ଢେଙ୍କାନାଳ: ଏନଏଚ ୫୫ରାସ୍ତା ସଂପ୍ରସାରଣ କାର୍ଯ୍ୟ କରୁଥିବା ଠିକା ସଂସ୍ଥାର ଖାମଖିଆଲି ଯୋଗୁଁ ବାରମ୍ବାର ଦୁର୍ଘଟଣା ଘଟି ଗୋଟିଏ ପରେ ଗୋଟିଏ ଜୀବନ ଯାଉଛି । ଏପରିକି ଢେଙ୍କାନାଳ ଶକ୍ତି ସୁଗାର ନିକଟସ୍ଥ ଏକ ନିର୍ମାଣ ଧୀନ ପୋଲ କାର୍ଯ୍ୟ ଚାଲୁଥିବା ସଂକେତ ନଥିବାରୁ ଏକ ବାଇକ ଦୁର୍ଘଟଣାର ସମ୍ମୁଖୀନ ହୋଇଛି । ଗୋଟିଏ ଗାଡି ସହ ଧକ୍କା ହୋଇ ଗୋଟିଏ ବାଇକ ୩୦ଫୁଟ ପୋଲ ତଳକୁ ଖସି ପଡିଛି ।
ଫଳରେ ବାଇକରେ ଯାଉଥିବା ଜଣଙ୍କର ମୃତ୍ୟୁ ଘଟିଥିବାବେଳେ ଅନ୍ୟ ଜଣେ ଗୁରୁତର ହୋଇଛନ୍ତି । ଗୁରୁତରଙ୍କୁ ଚିକିତ୍ସା ପାଇଁ ପ୍ରଥମେ ଢେଙ୍କାନାଳ ମୁଖ୍ୟ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ମାତ୍ର ତାଙ୍କ ଅବସ୍ଥା ସଙ୍କଟାପନ୍ନ ଥିବାରୁ ଗୁରୁତର ଯୁବକଙ୍କୁ କଟକ ଏସସିବିକୁ ସ୍ଥାନାନ୍ତରିତ କରାଯାଇଛି । ଗୁରୁତର ଜଣଙ୍କ କାମାକ୍ଷାନଗର ସମଟାଙ୍ଗି ଗ୍ରାମର ରଶ୍ମିରଞ୍ଜନ ନାୟକ ଓ ମୃତକ ଜଣକ ସେହି ଗ୍ରାମର ରାଜୀବ ଲୋଚନ ନାୟକ ବୋଲି ଜଣାପଡିଛି ।
ତେବେ ଉଭୟେ କମାକ୍ଷାନଗରରୁ କଟକ ଯାଉଥିଲେ। ଟାଉନ ପୋଲିସ ପହଞ୍ଚି ପୋଲ ତଳକୁ ଖସି ପଡିଥିବା ଦୁର୍ଘଟଣାଗ୍ରସ୍ତ ବାଇକକୁ ଜବତ କରିଥିବା ସହ ମୃତଦେହ ଜବତ କରି ବ୍ୟବଛେଦ ପାଇଁ ପଠାଇଛି।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
