ଢେଙ୍କାନାଳ: ସଦର ଥାନା ଚାଉଳିଆରେ ବୀଭତ୍ସ ହତ୍ୟାକାଣ୍ଡ ଘଟିଛି । ବାପାର ତଣ୍ଟି କାଟି ହତ୍ୟା କଲା ପୁଅ । ଆକ୍ରମଣରେ ମାଆ ମଧ୍ୟ ଆହତ । ପାରିବାରିକ କଳହରୁ ଏପରି ଏକ ଉନ୍ମତ୍ତକାଣ୍ଡ ଘଟିଥିବା ସୂଚନା । ତେବେ ଅଭିଯୁକ୍ତ ପୁଅକୁ ଗିରଫ କରିଛି ପୋଲିସ ।
ଢେଙ୍କାନାଳ ଜିଲ୍ଲା ସଦର ଥାନା ଅନ୍ତର୍ଗତ ଚାଉଳିଆ ଗ୍ରାମରେ ପାରିବାରିକ କଳହକୁ ନେଇ ବାପାର ତଣ୍ଟି କାଟି ପୁଅ ହତ୍ୟା କରିଛି । ମୃତକ ଜଣକ ଚାଉଳିଆ ତଳସାହିର ଫଗୁ ସାହୁ ଓରଫ ଭଗିଆ । ଏପରିକି ଫଗୁଙ୍କୁ ନିଶାସକ୍ତ ପୁଅ ଶିବରାମ ସାହୁ ଆକ୍ରମଣ କରିବାବେଳେ ଅଟକାଇବାକୁ ଯାଇଥିବା ମାଆକୁ ମଧ୍ୟ ଆକ୍ରମଣ କରିଛି । ଫଳରେ ମୃତ ଫଗୁଙ୍କ ପତ୍ନୀ ମଧ୍ୟ ଆହତ ହୋଇଛନ୍ତି । ସୂଚନା ଅନୁଯାୟୀ ପୁଅ ଶିବରାମ ସବୁ ସମୟରେ ମଦ ପିଇବାକୁ ନେଇ ବାପା ମାଆଙ୍କ ମଧ୍ୟରେ ଝଗଡା ଲାଗିଥାଏ ।
ଆଜି(ଗୁରୁବାର) ବାପାଙ୍କୁ ପଇସା ମାଗିବାକୁ ନେଇ ପାଟିତୁଣ୍ଡ ହୋଇଥିଲା । ଉତ୍ତ୍ୟକ୍ତ ପୁଅ ଶିବରାମ ଏକ ଧାରୁଆ କଟୁରୀରେ ବାପା ବେକକୁ ହାଣି ଦେଇଥିଲା । ଫଳରେ ଘଟଣାସ୍ଥଳରେ ଫଗୁ ସାହୁଙ୍କର ମୃତ୍ୟୁ ଘଟିଛି । ଖବର ପାଇ ସଦର ଥାନା ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରିଛି । ପିତୃହନ୍ତା ଅଭିଯୁକ୍ତ ପୁଅ ଶିବରାମକୁ ଗିରଫ କରିବା ସହ ତଦନ୍ତ କରୁଛି ପୁଲିସ ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
