ଦେବଗଡ: ଦେବଗଡ ଜିଲ୍ଲା ବିଜେପିରେ ଫାଟ । ଦଳୀୟ ନେତାଙ୍କ ନିର୍ଦ୍ଦେଶନାମା କାମରେ ଆସୁନି । ବିଜେପି ବିଧାୟକ ସୁବାସ ଚନ୍ଦ୍ର ପାଣିଗ୍ରାହୀ ଓ ସାଂସଦ ନିତେଶ ଗଙ୍ଗଦେଵଙ୍କ ମଧ୍ୟରେ ବଢିବାରେ ଲାଗିଛି ତିକ୍ତତା । ସମ୍ବଲପୁର ଲୋକସଭା ସାଂସଦ ଗଙ୍ଗଦେଵଙ୍କ କାର୍ଯ୍ୟକଳାପ ତଥା ପାରିବାରିକ କନ୍ଦଳକୁ ନେଇ ବିଧାୟକ ସୁବାସ ପାଣିଗ୍ରାହୀ ମିଡିଆ ସାମ୍ନାରେ ଗତକାଲି ବିସ୍ଫୋରକ ବୟାନ ଦେଇଛନ୍ତି । ସେପଟେ ବିଧାୟକ ପାଣିଗ୍ରାହୀଙ୍କ ବିଗତ ଦିନର ବିବାଦୀୟ କାର୍ଯ୍ୟକଳାପ ଓ ଲୋକପ୍ରିୟତାକୁ ନେଇ ପ୍ରଶ୍ନ ଉଠାଇଛନ୍ତି ନିତେଶ ଗଙ୍ଗଦେଵଙ୍କ ଧର୍ମପତ୍ନୀ ଅରୁନ୍ଧତୀ ଦେବୀ । ଯାହାକୁ ନେଇ ବିଜେପି ଦଳରେ ଥିବା ଗୋଷ୍ଠୀ କନ୍ଦଳ ବର୍ତ୍ତମାନ ଚରମ ସୀମାରେ ପହଞ୍ଚିଛି ।
ସମ୍ବଲପୁର ସାଂସଦ ନିତେଶ ଗଙ୍ଗଦେବ ପୂର୍ବରୁ ଥିବା ଲୋକପ୍ରିୟତା ହରାଇ ସାରିଛନ୍ତି । ସେ ଲୋକସଭା କିମ୍ବା ବିଧାନସଭା ପାଇଁ ପ୍ରତିଦ୍ବନ୍ଦ୍ବିତା କଲେ ହାରିବା ନିଶ୍ଚିତ’ ବୋଲି ଗତକାଲି ଗଣମାଧ୍ୟମରେ ବିସ୍ଫୋରକ ବୟାନ ଦେଇଛନ୍ତି ଦେବଗଡ ବିଧାୟକ ସୁବାସ ଚନ୍ଦ୍ର ପାଣିଗ୍ରାହୀ । ବିଧାୟକ ଗଣମାଧ୍ୟମକୁ କହିଛନ୍ତି ଯେ, ପାରିବାରିକ ବିବାଦରେ ଛନ୍ଦି ହେବା ପରେ ସମ୍ବଲପୁର ସାଂସଦଙ୍କ ଲୋକପ୍ରିୟତା କମିଯାଇଛି । ସେ ଲୋକଙ୍କ ପାଖକୁ ଯାଉନାହାନ୍ତି କି ସେମାନଙ୍କ ସମସ୍ୟା ବୁଝୁନାହାନ୍ତି । ଏପରିକି ପୂର୍ବର ପଞ୍ଚାୟତ କି ପୌର ନିର୍ବାଚନ ବେଳେ ବି ସାଂସଦଙ୍କ ଦେଖା ମିଳିନଥିଲା । ସାଂସଦ ସମ୍ବଲପୁର ଲୋକସଭା କ୍ଷେତ୍ର କିମ୍ବା ଦେବଗଡ ବିଧାନସଭା ଆସନରୁ ଯଦି ପ୍ରତିଦ୍ବନ୍ଦ୍ବିତା କରିବେ ତା'ହେଲେ ହାରିବା ନିଶ୍ଚିତ । ତାଙ୍କ ପତ୍ନୀ ଅରୁନ୍ଧତୀ ଦେବୀ ଦେବଗଡରୁ ଶାସକ ଦଳର ବିଧାୟକ ପ୍ରାର୍ଥୀ ଭାବେ ଛିଡ଼ା ହେବେ ବୋଲି ଆଶା ବାନ୍ଧିଥିବା ବିଧାୟକ କହିଛନ୍ତି ।
ଅଧିକ ପଢନ୍ତୁ- ବଢିଲା ସୁବାସ-ନୀତେଶ କଳି: ସ୍ତ୍ରୀଙ୍କ ଦ୍ବାରା ଗୃହବନ୍ଦୀ ସମ୍ବଲପୁର ସାଂସଦ !
