ଢେଙ୍କାନାଳ: ଜିଲ୍ଲା କାମାକ୍ଷାନଗର ବ୍ଲକ ବାଉଁଶପାଳ ପଞ୍ଚାୟତ ଲେମ୍ବୁପାଳ ନିକଟରେ ରେଙ୍ଗାଳି ବାମପାର୍ଶ୍ବ ମୁଖ୍ୟ କେନାଲରେ 50 ଫୁଟର ଘାଇ ସୃଷ୍ଟି ହୋଇଛି । ଘାଇ ଯୋଗୁଁ କେନାଲ ନିକଟସ୍ଥ ଶହ ଶହ ଏକରରୁ ଊର୍ଦ୍ଧ୍ବ ଚାଷଜମି ଜଳମଗ୍ନ ହୋଇ ଚାଷଜମି ନଷ୍ଟ ହୋଇଛି । ଏଭଳି ପରିସ୍ଥିତି ପାଇଁ ଗ୍ରାମବାସୀ ବିଭାଗୀୟ ଅଧିକାରୀଙ୍କୁ ଦାୟୀ କରିଥିବା ଦେଖିବାକୁ ମିଳିଛି ।
ତାଳଚେର ସମଲରୁ ଯାଜପୁର ଜିଲ୍ଲା ଡ଼ୁବୁରି ପର୍ଯ୍ୟନ୍ତ ଏହି କେନାଲ ନିର୍ମାଣ ହୋଇଛି । ରେଙ୍ଗାଳି ବାମପାର୍ଶ୍ବ ମୁଖ୍ୟ କେନାଲର ଲେମ୍ବୁପାଳଠାରେ ଗୁରୁବାର ସକାଳ ପ୍ରାୟ ୮ ଟା ୩୦ ବେଳକୁ ଘାଇ ସୃଷ୍ଟି ହୋଇ ପାଣି ମାଡି ଚାଲିଛି । ଫଳରେ ବାଉଁଶପାଳ ଓ ଲେମ୍ବୁପାଳ ସାହିରେ ଶହ ଶହ ଏକର ଜମି ଜଳମଗ୍ନ ହୋଇଯିବା ସହ ବାଲିଚର ମାଡି ଯାଇଛି ।
ଦୀର୍ଘ ଦିନ ହେବ ଏଠାରେ ଘାଇ ସୃଷ୍ଟି ହୋଇଥିବା ସମ୍ପର୍କରେ ବିଭାଗୀୟ ଅଧିକାରୀଙ୍କୁ ସ୍ଥାନୀୟ ବାସିନ୍ଦା ଜଣାଇଲେ ମଧ୍ୟ ଏହାର ମରାମତି ହୋଇନଥିବା ଅଭିଯୋଗ ହୋଇଛି । ଯାହାଫଳରେ ଗୁରୁବାର ଏଭଳି ପରିସ୍ଥିତି ସୃଷ୍ଟି ହୋଇଛି ବୋଲି ଗ୍ରାମବାସୀ କହିବା ସହିତ ସିଧାସଳଖ ବିଭାଗୀୟ ଅଧିକାରୀଙ୍କୁ ଦାୟୀ କରିଛନ୍ତି ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
