ଷ ଟଙ୍କା ଖର୍ଚ୍ଚ ହେବାକୁ ରହିଥିବା ବେଳେ ତାହା IREL ପକ୍ଷରୁ ଖର୍ଚ୍ଚ କରାଯିବ । ମୁଖ୍ୟତଃ ଏହି ପ୍ରକଳ୍ପ ଭାବା ଅଟୋମିକ୍ ରିସର୍ଚ୍ଚ ସେଣ୍ଟରର ଟେକନିକ୍ ଦ୍ୱାରା ଏହି ଲବଣ ଅପସାରଣ କାର୍ଯ୍ୟ କରାଯିବ । ସମୁଦ୍ର ଉପକୂଳ କ୍ଷେତ୍ରରେ ଏଭଳି ପରିକଳ୍ପନା ଓଡ଼ିଶାରେ ଏହା ପ୍ରଥମ ବୋଲି କହିଛନ୍ତି ଆଇଆରଇଏଲ ଜେନେରାଲ ମ୍ୟାନେଜର । ଚୁକ୍ତିନାମା ସ୍ୱାକ୍ଷର ପରେ କାର୍ଯ୍ୟ ଆରମ୍ଭ ହୋଇଥିବା ବେଳେ ଏକ ବର୍ଷ ମଧ୍ୟରେ କାମ ଶେଷ କରି ୨ ଗାଁକୁ ପାଣି ଯୋଗାଇବା ପାଇଁ ଲକ୍ଷ୍ୟ ରଖାଯାଇଛି ।
୧୫୦୦ରୁ ୨୦୦୦ ପରିବାର ହେବେ ଉପକୃତ:
ଚୁକ୍ତିନାମା ସ୍ୱାକ୍ଷର ହେବା ପରେ ଗଞ୍ଜାମ ଜିଲ୍ଲାପାଳ ଦିବ୍ୟଜ୍ୟୋତି ପରିଡ଼ା କହିଛନ୍ତି, "ଏହା ମାଧ୍ୟମରେ IRELର ନିକଟବର୍ତ୍ତୀ ୨ ଗ୍ରାମକୁ ପାନୀୟ ଜଳ ଏବଂ ଅନ୍ୟାନ୍ୟ ବ୍ୟବହାର ପାଇଁ ୧.୫ ଏମଏଲଡି ପାଣି ଯୋଗାଇ ଦିଆଯିବ । ଏମ୍ଓୟୁ ମାଧ୍ୟମରେ IREL ତାର ଜ୍ଞାନକୌଶଳ ପ୍ରଦାନ କରିବ । ଆରଡବ୍ଲୁଏସଏସ (RWSS) ଯୋଗାଣ ବ୍ୟବସ୍ଥା ପ୍ରଦାନ କରିବ । ପ୍ରଥମ ପର୍ଯ୍ୟାୟରେ ମାଟିଖାଲ ଏବଂ ଆର୍ଯ୍ୟପଲ୍ଲୀ ଗାାଁକୁ ପାନୀୟ ଜଳ ଯୋଗାଇ ଦେବାକୁ ଯୋଜନା କରାଯାଇଛି । ଏଥିରେ ୧୫୦୦ରୁ ୨୦୦୦ ପରିବାର ଉପକୃତ ହେବେ । ବର୍ତ୍ତମାନ ଏହାକୁ ନେଇ ଡ୍ରଇଂ ଡିଜାଇନ୍ ସହିତ ଫିଜିକାଲ କାର୍ଯ୍ୟ ଆରମ୍ଭ ହୋଇଛି । ଡିଷ୍ଟ୍ରିବ୍ୟୁସନ୍ ନେଟୱର୍କ କାର୍ଯ୍ୟ ଚାଲିଛି । ଖୁବଶୀଘ୍ର କର୍ଯ୍ୟ ଶେଷ କରି ଏହି ପ୍ରକଳ୍ପକୁ କାର୍ଯ୍ୟକାରୀ କରାଯିବ । ପୂର୍ବରୁ ରହିଥିବା ପାଇପ ଲାଇନ୍ ମାଧ୍ୟମରେ ଏହାକୁ କାର୍ଯ୍ୟକାରୀ କରାଇବା ସହିତ କେଉଁଠି ଟାଙ୍କି ହେବ ଏବଂ କେଉଁଠି