ସେପଟେ ବିଧାୟକ ସୁବାସଙ୍କ ମନ୍ତବ୍ୟକୁ ଖଣ୍ଡନ କରି ଏହାର ତୀବ୍ର ବିରୋଧ କରିଛନ୍ତି ସମ୍ବଲପୁର ସାଂସଦ ଗଙ୍ଗଦେଵଙ୍କ ଧର୍ମପତ୍ନୀ ତଥା ଦେବଗଡ ରାଣୀ ଅରୁନ୍ଧତୀ ଦେବୀ । ରାଣୀ ଅରୁନ୍ଧତୀ କହିଛନ୍ତି ‘‘ରାଜ ପରିବାର ସର୍ବଦା ଲୋକଙ୍କ ପାଖରେ ରହିଛି । ଲୋକଙ୍କ ପାଇଁ କାମ କରୁଛି । କିନ୍ତୁ ରାଜନୈତିକ ଆକ୍ରୋସ ରଖି ବିଧାୟକ ଯେଉଁସବୁ ଅଭିଯୋଗ କରିଛନ୍ତି ସେସବୁ ମିଥ୍ୟା ଓ ଭିତ୍ତିହୀନ । ଏକ କୁଚକ୍ରାନ୍ତ ଗୋଷ୍ଠୀ ସାଂସଦଙ୍କ କାର୍ଯ୍ୟରେ ସର୍ବଦା ବିରୋଧ କରି ଆସୁଛନ୍ତି । ଖୋଦ ବିଧାୟକ ନିଜେ ବିଭିନ୍ନ ବିବାଦୀୟ ଘଟଣାରେ ଛନ୍ଦିହୋଇ ଲୋକପ୍ରିୟତା ହରାଇ ସାରିଛନ୍ତି । ବିଧାନସଭାରେ ସାନିଟାଇଜର ପିଇବା ହେଉ କି, ରଙ୍ଗମାଟିଆ ଶିଶୁହତ୍ୟା ଘଟଣା ହେଉ କିମ୍ବା ମିଶନ ଶକ୍ତି ମହିଳାଙ୍କ ଦ୍ଵାରା ନିର୍ମାଣାଧୀନ ପାଚେରୀ ଭଙ୍ଗା ଘଟଣା ହେଉ, ସବୁକ୍ଷେତ୍ରରେ ବିଧାୟକ ବାରମ୍ବାର ବଦନାମ ହୋଇଛନ୍ତି । ଖୋଦ ବିଧାୟକଙ୍କ ପୁଅ ନାମରେ ଏକ ଦୁଷ୍କର୍ମ ଅଭିଯୋଗ ରହିଛି । ବିଧାୟକ ପାରିବାରିକ ଘଟଣା ନେଇ ରାଜନୀତି କରିବା ବନ୍ଦ ନକଲେ ତାଙ୍କ ନାମରେ ମାନହାନି ମକଦମା କରିବାକୁ ଅରୁନ୍ଧତୀ ଚେତାବନୀ ଦେଇଛନ୍ତି ।
ଇଟିଭି ଭାରତ, ଦେଓଗଡ
