ଢେଙ୍କାନାଳ: ମାଡ଼ିଗଲା ପଥର ବୋଝେଇ ଟ୍ରକ ଜଣେ ମୃତ । ଆଜି ସପ୍ତଶଯ୍ୟା ଅଞ୍ଚଳରେ ଘଟିଛି ଏହି ଦୁର୍ଘଟଣା । ମୃତକ ଜଣକ ହେଲେ କୈଳାଶ କାଞ୍ଜିଆ । ଘଟଣାସ୍ଥଳରେ ହିଁ ତାଙ୍କର ମୃତ୍ୟୁ ହୋଇଥିଲା । ସ୍ଥାନୀୟ ଲୋକେ ଉଦ୍ଧାର କରି ହସ୍ପିଟାଲରେ ଭର୍ତ୍ତି କରିଥିଲେ । ପୋଲିସ ଖବର ପାଇଁ ଘଟଣା ସ୍ଥଲରେ ପହଞ୍ଚି ମୃତଦେହକୁ ଜବତ କରିବା ସହ ବ୍ୟବଚ୍ଛେଦ ପାଇଁ ପଠାଇଛି । ସପ୍ତଶଯ୍ୟା ଅଞ୍ଚଳରେ ଦିନକୁ ଦିନ ଏଭଳି ଦୁର୍ଘଟଣା ଘଟୁଥିବାରୁ ଘଟଣା ସ୍ଥଳରେ ଚାପା ଉତ୍ତେଜନା ସୃଷ୍ଟି ହୋଇଛି ।
ସୂଚନା ଯୋଗ୍ୟ କମନିଙ୍ଗ ଗ୍ରାମର କୈଳାଶ କାଞ୍ଜିଆ ନାମକ ଜଣେ ବ୍ୟକ୍ତି କ୍ଷୀର ନେଇ ଘରକୁ ଫେରୁଥିବାବେଳେ ଏକ ପଥର ବୋଝେଇ ଟ୍ରକ ଦ୍ରୁତ ବେଗରେ ଆସି ତାଙ୍କ ଉପରେ ମାଡି ଯାଇଥିଲା । ତାଙ୍କୁ ସ୍ଥାନୀୟ ଲୋକେ ଉଦ୍ଧାର କରି ଢେଙ୍କାନାଳ ମୁଖ୍ୟ ଡାକ୍ତରଖାନାରେ ଚିକିତ୍ସା ପାଇଁ ଭର୍ତ୍ତି କରିଥିଲେ । ହେଲେ ସେଠାରେ ଡାକ୍ତର ମୃତ୍ୟୁ ଘୋଷଣା କରିଥିଲେ । ସେପଟେ ଏହି ଦୁର୍ଘଟଣା ପରେ ଘଟଣା ସ୍ଥଳରେ ଚାପା ଉତ୍ତେଜନା ପ୍ରକାଶ ପାଇଛି । ଉତ୍ୟକ୍ତ ଲୋକେ ମୃତକଙ୍କ ପରିବାରକୁୁ କ୍ଷତି ପୂରଣ ଦାବିରେ ଢେଙ୍କାନାଳ ଶଙ୍କର ପୁର ମୁଖ୍ୟ ରାସ୍ତାକୁ ଅବରୋଧ କରିଥିଲେ । ଫଳରେ ଲୋକଙ୍କ ଯାତାୟାତରେ ବାଧା ସୃଷ୍ଟି ହୋଇଥିଲା । ଘଟଣାସ୍ଥଳରେ ସଦର ଥାନା ପୋଲିସ ପହଞ୍ଚି ଉତ୍ୟକ୍ତ ଲୋକଙ୍କୁ ବୁଝାସୁଝା କରିବା ସହ କ୍ଷତିପୂରଣ ମିଳିବା ପ୍ରତିଶୃତି ଦେବାପରେ ରାସ୍ତାରୁ ଅବରୋଧ ହଟିଥଲା । ପୋଲିସ ଦୁର୍ଘଟଣା ଘଟିଥିବା ପଥର ବୋଝେଇ ଟ୍ରକକୁ ଜବତ କରିଥିବାବେଳେ ମୃତଦେହ ବ୍ୟବଚ୍ଛେଦ ପାଇଁ ପଠାଇଥିବା ଜଣାପଡିଛି ।
ଏହା ମଧ୍ୟ ପଢନ୍ତୁ ....ସୁନ୍ଦରଗଡ଼ ଦୁର୍ଘଟଣା: 3 ଲକ୍ଷ ଲେଖାଏଁ ଅନୁକମ୍ପା ରାଶି ଘୋଷଣା କଲେ ମୁଖ୍ୟମନ୍ତ୍ରୀ
ସଦର ବ୍ଲକ ସପ୍ତଶଯ୍ୟା ଅଞ୍ଚଳରେ ବେଆଇନ ଭାବେ ମାଙ୍କଡ଼ା ପଥର ଖାଦାନ ସଂଖ୍ୟା ବଢିବାରେ ଲାଗିଛି । ସ୍ଥାନୀୟ ରାଜସ୍ୱ କର୍ମଚାରୀଙ୍କ ସଲସୁତରାରେ ଦୈନନ୍ଦିନ ଶହ ଶହ ସଂଖ୍ୟାରେ ପଥର ବୋଝେଇ ଗାଡି ବାହାରକୁ ଚୋରା ଚାଲାଣ କରାଯାଉଛି ବୋଲି ଅଭିଯୋଗ ହୁଏ । ଏପରିକି ରାତିରେ ଓ ଭୋର ସମୟରେ ଏହି ମାଙ୍କଡା ପଥର ଚୋରା ଚାଲାଣ ପାଇଁ ଟ୍ରକ ଗୁଡିକ ଦ୍ରୁତ ବେଗରେ ଯାତାୟତ କରୁଛନ୍ତି । ଫଳରେ ସପ୍ତଶଯ୍ୟା, କମନିଙ୍ଗ, ମାଣିପୁର, ସଦେଇବେରେଣି , ପତ୍ରଭାଗ ଓ ପଦ୍ମନାଭ ପୁର ଆଦି ଗ୍ରାମବାସୀ ମାନେ ଅତିଷ୍ଠ ହୋଇପଡ଼ିଛନ୍ତି । ଟ୍ରକ ଗୁଡ଼ିକ ଦ୍ରୁତ ବେଗରେ ଯାତାୟତ କରୁଥିବାବେଳେ ଅନେକ ସମୟରେ ବହୁ ଦୁର୍ଘଟଣା ମଧ୍ୟ ଘଟୁଥିବାରୁ ଅଞ୍ଚଳବାସୀଙ୍କ ଅସନ୍ତୋଷ ବଢ଼ିବାରେ ଲାଗିଛି ।
ଇଟିଭି ଭାରତ, ଢେଙ୍କାନାଳ
