ଢେଙ୍କାନାଳ: ସାରା ଦେଶରେ କେରୋନାକୁ ନେଇ ଭୟ । ଏହାର ମୁକାବିଲା ପାଇଁ ସମସ୍ତେ ଆଣ୍ଟା ଭିଡିଛନ୍ତି । କେରୋନା ନବ୍ୟାପିବା ପାଇଁ ସମସ୍ତଙ୍କର ପ୍ରୟାସ ଜାରି ରହିଛି । ଏପରିକି ଢେଙ୍କାନାଳରେ ପୌରସଂସ୍ଥା ପକ୍ଷରୁ ଅତ୍ୟାବଶ୍ୟକ ଦୈନିକ ପରିବା ମାର୍କେଟରୁ ଜନଗହଳି କମାଇବା ପାଇଁ ଉଦ୍ୟମ କରାଯାଇଛି।
ଫଳରେ ଢେଙ୍କାନାଳ ସହରର ଗୁଡିଆନାଳୀସ୍ଥିତ ବିବି ହାଇସ୍କୁଲର ପଡିଆ, ମହିଶାପାଟ, ବାଜିଚୌକସ୍ଥିତ ମିହିର ମନ୍ଦିର ଓ ଅଳସୁଆ ହାଟ ଆଦି ଯାଗାରେ ନୂତନ ଅସ୍ଥାୟୀ ପରିବା ମାର୍କେଟର ଖୋଲାଯାଇଛି । ସେହିପରି ମେଡିସିନ ଓ ତେଜରାତି ଦୋକାନ ଗୁଡିକରେ ସାମାଜିକ ଦୂରତା ବଜାୟ ପାଇଁ ଗ୍ରାହକମାନଙ୍କ ପାଇଁ ଚିହ୍ନଟ କରାଯାଇଥିବା ଦେଖାଯାଇଛି । ସମସ୍ତଙ୍କ ମଧ୍ୟରେ ଦୂରତ୍ବ ରଖିବାକୁ କରାଯାଇଛି ସଚେତନତା ।
ଏଥିପାଇଁ ଦୋକାନ ସମ୍ମୁଖରେ ଚକରେ ସ୍ବତନ୍ତ୍ର କୋଠରୀ ଟଣାଯାଇଥିଲା । ପ୍ରତ୍ୟେକ କୋଠରୀ ଏକ ମିଟର ଦୂରତା ରକ୍ଷା କରି କରାଯାଇଛି । ଲୋକମାନେ ସେହି କୋଠରୀମାନଙ୍କରେ ଜଣଙ୍କ ପଛରେ ଜଣେ ଛିଡା ହୋଇ ମେଡିସିନ କିଣୁଥିବା ନଜର ଆସିଛି।
କୋରୋନା ସଂକ୍ରମଣକୁ ରୋକିବା ପାଇଁ ସାମାଜିକ ଦୂରତ୍ବ ବଜାୟ ରଖିବା ପାଇଁ ଏପରି ପଦକ୍ଷେପ ନିଆଯାଇଛି ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