ଢେଙ୍କାନାଳ: ହାତୀ ଆକ୍ରମଣରେ ବାପ ମୃତ ଅଳ୍ପକେ ବର୍ତ୍ତିଲା ପୁଅ । ଢେଙ୍କାନାଳ ଜିଲ୍ଲା ପରଜଙ୍ଗ ମହାବିରୋଡ଼ ରେଞ୍ଜ ଅଞ୍ଚଳରେ ବୁଧବାର ରାତିରେ ଘଟିଛି ଏପରି ଘଟଣା । ଘଟଣାସ୍ଥଳରେ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି ।
ସୂଚନା ଅନୁସାରେ, ନିରଞ୍ଜନ ଓ ତାଙ୍କ ପୁଅ ନାଗା ଦୁଇଟି ସାଇକେଲ ଯୋଗେ କନ୍ଦରସିଂଙ୍ଗାକୁ ଧାନ ପେସାଇବାକୁ ଯାଇ ନିଜ ଗାଁକୁ ଫେରୁଥିଲେ । ତେବେ ମଝିକା କାଳୀମନ୍ଦିର ନିକଟରେ ହାତୀ ହାବୁଡରେ ପଡିଯାଇଥିଲେ । ହାତୀ ନିରଞ୍ଜନଙ୍କୁ ଟେକି କଚାଡି ଦେବା ଫଳରେ ଘଟଣାସ୍ଥଳରେ ତାଙ୍କର ମୃତ୍ୟୁ ହୋଇଥିଲା l ସେପଟେ, ପୁଅ ନାଗା ଅଳ୍ପକେ ବର୍ତ୍ତି ଯାଇଥିଲେ । ଏହି ଅଞ୍ଚଳ ପ୍ରତ୍ୟେକ ଦିନ ହାତୀ ଉପଦ୍ରବ ଲାଗିରହିଥିବାରୁ ଲୋକମାନେ ଭୟଭିତ ଅବସ୍ଥାରେ ରହିଛନ୍ତି । ଖବର ପାଇ ଘଟଣାସ୍ଥଳରେ ବନବିଭାଗ ଓ ପରଜଙ୍ଗ ପୋଲିସ ପହଞ୍ଚି ମୃତଦେହ ଜବତ କରି ବ୍ୟବଛେଦ ପାଇଁ ପରଜଙ୍ଗ ଗୋଷ୍ଠୀସ୍ବାସ୍ଥ୍ୟକେନ୍ଦ୍ରକୁ ପଠାଇଛି । ଏ ଅଞ୍ଚଳରେ ବିଭିନ୍ନ ସମୟରେ ହାତୀ ଆତଙ୍କ ଦେଖାଯାଉଥିବା ବେଳେ ବ୍ୟାପକ ମାତ୍ରାରେ ଧନଜୀବନ ନଷ୍ଟ ମଧ୍ୟ ହେଉଛି l ଫଳରେ ଲୋକମାନେ ଆତଙ୍କିତ ଅବସ୍ଥାରେ ରହିଛନ୍ତି । ଗତ ସପ୍ତାହରେ ହାତୀ ଆକ୍ରମଣରେ ଜଣେ ମହିଳାଙ୍କ ମୃତ୍ୟୁ ମଧ୍ୟ ହେଇଥିଲା ।
ଢେଙ୍କାନାଳରୁ ଉର୍ମିଳା ପାତ୍ର,ଇଟିଭି ଭାରତ
