ଢେଙ୍କାନାଳ: ଜନବସତିମୁହାଁ ଦନ୍ତା । ଢେଙ୍କାନାଳ ସହରର ଶ୍ୟାମ ଚରଣପୁରରେ ଜାରି ରହିଛି ହାତୀ ଉପଦ୍ରବ । ଗାଁରେ ହାତୀ ପଶି ଘର ପାଚେରୀ ଭାଙ୍ଗିଲା ସହ ଉଜାଡ଼ିଲା ବାଡ଼ି ବଗିଚା । ଏହି ନରହନ୍ତା ଦନ୍ତାକୁ ନେଇ ଅଞ୍ଚଳବାସୀ ଆତଙ୍କିତ ।
ଢେଙ୍କାନାଳ ସହରରେ ପଶିଲା ନରହନ୍ତା ଦନ୍ତା । ଗତ ତିନିଦିନ ଧରି ଏହି ଦନ୍ତାର ଉପଦ୍ରବ ଦେଖି ଢେଙ୍କାନାଳ ସହରର ଶ୍ୟାମଚରଣପୁର ବାସିନ୍ଦା ଆତଙ୍କିତ ହୋଇପଡିଛନ୍ତି । ସନ୍ଧ୍ୟା ହେଲେ ହାତୀ ଭୟରେ ଲୋକଙ୍କ ଘର ତାଟି କବାଟ ପଡିଯାଉଛି। ଭୟର ବାତାବରଣ ମଧ୍ୟରେ ରାତି ବିତାଉଛନ୍ତି ଅଞ୍ଚଳବାସୀ ।
ଏପରିକି ଶ୍ୟାମଚରଣପୁରର ମଧୁସୂଦନ ମିଶ୍ରଙ୍କ ଘର ପାଚେରୀ ଭାଙ୍ଗି କଦଳୀ ଗଛ ଓ ବାଡ଼ି ବଗିଚା ଉଜାଡ଼ି ଦେଇଥିବା ଦେଖିବାକୁ ମିଳିଛି । ଏହି ଦନ୍ତା ଗତ କିଛିଦିନ ମଧ୍ୟରେ ଗହମଖୁଣ୍ଟି ଓ ସଦର ବନାଞ୍ଚଳରେ ତିନି ଚାରି ଜଣ ଲୋକଙ୍କୁ ଆକ୍ରମଣ କରିଥିବା ଜଣାପଡିଛି ।
ଏପରିସ୍ଥଳରେ ହାତୀଟି ପାଖ ବୋରାପଦା ଜଙ୍ଗଲରେ ରହିଥିବାରୁ ଏହି ଶ୍ୟାମଚରଣପୁର ବାସୀ ଆତଙ୍କିତ ହୋଇପଡିଛନ୍ତି । ତୁରନ୍ତ ଏହି ନରହନ୍ତା ଦନ୍ତାକୁ ଆୟତ୍ତ କରି ଏହି ଅଞ୍ଚଳରୁ ସ୍ଥାନାନ୍ତରିତ ପାଇଁ ଅଞ୍ଚଳବାସୀ ଦାବି କରିଛନ୍ତି ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
