ଢେଙ୍କାନାଳ: ମୁଖ୍ୟ ଚିକିତ୍ସାଳୟରେ ଅଘଟଣ । ୪ ମହଲା ବିଲ୍ଡିଂରୁ ଡେଇଁ ଆତ୍ମହତ୍ୟା କଲେ ରୋଗୀ । ହସ୍ପିଟାଲରେ ଢିଲା ସୁରକ୍ଷା ବ୍ୟବସ୍ଥାରୁ ଏପରି ଘଟିଥିବା ଅଭିଯୋଗ ଆଣିଲେ ରୋଗୀଙ୍କ ପରିବାର ଲୋକେ । ଏଭଳି ଅଭାବନୀୟ ଘଟଣା ଘଟିଛି ଢେଙ୍କାନାଳ ମୁଖ୍ୟ ଚିକିତ୍ସାଳୟରେ । ମୃତ ରୋଗୀ ଜଣଙ୍କ ହେଉଛନ୍ତି ପରଜଙ୍ଗ ଥାନା ଲୋଧଣି ଗ୍ରାମର ୫୦ବର୍ଷୀୟ ଦୁର୍ଯ୍ୟୋଧନ ନାୟକ ।
ମିଳିଥିବା ସୂଚନା ଅନୁଯାୟୀ, ମୁଣ୍ଡ ବୁଲାଇବା ଯୋଗୁଁ ଦୁର୍ଯ୍ୟୋଧନଙ୍କୁ ବୁଧବାର ହସ୍ପିଟାଲର ଜେରେଟିକ ୱାର୍ଡରେ ଭର୍ତ୍ତି କରାଯାଇଥିଲା । ତେବେ ଚିକିତ୍ସା ଜାରି ରହିଥିବା ବେଳେ ଆଜି ଭୋର ୪ଟା ସମୟରେ ହଠାତ ଝରକା ପଟୁ ତଳକୁ ଡେଇଁ ପଡିଥିଲେ । ଫଳରେ ଘଟଣାସ୍ଥଳରେ ତାଙ୍କର ମୃତ୍ୟୁ ହୋଇଥିଲା । ତେବେ କେଉଁ କାରଣରୁ ଦୁର୍ଯ୍ୟୋଧନ ଆତ୍ମହତ୍ୟା କଲେ ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇପାରିନାହିଁ । ଗତ ୧୪ ତାରିଖ ଦିନ ଜଣେ ଯୁବକ ମଧ୍ୟ ହସ୍ପିଟାଲ ଛାତରୁ ଡେଇଁ ଆତ୍ମହତ୍ୟା ଉଦ୍ୟମ କରିଥିଲେ । ଏପରି ଘଟଣା ବାରମ୍ବାର ଘଟୁଥିବାରୁ ଡାକ୍ତରଖାନାରେ ସୁରକ୍ଷାକର୍ମୀଙ୍କ ଅବହେଳାକୁ ଦାୟୀ କରିଛନ୍ତି ମୃତ ଦୁର୍ଯ୍ୟୋଧନଙ୍କ ପରିବାର ।
