ଦେବଗଡ: ସମୟ ସହ ତାଳ ଦେଇ ଦେଶ ବିକାଶ ପଥରେ ଆଗେଇ ଚାଲିଥିବା ବେଳେ ଏବେ ବି ବାସ୍ତବ ଚିତ୍ର ସମ୍ପୂର୍ଣ୍ଣ ଭିନ୍ନ । ଯାହାର ଏକ ଜ୍ବଳନ୍ତ ନଜିର ଦେଖିବାକୁ ମିଳିଛି ଦେବଗଡ ଜିଲ୍ଲା ରିଆମାଳ ବ୍ଲକ ଉଟୁଣିଆଁ ପଞ୍ଚାୟତରେ । ଏଠାରେ ଥିବା ହିଞ୍ଜୁଳି ନଦୀରେ ଏବେ ବି ଯାତାୟତ ପାଇଁ ପୋଲ ଖଣ୍ଡେ ନାହିଁ । ଜିଲ୍ଲା ପଠନର 26 ବର୍ଷ ବିତିଥିଲେ ବି ଏଠାରେ ଗମନାଗମନ ବ୍ୟବସ୍ଥା ସମ୍ପୂର୍ଣ୍ଣ ବିପର୍ଯ୍ୟସ୍ତ ।
ଏହା ଦିନେ ଅଧେ କଥା ନୁହେଁ, ଦୈନିକ ଏହି ନଦୀର ପ୍ରଖର ସ୍ରୋତରେ ଜୀବନକୁ ପାଣି ଛଡାଇ ଲୋକେ ଅତି ବିପଦଜନକ ସ୍ଥିତିରେ ଯାତାୟତ କରୁଛନ୍ତି । ଏହି ନଦୀ ରିଆମାଳ ବ୍ଲକର ଉଟୁଣିଆଁ ପଞ୍ଚାୟତରେ ଉଟୁଣିଆଁ ଓ ହରିହରପୁର ଗାଁ ମଧ୍ୟରେ ପ୍ରବାହିତ ହେଉଛି । ହେଲେ ଏହି ନଦୀ ଉପରେ କୌଣସି ପୋଲ ନଥିବାରୁ ଉଭୟ ଗାଁର ବାସିନ୍ଦା ଯାତାୟତ ପାଇଁ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଥିବା ଅଭିଯୋଗ କରିଛନ୍ତି ।
ସାଧାରଣତଃ ବର୍ଷା ଦିନେ ଏହି ନଦୀରେ ପ୍ରଳୟଙ୍କରୀ ବନ୍ୟା ଆସିଥାଏ । ଫଳରେ ନଦୀ ସେପଟେ ଥିବା ହରିହରପୁର ଗାଁ ବର୍ଷାଦିନେ ବାହ୍ୟ ଜଗତରୁ ବିଚ୍ଛିନ୍ନ ହୋଇଯାଏ । ସାଧାରଣ ଦିନରେ ଏହି ନଦୀର ପାର କରିବା କଷ୍ଟକର ହେଉଥିବା ବେଳେ ବର୍ଷାଦିନରେ କଷ୍ଟ ବହୁଗୁଣ ବଢିଯାଉଥିବା ଦେଖାଯାଏ । ତେବେ ବର୍ଷା ଦିନେ କେବଳ ହରିହରପୁର ଗାଁ ନୁହେଁ ବରଂ ନଦୀ ଆରପଟେ ଥିବା ସାଧୁବାହାଳି, ଖଣ୍ଡାଧୂଆଁ, ରତନପୁର ଓ ପୋଇପାଣି ଆଦି ପାଞ୍ଚଖଣ୍ଡ ଗାଁର ପ୍ରାୟ 2ହଜାରରୁ ଉର୍ଦ୍ଧ୍ବ ବାସିନ୍ଦା ବାହ୍ୟ ଜଗତରୁ ବିଚ୍ଛିନ୍ନ ହୋଇଯାଆନ୍ତି ।
ଆଜିକୁ ଦୀର୍ଘ 40 ବର୍ଷ ହେବ ଗ୍ରାମବାସୀ ଏହି ନଦୀ ଉପରେ ପୋଲ ନିର୍ମାଣ ନେଇ ଦାବି କରିଆସୁଛନ୍ତି । ସ୍ଥାନୀୟ ପ୍ରଶାସନଠାରୁ ଆରମ୍ଭ କରି ରାଜ୍ୟ ସରକାରଙ୍କ ପର୍ଯ୍ୟନ୍ତ ସଭିଙ୍କୁ ଦାବି ଜଣାଇ ଆସୁଥିଲେ ସୁଦ୍ଧା ହୋଇପାରୁନାହିଁ କୌଣସି ସମାଧାନ । ସୂଚନା ଅନୁଯାୟୀ ହିଞ୍ଜୁଳୀ ନଦୀରେ ପୋଲଟିଏ ନିର୍ମାଣ ପାଇଁ ଦେବଗଡ ପିଡବ୍ଲ୍ୟୁଡି ବିଭାଗ ପକ୍ଷରୁ 6.5 କୋଟି ଟଙ୍କାର ଏଷ୍ଟିମେଟ କରାଯାଇ ସରକାରଙ୍କ ଅନୁମୋଦନ ପାଇଁ ପଠାଯାଇଛି । ତେବେ ସରକାରଙ୍କ ପାଖରୁ ଅନୁମୋଦନ ପାଇଲେ ଖୁବଶୀଘ୍ର ଟେଣ୍ଡର ପ୍ରକ୍ରିୟା ଆରମ୍ଭ ହେବ ବୋଲି ବିଭାଗୀୟ ନିର୍ବାହୀ ଯନ୍ତ୍ରୀ ନାରାୟଣ ପଟେଲ ପ୍ରକାଶ କରିଛନ୍ତି ।
ଦେବଗଡରୁ ସରୋଜ ଶତପଥି, ଇଟିଭି ଭାରତ