ପମ୍ପହାଉସ୍ ହେବ ସେନେଇ ଯୋଜନା କରାଯିବ । ଏହା ଶେଷ ହେଲେ ପାନୀୟ ଜଳ ଯୋଗାଣ ଆରମ୍ଭ ହୋଇଯିବ । ପାଇପ୍ ଯୋଗେ ଜଳଯୋଗାଣ ହେବ । ଏହା ମାଧ୍ୟମରେ ବହୁ ମାତ୍ରାରେ ଜଳ ସଙ୍କଟ କମାଇ ଦିଆଯାଇପାରିବ । ଏହି ଅତ୍ୟାଧୁନିକ ଟେକ୍ନୋଲୋଜିକୁ ଆଗାମୀ ଦିନରେ କିପରି ବିନିଯୋଗ ହୋଇପାରିବ ତାହାକୁ ନେଇ କାର୍ଯ୍ୟକାରୀ କରାଯିବ ।"
ସମୁଦ୍ର କୂଳିଆ ଗାଁରୁ ଦୂର ହେବେ ଜଳ ସଙ୍ଗଟ:
ଗ୍ରାମ୍ୟ ଜଳ ଯୋଗାଣ ଓ ପରିମଳ ବିଭାଗ ନିର୍ବାହୀ ଯନ୍ତ୍ରୀ ଇଂ. ବିକାଶ କୁମାର ପତି କହିଛନ୍ତି, "IREL ପ୍ଲାଣ୍ଟ ପରିସରରେ ଏହି ପ୍ରକଳ୍ପ ରହିଥିବା ବେଳେ ଏଥିରୁ ବଳକା ରହୁଥିବା ୧.୫ ଏମଏଲଡି ପାଣିକୁ ନିକଟବର୍ତ୍ତୀ ୨ ଗ୍ରାମକୁ ଯୋଗାଇବାକୁ IREL କର୍ତ୍ତୃପକ୍ଷ ଯୋଜନା କରିଛନ୍ତି । ଏହାକୁ ନେଇ ଏକ ଡିପିଆର ପ୍ରସ୍ତୁତ କରାଯାଇଛି । ଏହି ପ୍ଲାଣ୍ଟ ୨ ଗାଁକୁ ମଧୁର ଜଳଯୋଗାଣ ନେଇ ଟଙ୍କା ସି.ଏସ୍.ଆର୍ ମାଧ୍ୟମରେ ଖର୍ଚ୍ଚ କରିବ IREL । କିନ୍ତୁ ସମସ୍ତ କାର୍ଯ୍ୟ କରିବ ଗ୍ରାମ୍ୟ ଜଳଯୋଗାଣ ଓ ପରିମଳ ବିଭାଗ । ଲବଣ ଅପସାରଣ ପ୍ଲାଣ୍ଟରୁ ମଧୁର ଜଳ ଯୋଗାଣ ନେଇ ଡିପିଆର ପ୍ରସ୍ତୁତ ହେବା ପରେ ବର୍ତ୍ତମାନ ଅନଲାଇନ ଟେଣ୍ଡର ମଧ୍ୟ ହୋଇ ସାରିଛି । ଖୁବଶୀଘ୍ର IREL ମଧ୍ୟରେ ଏକ ପମ୍ପ ହାଉସ ଓ ଲବୋରେଟୋରୀ କରାଯିବ । IREL ଭିତରେ ରହିଥିବା ପ୍ଲାଣ୍ଟରୁ ଆର୍ଯ୍ୟପଲ୍ଲୀ ଓ ମାଟିଖାଲକୁ ପାଇପ କିଛି ରହିଥିବା ବେଳେ ଆଉ କିଛି ଲାଇନ ବିଛାଯିବ । ପ୍ରତିଦିନ ପ୍ଲାଣ୍ଟରୁ ଏହି ୨ଟି ଗାଁକୁ ଯିବା ପାଇଁ ବାହାରିଥିବା ୧.୫ ଏମଏଲଡ଼ି ପାଣିକୁ ଲବୋରେଟୋରୀରେ ପରୀକ୍ଷା କରାଯିବ । ପରୀକ୍ଷାରେ ମଧୁରଜଳ ହେବା ନେଇ ଜଣାପଡ଼ିବା ପରେ ପ୍ଲାଣ୍ଟରୁ ପମ୍ପି କରାଯାଇ ପାଇପ ଯୋଗେ ଆର୍ଯ୍ୟପଲ୍ଲୀ ଓ ମାଟିଖାଲ ଗାଁକୁ ଜଳ ଯୋଗାଣ କରାଯିବ ।"
