ଢେଙ୍କାନାଳ: ଜିଲ୍ଲାର ମୋଟଙ୍ଗା ବିକାଶ ନାୟକ ହତ୍ୟାକାଣ୍ଡ ଘଟଣାରେ ପୁଣି ଉତ୍ତେଜନା ପ୍ରକାଶ ପାଇଛି । ଏହି ଘଟଣାର ସମସ୍ତ ଅଭିଯୁକ୍ତଙ୍କୁ ତୁରନ୍ତ ଗିରଫ ଦାବିରେ ଗ୍ରାମର ଶତାଧିକ ମହିଳା ଓ ପୁରୁଷ ମୋଟଙ୍ଗା ଗ୍ରାମକୁ ଘେରାଉ କରିଛନ୍ତି । ଥାନା ଅଧିକାରୀ ଅନେକ ବୁଝାସୁଝା କରିବା ସାଙ୍ଗକୁ ଗିରଫ କରିବାର ପ୍ରତିଶୃତି ଦେବା ପରେ ଗ୍ରାମବାସୀ ଧାରଣାରୁ ହଟିଥିବା ଜଣାପଡ଼ିଛି ।
ଗତ ୧୯ ତାରିଖ ରାତିରେ ପୂର୍ବ ଶତ୍ରୁତାରୁ ମୋଟଙ୍ଗା ଗାଁ ଦାଣ୍ଡରେ ବିକାଶ ନାୟକଙ୍କୁ ଅପର ଗୋଷ୍ଠୀର କିଛି ଯୁବକ ଗୋଡ଼ାଇ ଗୋଡ଼ାଇ ଅତି ବିଭତ୍ସ ଭାବେ ହତ୍ୟା କରିଥିଲେ । ଏହି ହତ୍ୟାକାଣ୍ଡ ପରେ ଗ୍ରାମରେ ଦୁଇ ଗୋଷ୍ଠୀ ମଧ୍ୟରେ ଛକାପଞ୍ଝା ଯୋଗୁଁ ଗ୍ରାମରେ ହେବାକୁ ଥିବା ଦୋଳଯାତ୍ରା ବନ୍ଦ କରିଦେଇ ପ୍ରଶାସନ ପକ୍ଷରୁ ୧୪୪ ଧାରା ଜାରି କରାଯାଇଥିଲା । ସେପଟେ ହତ୍ୟାକାଣ୍ଡର ପରଦିନ ହତ୍ୟାକାଣ୍ଡର ମୁଖ୍ୟ ଅଭିଯୁକ୍ତ ମୋଟଙ୍ଗା ଗ୍ରାମର ପ୍ରକାଶ ପ୍ରଧାନକୁ ପରଜଙ୍ଗ ଅଞ୍ଚଳରୁ ପୋଲିସ ଗିରଫ କରିଥିବା ଜଣାପଡ଼ିଛି ।
ତେବେ ହତ୍ୟାକାଣ୍ଡରେ ୧୦ରୁ ଊର୍ଦ୍ଧ୍ବ ଅଭିଯୁକ୍ତ ଥିବାବେଳେ ସେମାନଙ୍କ ମଧ୍ୟରୁ ମୋଟଙ୍ଗା ଗ୍ରାମର ବିଜୟ ପ୍ରଧାନ, ସୁବାଷ ପ୍ରଧାନ, ସୁବ୍ରତ ପ୍ରଧାନ ଓ ରାଜେଶ ସାହୁ ଏପରି ୪ ଜଣଙ୍କୁ ମଧ୍ୟ ପୋଲିସ ଅଟକ ରଖି ତଦନ୍ତ ଜାରି ରଖିଛି । ମାତ୍ର ହତ୍ୟାକାଣ୍ଡରେ ଅଟକ ଅଭିଯୁକ୍ତ ଓ ଅନ୍ୟ ଅଭିଯୁକ୍ତ ମାନଙ୍କୁ ତୁରନ୍ତ ଗିରଫ ଦାବି କରିଛନ୍ତି ଗ୍ରାମବାସୀ ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
