ଢେଙ୍କାନାଳ: ସହରର କୋରି ଆଁ କାଳୀ ସାହିରେ ପୁଅର ଅଭାବନୀୟ କାଣ୍ଡ । ବୃଦ୍ଧ ବାପାକୁ ହତ୍ୟା କରି ପୋଡ଼ିଦେବାକୁ ଉଦ୍ୟମ ବେଳେ ମଶାଣିରୁ ମୃତଦେହ ଜବତ କଲା ଢେଙ୍କାନାଳ ଟାଉନ ପୋଲିସ । ଅଭିଯୁକ୍ତ ପୁଅକୁ ଅଟକ ରଖି ପୋଲିସର ଛାନଭିନ ଜାରି ରଖିଛି ।
ସମ୍ପତ୍ତି ବାଡ଼ି ଲୋଭରେ ପୁଅ ଏହି ନୃଶଂସ କାଣ୍ଡ ଘଟାଇଛି । ନିଜର ବୃଦ୍ଧ ବାପାକୁ କଟୁରୀରେ ଅତି ନୃଶଂସ ଭାବେ ହାଣି ହତ୍ୟା ପରେ ମଶାଣିରେ ପୋଡ଼ିଦେବାକୁ ଉଦ୍ୟମ କରୁଥିଲା । ତେବେ ଖବର ପାଇ ପୋଲିସ ମଶାଣିରୁ ମୃତଦେହକୁ ଜବତ କରିଥିବା ସହ ଅଭିଯୁକ୍ତ ପୁଅକୁ ଅଟକ ରଖି ଛାନଭିନ କରୁଛି । ଏପରି ଅଭାବନୀୟ କାଣ୍ଡ ଘଟିଛି ଢେଙ୍କାନାଳ ସହର କୋରିଆଁ କାଳୀ ସାହିରେ। ମୃତକ ହେଲେ ଉକ୍ତ ସାହିର ୬୫ ବର୍ଷୀୟ ତ୍ରିଲୋଚନ ପ୍ରଧାନ ।
ସୂଚନା ମୁତାବକ, ତ୍ରିଲୋଚନଙ୍କ ପତ୍ନୀଙ୍କର ପୂର୍ବରୁ ମୃତ୍ୟୁ ଘଟି ସାରିଥିଲା । ତାଙ୍କର ଦୁଇ ପୁଅ ବେକାର ଥିବାବେଳେ ତାଙ୍କର ଏକ ଜାଗାକୁ ବିକ୍ରି ନେଇ ବଡ଼ପୁଅ ପ୍ରକାଶ ପ୍ରଧାନଙ୍କ ସହ ପାଟିତୁଣ୍ଡ ହୋଇଥିଲା । ତେବେ ଗତ ରାତିର ବିଳମ୍ବିତ ପ୍ରହରରେ ଉତକ୍ଷିପ୍ତ ହୋଇ ବାପା ତ୍ରିଲୋଚନଙ୍କୁ ପୁଅ ପ୍ରକାଶ ଏକ କଟୁରୀରେ ପିଠି ଓ କାନ୍ଧ ଆଦି ଜାଗାକୁ ହାଣି ପକାଇଥିଲା । ଫଳରେ ଘଟଣାସ୍ଥଳରେ ତ୍ରିଲୋଚନଙ୍କର ମୃତ୍ୟୁ ଘଟିଥିଲା ।
ତେବେ ଏହି ହତ୍ୟାକାଣ୍ଡକୁ ଲୁଚାଇବା ପାଇଁ ମୃତଦେହକୁ ଆଜି ନିଜ ଘରଠାରୁ ପ୍ରାୟ ୧ କିଲୋମିଟର ଦୂର ପଥର ଖାଇ ମଶାଣି ନିକଟରେ ପୋଡି଼ ଦେବାକୁ ନେଇଥିଲା । ମାତ୍ର ଖବର ପାଇ ଟାଉନ ପୋଲିସ ମୃତଦେହକୁ ମଶାଣିରୁ ଜବତ କରିବା ସହ ଅଭିଯୁକ୍ତ ପୁଅ ପ୍ରକାଶକୁ ଅଟକ ରଖିଛି । ମୃତଦେହକୁ ବ୍ୟବଚ୍ଛେଦ ପାଇଁ ପଠାଇ ହତ୍ୟାକାଣ୍ଡର ତଦନ୍ତ ଆରମ୍ଭ କରିଛି ଟାଉନ ପୁଲିସ ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