ଖର୍ଚ୍ଚ ହେବ ୪.୨ କୋଟି:
IREL ଜେନେରାଲ ମ୍ୟାନେଜର ସି.ଭି.ଆର ମୂର୍ତ୍ତି କହିଛନ୍ତି, "ଏହି ପ୍ଲାଣ୍ଟକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଗତ ୨୪ ମାର୍ଚ୍ଚ ୨୦୨୪ ମସିହାରେ ଉଦଘାଟନ କରି ଏହି ପ୍ଲାଣ୍ଟକୁ ଶୁଭାରମ୍ଭ କରିଥିଲେ । ଏଥିପାଇଁ ଏମ୍ଓୟୁ ସ୍ୱାକ୍ଷରିତ କରିଥିବା ବେଳେ ୪.୨ କୋଟି ଟଙ୍କା IREL ପକ୍ଷରୁ ପ୍ରଦାନ କରାଯାଇଛି । ଓଡିଶା ଉପକୂଳର ୪୮୦ କିଲୋମିଟର ମଧ୍ୟରେ ଏପରି କାର୍ଯ୍ୟକାରୀ ପ୍ଲାଣ୍ଟରେ ଏହା ପ୍ରଥମ । ଭାରତ ସରକାରଙ୍କ ଅଟମିକ୍ ଏନର୍ଜି ପକ୍ଷରୁ ମିଳିଥିବା ଅନୁଦାନ ଅନୁଯାୟୀ ଏହି ପ୍ରକଳ୍ପ କାର୍ଯ୍ୟକାରୀ ହୋଇଥିବା ବେଳେ ଭାବା ଅଟମିକ୍ ରିସର୍ଚ୍ଚ କେନ୍ଦ୍ରର ଟେକ୍ନିଲୋଜି ବ୍ୟବହାର କରି ଏହାକୁ କାର୍ଯ୍ୟକାରୀ କରାଯିବ ।"
ଏହା ମଧ୍ୟ ପଢ଼ନ୍ତୁ... |
ଇସ୍ରାଏଲ୍ ଏବଂ ଚେନ୍ନାଇରେ ରହିଛି ଏଭଳି ପ୍ଲାଣ୍ଟ:
ସମୁଦ୍ର ଲୁଣିପାଣିକୁ ମଧୁର ଜଳରେ ପରିଣତ କରି ଲୋକଙ୍କୁ ପ୍ରଦାନ କରିବା କାର୍ଯ୍ୟ ଏହା ରାଜ୍ୟରେ ପ୍ରଥମ । ପୂର୍ବରୁ ଇସ୍ରାଏଲ୍ ଏବଂ ଚେନ୍ନାଇରେ ଏଭଳି ପ୍ଲାଣ୍ଟ ରହିଛି । ଯେଉଁଥିରେ ସମୁଦ୍ର ଜଳରୁ ଟ୍ରିଟମେଣ୍ଟ କରି ମଧୁର ଜଳଯୋଗାଣ ମାଧ୍ୟମରେ ଲୋକଙ୍କୁ ଯୋଗାଣ ହେଉଛି । ଯେଭଳି ଆକ୍ୱାଗାର୍ଡରେ ଟେକ୍ନିଲୋଜି ପ୍ରଯୋଗ କରାଯାଇ ସମ୍ଭବପର ହୋଇପାରୁଛି, ସେହି ପ୍ରକ୍ରିୟାରେ ଏଠାରେ କରାଯାଇ ପରୀକ୍ଷା କରି ଲୋକଙ୍କୁ ମଧୁର ଜଳ ଯୋଗାଇ ଦିଆଯିବ ।
ଇଟିଭି ଭାରତ, ବ୍ରହ୍ମପୁର
