ଦେବଗଡ଼: ମେଗା ଜଳ ସେଚନ ପ୍ରକଳ୍ପ ନିର୍ମାଣ କାର୍ଯ୍ୟ କରୁଥିବା ଠିକାସଂସ୍ଥା ପାଇପ ବିଛାଇବା ପାଇଁ ଖୋଳି ଦେଇଯାଇଛି ମୁଖ୍ୟ ରାସ୍ତା ଓ ଚାଷଜମି । ଫଳରେ ଯାତାୟତରେ ପ୍ରତିବନ୍ଧକ ସୃଷ୍ଟି ହେବା ସହିତ ଲୋକଙ୍କ ଚାଷକାର୍ଯ୍ୟ ପ୍ରଭାବିତ ହେଉଛି । ଯାହାକୁ ନେଇ ସ୍ଥାନୀୟ ଲୋକଙ୍କ ମଧ୍ୟରେ ଦେଖା ଦେଇଛି ଅସନ୍ତୋଷ ।
ଦେବଗଡ଼ ଜିଲ୍ଲା ତିଳେଇବଣି ବ୍ଲକର ବଡଛାପଲ ପଞ୍ଚାୟତରେ ମେଗା ଜଳସେଚନ ପ୍ରକଳ୍ପ ନିର୍ମାଣ କାର୍ଯ୍ୟ କରୁଥିବା ଏକ ଠିକାସଂସ୍ଥା ଗତ କିଛିଦିନ ପୂର୍ବରୁ ପାଇପ ବିଛାଇବା ପାଇଁ ବଡ଼ଛାପଲ ଠାରୁ ସୁବର୍ଣ୍ଣପାଲି ଯାଇଥିବା ମୁଖ୍ୟ ରାସ୍ତାକୁ ଖୋଳି ଦେଇଛି । ଫଳରେ ଏହି ରାସ୍ତାରେ ଯିବା ଆସିବାରେ ଲୋକେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି । ଏଠାରେ ଛୋଟବଡ଼ ଦୁର୍ଘଟଣା ମଧ୍ୟ ଘଟି ଲୋକେ ଆହତ ହେଉଛନ୍ତି। ଏଥି ସହିତ ବର୍ତ୍ତମାନ ଚାଷ କାର୍ଯ୍ୟ ଆରମ୍ଭ ହୋଇଥିବା ବେଳେ ସମ୍ପୃକ୍ତ ଠିକାସଂସ୍ଥା ଲୋକଙ୍କ ଚାଷଜମି ଖୋଳି ପାଇପ ବିଛାଉଥିବରୁ ଚାଷକାର୍ଯ୍ୟ ପ୍ରଭାବିତ ହୋଇଛି । ଫଳରେ ଏନେଇ ବଡାଛପଲ, ସୁବର୍ଣ୍ଣପାଲି ଓ କୁତୁରାପଶି ଆଦି ଗାଁ ଲୋକଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି ।
ସମ୍ପୃକ୍ତ ଠିକାସଂସ୍ଥା ଖୋଳିଥିବା ରାସ୍ତାର ତୁରନ୍ତ ମରାମତି କରିବା ସହିତ ଚାଷ କାର୍ଯ୍ୟ ସମୟରେ ପାଇପ ବିଛା କାର୍ଯ୍ୟ ସ୍ଥଗିତ ରଖିବାକୁ ସ୍ଥାନୀୟ ଲୋକେ ପ୍ରଶାସନ ନିକଟରେ ଦାବି କରିଛନ୍ତି ।
ଦେବଗଡ଼ରୁ ସରୋଜ ଶତପଥି, ଇଟିଭି ଭାରତ
