ଢେଙ୍କାନାଳ : ଟାଟାଏସି ଧକ୍କାରେ ଦୁଇ ବାଇକ ଆରୋହୀଙ୍କ ମୃତ୍ୟୁ । ଏଭଳି ଘଟଣା ଘଟିଛି ଢେଙ୍କାନାଳ ଜିଲ୍ଲା ରାସୋଳ ଥାନା ଗଣ୍ଡାନାଳୀ ପଞ୍ଚାୟତ ଚିଲତଇଲାରେ । ମୃତକଦ୍ବୟ ହେଲେ ଅନୁଗୁଳ ଜିଲ୍ଲା ସାକସିଙ୍ଗା ଗ୍ରାମର କୁଳମଣି ପ୍ରଧାନ ଓ ନିଧି ପ୍ରଧାନ । ଉଭୟ ବାଇକ ଯୋଗେ ରାସୋଳରୁ ଢେଙ୍କାନାଳ ଟାଉନ ପଟକୁ ଯାଉଥିବାବେଳେ ବିପରୀତ ଦିଗରୁ ଆସୁଥିବା ଟାଟାଏସି ସହ ମୁହାଁମୁହିଁ ଧକ୍କା ଦେଇଥିଲା ।
ଏନେଇ ସ୍ଥାନୀୟ ଲୋକେ ତୁରନ୍ତ ରାସୋଳ ପୋଲିସକୁ ଖବର ଦେଇଥିଲେ । ହେଲେ ପୋଲିସ ଦେଢ଼ ଘଣ୍ଟା ବିଳମ୍ବରେ ପହଞ୍ଚିଥିଲା । ସେତେ ବେଳକୁ ଦୁଇ ଆହତ ବ୍ୟକ୍ତିଙ୍କ ମୃତ୍ୟୁ ହୋଇଯାଇଥିଲା । ଫଳରେ ଉତ୍ତ୍ୟକ୍ତ ଲୋକମାନେ ରାସ୍ତା ଅବରୋଧ କରିବାସହ ଉତ୍ତେଜନା ପ୍ରକାଶ ପାଇଥିଲା ।
ଫଳରେ ରାସ୍ତାର ଉଭୟ ପାର୍ଶ୍ବରେ ଶତାଧିକ ଗାଡ଼ି ମୋଟର ଅଟକି ରହିଥିବାବେଳେ ଯାତ୍ରୀମାନେ ନାହିଁନଥିବା ଅସୁବିଧାର ସମ୍ମୁଖୀନ ହୋଇ ଥିଲେ। ଏହି ରାସ୍ତା ଦେଇ ଢେଙ୍କାନାଳ ଜିଲ୍ଲାପାଳ ଓ ଏସପି ହିନ୍ଦୋଳ ଠାରେ ଜନଶୁଣାଣି ଶିବିରରେ ଯୋଗଦେଇ ଫେରୁଥିବା ବେଳେ ସୌଜନ୍ୟ ଦୃଷ୍ଟିରୁ ଘଟଣାସ୍ଥଳରେ ନରହି ମଧ୍ୟ ପଳାଇ ଯାଇଥିଲେ । ଜିଲ୍ଲାର ଦୁଇ ମୁଖିଆଙ୍କ ଏତାଦୃଶ ବ୍ୟବହାରରେ ସ୍ଥାନୀୟ ଲୋକମାନେ ଆହୁରି ଉତ୍ତ୍ୟକ୍ତ ହୋଇ ପଡ଼ିଥିଲେ ।
ଖବରପାଇ ମାଜିଷ୍ଟ୍ରେଟ ଭାବେ ହିନ୍ଦୋଳ ତହସିଲଦାର ପହଞ୍ଚି ଲୋକଙ୍କୁ ବୁଝାସୁଝା କରିଥିଲେ ମଧ୍ୟ ସେମାନେ କିଛି ଶୁଣି ନଥିଲେ । ପରେ ମୃତକଙ୍କ ପରିବାର ଲୋକେ ପହଞ୍ଚି ଦୁଇ ମୃତକଙ୍କୁ ହିନ୍ଦୋଳ ମେଡିକାଲକୁ ବ୍ୟବଚ୍ଛେଦ ପାଇଁ ନେଇଥିଲେ ।
ଇଟିଭି ଭାରତ, ଢେଙ୍କାନାଳ
