ଢେଙ୍କାନାଳ: ଝାଡଖଣ୍ଡରୁ ଆସିଥିବା ସ୍ବତନ୍ତ୍ର ବସ ଯୋଗେ ଢେଙ୍କାନାଳରୁ ନିଜ ଭିଟାମାଟିକୁ ଫେରିଛନ୍ତି 11 ଜଣ ଇଟାଭାଟି ଶ୍ରମିକ। ଢେଙ୍କାନାଳ ସଦର ବ୍ଲକର ପଦ୍ମନାଭ ପୁର ଠାରେ ଏକ ଇଟାଭାଟିରେ କାମ କରୁଥିବା 11 ଜଣ ଶ୍ରମିକ ରବିବାର ରାତିରେ ଝାଡଖଣ୍ଡକୁ ଫେରିଛନ୍ତି ।
ଏଥିପାଇଁ ଝାଡଖଣ୍ଡରୁ ଏକ ସ୍ବତନ୍ତ୍ର ବସ ରବିବାର ସନ୍ଧ୍ୟାରେ ଢେଙ୍କାନାଳରେ ପହଞ୍ଚିଥିଲା। ଏହି ବସଟି ଢେଙ୍କାନାଳରେ ପହଞ୍ଚିବା ପରେ ଶ୍ରମିକମାନଙ୍କୁ ଝାଡଖଣ୍ଡ ପଠାଇବା ପାଇଁ ଢେଙ୍କାନାଳ ଜିଲ୍ଲା ପ୍ରଶାସନ ପକ୍ଷରୁ ଆନୁସଙ୍ଗିକ ପ୍ରସ୍ତୁତି ଆରମ୍ଭ ହୋଇଥିଲା।
11ଜଣଙ୍କ ମଧ୍ୟରେ ଜଣେ ମହିଳା ଓ ଜଣେ ଶିଶୁ ରହିଛନ୍ତି । ଝାଡଖଣ୍ଡ ରାଜ୍ୟର ଶଢେଇକଳା ଓ ଖରସୁଆଁ ଜିଲ୍ଲାର 21ଜଣ ଶ୍ରମିକ ଗତ 3ମାସ ହେଲା ଢେଙ୍କାନାଳ ସଦର ବ୍ଲକର ପଦ୍ମନାଭପୁର ଠାରେ ଥିବା ଏକ ଇଟା ଫ୍ୟାକ୍ଟ୍ରିରେ କାମ କରୁଥିଲେ ।
ତେବେ ଲକ ଡାଉନ ପରେ କାମ ବନ୍ଦ ହୋଇଯାଇଥିବାବେଳେ ସେମାନେ ନିଜ ଘରକୁ ଫେରି ପାରିନଥିଲେ । ଫଳରେ ନିଜ ଘରକୁ ଫେରିବା ପାଇଁ ଝାଡଖଣ୍ଡ ସରକାରଙ୍କୁ ନିବେଦନ କରିବା ସହ ପଞ୍ଜିକୃତ କରିଥିଲେ । ଝାଡଖଣ୍ଡ ସରକାର ସେମାନଙ୍କୁ ନେବା ପାଇଁ ପଠାଇଥିବା ଉକ୍ତ ବସ ରବିବାର ସନ୍ଧ୍ୟାରେ ଢେଙ୍କାନାଳ ଜିଲ୍ଲାପାଳଙ୍କ କାର୍ଯ୍ୟାଳୟ ଠାରେ ପହଁଞ୍ଚିଥିଲା ।
ସେପଟେ 21ଜଣ ଶ୍ରମିକଙ୍କ ମଧ୍ୟରୁ 10ଜଣ ଯିବାକୁ ଇଚ୍ଛା ପ୍ରକାଶ କରିନଥିଲେ। ଫଳରେ ଅବଶିଷ୍ଟ 11 ଜଣଙ୍କୁ ନେଇ ରବିବାର ରାତିରେ ବସଟି ଝାଡଖଣ୍ଡ ଅଭିମୁଖେ ଯାଇଥିବା ଜଣାପଡିଛି।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
