ଢେଙ୍କାନାଳ: OPTCL ଗ୍ରୀଡ ଷ୍ଟେସନରେ ଭୟାବହ ଅଗ୍ନିକାଣ୍ଡ । ଢେଙ୍କାନାଳ ଜିଲ୍ଲା କଣ୍ଟାବଣିଆ ସ୍ଥିତ ଓଡିଶା ପାୱାର ଟ୍ରାନ୍ସମିଶନ କର୍ପୋରେସନ ଲିମିଟେଡ ବା ଓପିଟିସିଏଲ ପାୱାର ଗ୍ରୀଡ ଷ୍ଟେସନରେ ସକାଳ 7ଟାରେ ସମୟରେ ଲାଗିଛି ନିଆଁ । ଘଟଣାସ୍ଥଳରେ 10ରୁ ଊର୍ଦ୍ଧ୍ବ ଦମକଳବାହିନୀ ନିୟୋଜିତ । ଅଗ୍ନିକାଣ୍ଡର କାରଣ ସ୍ପଷ୍ଟ ନଥିବାବେଳେ ସର୍ଟ ସର୍କିଟ ଯୋଗୁଁ ନିଆଁ ଲାଗିଥିବା ସନ୍ଦେହ କରାଯାଉଛି ।
ନିଆଁକୁ ଆୟତ୍ତ କରିବାକୁ ସ୍ଥାନୀୟ ଟାଟା ଷ୍ଟିଲ, ଜିଏମଆର, ନବଭାରତ, ଏମଜିଏମ ଆଦି କାରଖାନାର ସମସ୍ତ ଦମକଳବାହିନୀ ସହ ବନରପାଲ, ହିନ୍ଦୋଳରୋଡ, ଅନୁଗୋଳ, ଖଜୁରିଆକଟା ଦମକଳବାହିନୀ ଘଟଣାସ୍ଥଳରେ ପହଞ୍ଚିଛି । ନିଆଁ ଲାଗି ପାୱାର ଗ୍ରୀଡ ଟ୍ରାନ୍ସଫରମର ଗୁଡିକ ଜଳିପୋଡି ଯାଇଛି । ଏଥିରୁ ବ୍ୟାପକ ମାତ୍ରାରେ ତେଲ ବାହାରିବାରେ ଲାଗିଛି । ଫଳରେ ନିଆଁ ଆହୁରି ଭୟଙ୍କର ହେବାରେ ଲାଗିଛି । ସେପଟେ ନିଆଁ ଲାଗିଯିବାରୁ କୋଟି କୋଟି ଟଙ୍କା କ୍ଷତି ହେବାର ସମ୍ଭାବନା ରହିଛି ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
