ଢେଙ୍କାନାଳ : ସଦର ଥାନା ଅଞ୍ଚଳରେ ଜଣେ ୧୫ ବର୍ଷିୟା ଦଳିତ ନାବାଳିକାଙ୍କୁ ଦୁଷ୍କର୍ମ ହୋଇଥିବା ଅଭିଯୋଗ ହୋଇଛି । କାଜୁ ଜଙ୍ଗଲରୁ ଗୁରୁତର ଅବସ୍ଥାରେ ଯୁବତୀ ଜଣଙ୍କୁ ପରିବାର ସଦସ୍ୟ ଉଦ୍ଧାର କରିଥିବା ଜଣାପଡିଛି । ତେବେ ଘଟଣା ସମ୍ପର୍କରେ ଥାନାରେ ଅଭିଯୋଗ କରିବା ପାଇଁ ଯିବାରୁ ଅଭିଯୋଗ ନ ରଖି ପୁଲିସର ପାଲଟା ଜୁଲମ କରୁଥିବା ଅଭିଯୋଗ କରିଛନ୍ତି ସମ୍ପୃକ୍ତ ପରିବାର । ନ୍ୟାୟ ପାଇଁ ପୀଡିତା ପରିବାର ଏସପିଙ୍କ ଦ୍ବାରସ୍ଥ ହେବା ପରେ ତଦନ୍ତ ଆରମ୍ଭ ହୋଇଥିବା ସୂଚନା ମିଳିଛି । ଅନ୍ୟପଟେ ଅଭିଯୁକ୍ତ ଫେରାର ହୋଇଯାଇଥିବା ଜଣାପଡିଛି ।
ନାବାଳିକାର ପରିବାର ପକ୍ଷରୁ ଦର୍ଶାଯାଇଥିବା ଅଭିଯୋଗରେ ଗତକାଲି (ବୁଧବାର) ଅପରାହ୍ନରେ ଏହି ୧୫ ବର୍ଷିୟା ନାବାଳିକାକୁ ଘର ପଛପଟକୁ ଶୌଚ ହେବା ପାଇଁ ଯାଇଥିବାବେଳେ ସେହି ଗ୍ରାମର ଚିକୁ ବେହେରା ନାମକ ଯୁବକ ତାଙ୍କୁ ଦୁଷ୍କର୍ମ କରିଥିବା ଅଭିଯୋଗରୁ ଜଣାପଡିଛି । ପରେ ନାବାଳିକା ଜଣଙ୍କୁ କାହାକୁ ନ କହିବା ନେଇ ଧମକ ଦେବା ସହ ମୁର୍ମୁଷୁ ଅବସ୍ଥାରେ ଛାଡି ଚାଲିଯାଇଥିଲା ଅଭିଯୁକ୍ତ । ପରେ କୌଣସି ସୂତ୍ରରୁ ଖବର ପାଇ ନାବାଳିକା ଜଣଙ୍କୁ ଗୁରୁତର ଅବସ୍ଥାରେ କାଜୁ ଜଙ୍ଗଲରୁ ଉଦ୍ଧାର କରିଥିଲେ ପରିବାର ଲୋକ ।
ଗତକାଲି ପୀଡିତା ନାବାଳିକାକୁ ନେଇ ସଦର ଥାନା ଅନ୍ତର୍ଗତ ଗୋବିନ୍ଦପୁର ଫାଣ୍ଡିରେ ଅଭିଯୋଗ କରିଥିଲା ପରିବାର । ମାତ୍ର ପୁଲିସ ଅଭିଯୋଗ ରଖିବା ଦୂରର କଥା ପାଲଟା ପୀଡିତା ଓ ତାର ପରିବାରକୁ ଧମକ ଦେଇ ଥାନାରୁ ଫେରାଇ ଦେଇଥିବା ପରି ସଙ୍ଗିନ ଅଭିଯୋଗ କରିଛି ପୀଡିତାର ପରିବାର । ନିରାଶ ହୋଇ ପୀଡିତା ଓ ତାର ଭିନ୍ନକ୍ଷମ ମା ଓ ବାପା ଆଜି ଢେଙ୍କାନାଳ ଜିଲ୍ଲା ଆରକ୍ଷୀ ଅଧିକ୍ଷକଙ୍କ ଦ୍ବାରସ୍ଥ ହୋଇ ନ୍ୟାୟ ମାଗୁଥିବା ଦେଖାଯାଇଛି । ତେବେ ଏସପିଙ୍କ ନିର୍ଦ୍ଦେଶ କ୍ରମେ ଏକ ସ୍ବତନ୍ତ୍ର ଟିମ ପୀଡ଼ିତାଙ୍କୁ ନେଇ ଡାକ୍ତରୀ ମାଇନା କରିବା ସହ ତଦନ୍ତ ଆରମ୍ଭ କରିଥିବା ଡିଏସପି ସୂଚନା ଦେଇଛନ୍ତି ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
