ଢେଙ୍କାନାଳ: ଜିଲ୍ଲାର ବନଖଣ୍ଡ ଅଧିନସ୍ଥ ମହାବିରୋଡ଼ ରେଞ୍ଜ ଡିହୋଡୋଳ ସେକ୍ସନ ଅଞ୍ଚଳର ଦନ୍ତାହାତୀଙ୍କ ଉପଦ୍ରବ ଥମିବାର ନା ଧରୁନି । ପୁଣି ଜଣେ ମହିଳାଙ୍କୁ ଦନ୍ତା ମାରିଦେଇଥିବା ଜଣାପଡିଛି ।
ମିଳିଥିବା ସୂଚନା ଅନୁସାରେ, ଏହି ମହିଳା ଜଣକ ହେଲେ ପରଜଙ୍ଗ ଥାନା ଅନ୍ତର୍ଗତ ଡେମୋଳ ଗ୍ରାମର ଗାଣ୍ଡୁ ବେହେରାଙ୍କ ପତ୍ନୀ ବୁଧେଈ ବେହେରା । ବୁଧେଈ ଶନିବାର ଛେଳି ଚରାଇବା ପାଇଁ ଗ୍ରାମ ନିକଟସ୍ଥ ଜଙ୍ଗଲ ଜମି ଆଡକୁ ଯାଇଥିଲେ । ସମସ୍ତ ଛେଳି ସନ୍ଧ୍ୟାରେ ଫେରି ଆସିଥିବା ବେଳେ ବୁଧେଈ ଆଉ ଘରକୁ ଫେରି ନଥିଲେ ।
ଯାହା ଫଳରେ ଗ୍ରାମର ବହୁ ଯୁବକ ଖୋଜାଖୋଜି କରିଥିଲେ ସୁଦ୍ଧା ମହିଳାଙ୍କୁ ପାଇନଥିଲେ । ତେବେ ରବିବାର ସକାଳେ ଖୋଜିବା ପରେ ଗ୍ରାମ ନିକଟସ୍ଥ ଜଙ୍ଗଳରେ ଉକ୍ତ ମହିଳାଙ୍କ ମୃତଦେହ ପଡିଥିବା ଦେଖିବାକୁ ପାଇଥିଲେ ।
ପ୍ରକାଶ ଥାଉକି ଏହି ମୃତ ମହିଳାଙ୍କ ସ୍ବାମୀ ଗାଣ୍ଡୁ ବେହେରାଙ୍କୁ ବି କିଛିଦିନ ପୂର୍ବରୁ ହାତୀ ଆକ୍ରମଣ କରିଥିଲା । ଯାହା ଫଳରେ ସେ କଟକ ଏସସିବିରେ ଚିକିତ୍ସା ପରେ ସୁସ୍ଥ ହୋଇ ଫେରିଥିଲେ ।
ଅନ୍ୟପଟେ ରବିବାର ଖବର ପାଇ ସକାଳେ ମହାବିରୋଡ଼ ରେଞ୍ଜ ଅଧିକାରୀ ସୁବ୍ରତ କୁମାର ବେହେରା ଘଟଣାସ୍ଥଳରେ ପହଞ୍ଚି ମହିଳାଙ୍କ ମୃତଦେହ ଜବତ କରି ତଦନ୍ତ କରୁଥିବା ଜଣାପଡିଛି ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
