ଢେଙ୍କାନାଳ: ଢେଙ୍କାନାଳ ସହର କଣ୍ଟାନାଳୀ ବାଇପାସ ଠାରେ ସ୍ଥାନୀୟ ଲୋକଙ୍କ ରାଜପଥ ଅବରୋଧ । ରାସ୍ତା ସମ୍ପ୍ରସାରଣ କାମରେ ପଡୁନି ପାଣି । ଧୂଳି ଯୋଗୁଁ ସ୍ଥାନୀୟ ବାସିନ୍ଦା ହନ୍ତସନ୍ତ ନେଇ ପ୍ରତିବାଦ । 55ନମ୍ବର ଜାତୀୟ ରାଜପଥରେ ଦୀର୍ଘ ଦୁଇ ଘଣ୍ଟା ଧରି ଯାତାୟତ ଠପ ।
୫୫ନମ୍ବର ଜାତୀୟ ରାଜପଥ ସଂପ୍ରସାରଣ କାର୍ଯ୍ୟ କରୁଥିବା ଗାୟତ୍ରୀ କନଷ୍ଟ୍ରକସନ ନାମକ ଠିକାସଂସ୍ଥାର ମନମାନୀ ଯୋଗୁଁ ରାଜପଥର ଯାତ୍ରୀଙ୍କ ଠାରୁ ଆରମ୍ଭ କରି ସ୍ଥାନୀୟ ଲୋକଙ୍କ ପର୍ଯ୍ୟନ୍ତ ସମସ୍ତେ ହନ୍ତସନ୍ତ ହେଉଛନ୍ତି । ଏପରିକି କାର୍ଯ୍ୟରେ କୌଣସି ସୂଚନା ଫଳକ ନଲଗାଇ ମନଇଛା ଖୋଲିବା ଓ ପାଣି ନପକାଇବାରୁ ବ୍ୟାପକ ଧୂଳି ଉଡି ପ୍ରଦୂଷଣ ଯୋଗୁଁ ଲୋକମାନେ ଅଣନିଶ୍ୱାସୀ ହୋଇପଡୁଛନ୍ତି ।
ଏହାର ପ୍ରତିବାଦରେ ଆଜି(ଶନିବାର) ଢେଙ୍କାନାଳ ସହରର କଣ୍ଟାନାଳୀ ବାଇପାସ ବାସିନ୍ଦା କଣ୍ଟାନାଳୀ ଛକରେ ଏନ ଏଚ-୫୫ରେ ପଥର ଥୋଇ ଅବରୋଧ କରିଛନ୍ତି । ତୁରନ୍ତ ଏହି ଠିକା ସଂସ୍ଥା ବିରୁଦ୍ଧରେ କାର୍ଯ୍ୟାନୁଷ୍ଠାନ ଦାବିରେ ଅଡି ବସିଛନ୍ତି ଉତ୍ୟକ୍ତ ଲୋକେ । ଫଳରେ ରାଜପଥର ଦୁଇ ପାର୍ଶ୍ଵରେ ଶହ ଶହ ସଂଖ୍ୟାରେ ଗାଡି ମଟର ଅଟକି ରହିଥିବା ଦେଖାଯାଇଛି । ଦୀର୍ଘ ଦୁଇ ଘଣ୍ଟା ଧରି ରାଜପଥ ଅବରୋଧ ଯୋଗୁଁ କଟକ ସମ୍ୱଲପୁର ମଧ୍ୟରେ ଯୋଗାଯୋଗ ବିଛିନ୍ନ ହୋଇଯାଇଛି । ଫଳରେ ଘଟଣାସ୍ଥଳରେ ବେଶ ଉତ୍ତେଜନା ପ୍ରକାଶ ପାଇଛି ।
ଘଟଣାସ୍ଥଳରେ ଟାଉନ ପୋଲିସ ପହଞ୍ଚି ଉତ୍ୟକ୍ତ ଲୋକଙ୍କୁ ବୁଝାସୁଝା କରିଥିଲେ । ପରେ ଠିକା ସଂସ୍ଥା ଗାୟତ୍ରୀ କନଷ୍ଟ୍ରକସନ ଅଧିକାରୀ ମାନେ ପହଞ୍ଚିବା ସହ ପୋଲିସ ଉପସ୍ଥିତିରେ ବୁଝାସୁଝା ଜାରିରହିଛି ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
