ଢେଙ୍କାନାଳ: କୋରୋନା ଗାଇଡ଼ଲାଇନକୁ ବେଖାତିର କରି ଚାଲିଥିଲା ସପିଂମଲ । ଢେଙ୍କାନାଲ ପୌରସଂସ୍ଥା ପକ୍ଷରୁ ଚଢ଼ାଉ କରାଯାଇ ମଲ୍କୁ ସିଲ୍ କରାଯାଇଛି । ଏଥିସହ ନିୟମ ଉଲ୍ଲଙ୍ଘନ ଅଭିଯୋଗରେ ମଲ୍ ମାଲିକଙ୍କ ଠାରୁ 1 ଲକ୍ଷ ଟଙ୍କା ଜରିମାନା ଆଦାୟ ହୋଇଥିବା ଜଣାପଡିଛି ।
କୋରୋନାର ଦ୍ୱିତୀୟ ଲହରରେ ସଂକ୍ରମଣ ରୋକିବା ପାଇଁ ଚାଲିଛି ଦ୍ୱିତୀୟ ପର୍ଯ୍ୟାୟ ଲକଡାଉନ । ଫଳରେ ଫୁଟ୍ ପାଥ୍ ଠାରୁ ଛୋଟ ବଡ ଦୋକାନୀ ଗୁଜୁରାଣ ହରାଇ ତାଙ୍କ ଅବସ୍ଥା ଦୁର୍ବିସହ ହୋଇପଡ଼ିଲାଣି । ଏପଟେ କିନ୍ତୁ ଢେଙ୍କାନାଳ ସହରର କୁଞ୍ଜକାନ୍ତ ସ୍ଥିତ ଖେମକା ଶପିଂ ମଲ ମାଲିକ ସରକାରଙ୍କ କଟକଣାକୁ ଫୁ କରିଦେଇଥିବା ଦେଖିବାକୁ ମିଳିଛି । ଏପରିକି ଲକଡାଉନ କଟକଣାକୁ ବେଖାତିର କରି ଦୋକାନ ସାମ୍ନାପଟେ ତାଲା ପକାଇ ପଛପଟେ ବ୍ୟବସାୟ ଚାଲୁଥିଲା ।
ଏନେଇ ଖବର ପାଇ ଢେଙ୍କାନାଳ ପୌରସଂସ୍ଥା ପକ୍ଷରୁ ଅଚାନକ ଚଢ଼ାଉ କରାଯାଇଥିଲା । ଚଢ଼ାଉରେ କୋଭିଡ କଟକଣାକୁ ଉଲ୍ଲଙ୍ଘନ କରିଥିବାରୁ ଖେମକା ଶପିଂ ମଲକୁ ପୌରସଂସ୍ଥା ପକ୍ଷରୁ ସିଲ କରିଦିଆଯାଇଛି । ଏଥିସହ ଏକ ଲକ୍ଷ ଟଙ୍କା ଜରିମାନା ବାବଦକୁ ଆଦାୟ କରାଯାଇଥିବା ପୌର ନିର୍ବାହୀ ଅଧିକାରୀ କହିଛନ୍ତି ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
